Acinangolo ŵakogopa Mlungu akusasacilila kwawona ŵanace ŵawo ali kumtumicila Yehofa mwakulupicika. Acinangolo mpaka ŵajiganyeje ŵanace ŵawo kusunga yiwundo ya m’Baibulo kutandila ali makandi. (Deut. 6:7; Miy. 22:6) Kutenda yeleyi kukusasaka kulipeleka mnope. Nambope yakuyicisya yakwe yikusaŵa yambone mnope.​—3 Yoh. 4.

Acinangolo mpaka alijiganye yejinji kutyocela ku cisyasyo ca Maliya ni Yosefe. Acinangolo ŵa Yesu ŵajawugala ku Yelusalemu kukutenda cindimba ca Pasaka caka cilicose, atamose kuti kutenda yeleyi kwasosekwaga kola mbiya soni ndaŵi. (Luk. 2:41) Yaliji yangalajila kuwusya kuti acinangolo ŵa Yesu ŵalisamalilaga liŵasali mwausimu. Mwakulandana ni yeleyi, acinangolo masiku agano, akusosekwa kwakamucisya ŵanace ŵawo pakamulicisya masengo lipesa lililyose lyakwete pakwajiganya kupitila mu yakusaŵeceta soni yitendo yawo.​—Sal. 127:3-5.

ALOLELE FIDIYO JAKUTI ŴAWUKAMULICISYE MASENGO UPILE WAŴAKWETE, KANEKO AJANJE YIWUSYO YAKUYICISYAYI:

• Ana Jon ni Sharon ŵalosisye camtuli kuti ŵajendelecele kusosasosa Ucimwene candanda kwineku ali mkulela ŵanace?

• Ligongo cici acinangolo akusosekwa kwajiganyaga ŵanace ŵawo jwalijose pajika mwakamulana ni msingu wakwe?

• Ana acinangolo mpaka ŵakosecelesye camtuli wanace ŵawo kuti aŵe ŵakulimba mcikulupi pasimene ni yakulingwa?

• Ana ni yida yapi yakusakamulicisya masengo pakwajiganya ŵanace ŵawo yalikopwesye likuga lya Yehofa?