Ndaŵi ja Cikumbucilo jikusaŵa ndaŵi jambone jaganicisya majali ga msogolo ligongo lya mbopesi ja ciwombolo, mpela kwimuka kwa ŵandu ŵawe. Yehofa nganiŵapanganya ŵandu kuti aweje. Ni ligongo lyakwe yikusatupweteka mnope jwakunonyelwa jwetu pawile. (1 Akoli. 15:26) Lasalo ali awile, Yesu yampwetece mnope paŵaweni ŵakumkuya ŵakwe ali mkulila. (Yoh. 11:33-35) Pakuŵa Yesu akwete ndamo mpela sya Atatigwe, tukusakola cikulupi cakuti Yehofa yikusampweteka mnope patuweni tuli mkulila ligongo lya ciwa ca ŵakunonyelwa ŵetu. (Yoh. 14:7) Yehofa akusajembeceya mwalung’wanu lisiku lyele cacajimusya ŵakutumicila ŵakwe ku ŵawe. M’wejisoni tukusosekwa kwembeceyaga lisiku lyeleli mwalung’wanu.—Yobu 14:14, 15.

Pakuŵa Yehofa nganaŵa Mlungu jwacisokonasyo, tukusosekwa kulupilila kuti kwimuka kwa ŵawe kucitendekwa mwakulongosoka. (1 Akoli. 14:33, 40) M’malo mwakupikana kuti kutendekwe malilo, tucipikanaga malipoti gakusala yakwapocela ŵandu ŵajimwice ku ŵawe. Ana akusaganicisya ya kwimuka kwa ŵawe, mnopemnope pa ndaŵi ja ciwa ca jwakunonyelwa jwawo? (2 Akoli. 4:17, 18) Ana akusam’yamicila Yehofa ligongo lyakutupa mbopesi ja ciwombolo soni ligongo lyakusala m’Malemba kuti ŵawe cacijimuka?—Akolo. 3:15.

• Ana acimjawo soni ŵacinasi ŵapi ŵakusacilila kuti cawonegane nawo ali ajimwice ku ŵawe?

• Ana ŵandu ŵapi ŵakusiŵasala m’Baibulo ŵakusaka kuti cawonegane nawo ali ajimwice ku ŵawe?