Kabuku kakuti Ana Ŵani Ŵakutenda Lisosa lya Yehofa Lelo Jino, ŵakalinganyisye kuti twajiganyeje ŵatukusalijiganya nawo mkanitutande kapena patumalisisye lijiganyo lyalisikulyo. * Lijiganyo 1 mpaka 4 likwakamucisya ŵakulijiganya kutumanyilila cenene m’weji. Lijiganyo 5 mpaka 14 likwakamucisya ŵakulijiganya kumanyilila ya masengo getu. Lijiganyo 15 mpaka 28 likwasalila ya likuga lyetu. Yili yakusosekwa kuya majiganyoga mwandondomeko patukulijiganya ni mundu akaŵe naga lijiganyo line likusosekwa kulijiganya mwacitema. Lijiganyo lililyose lili peji jimo, ni mpaka atagulilane ni jwakulijiganyajo kwa maminisi 5 mpaka 10.

• Am’wusyeje ciwusyo cacilisoni mtwe walijiganyolyo

• Aŵalanjileje yalumo lijiganyoli, mpaka asagule kuŵalanga lijiganyo lyosope kapena kuŵalanga ndime jimo jimo

• Atagulilaneje yaŵalasileyo. Akamulicisyeje masengo yiwusyo yayili pasi pa peji nambosoni yiwulili. Nambosoni aŵalanjeje ni kutagulilana najo malemba ga mundimejo naga yili yakuŵajilwa. Amsalile kuti tumitwe twamwanamwana tukwanga ciwusyo cekulungwa.

• Naga pana libokosi lyakuti “Awungunye Yejinji” aŵalanjile yalumo ni amlimbikasye jwakulijiganyajo kukuya yapikeneyo