Kabuku kakuti Apikanileje Mlungu ŵakalinganyisye kuti katukamucisyeje kwiganya usyesyene wa m’Baibulo kwa ŵandu ŵayikusiyalema kuŵalanga. Lijiganyo lililyose likwete mapeji gaŵili, soni yiwulili yakusalala. Ciwulili cilicose cikwete kacimanyilo kakulanjila ciwulili cakuyicisya.

Kabuku kakuti Apikanileje Mlungu kuti Atame ni Umi Wangamala kakwetesoni yiwulili yakulandana ni yayili m’kabuku kakuti Apikanile Mlungu, nambo kandandaka kakwete maloŵe gejinji gampaka agakamulicisye masengo jwakulijiganya jwakusakombola kuŵalanga. Ndaŵi syejinji, ŵakulalicila akusakamulicisya masengo kabukuka pakwiganya nambo ŵakulijiganya akusakamulicisya masengo kabuku ka Apikanileje Mlungu. Mapeji gejinji gakwete libokosi lya yakonjecesya yampaka atagulilane mwakamulana ni mwakum’wonela jwakulijiganyajo.

Mpaka agaŵile kabukuko ndaŵi jilijose atamose kuti nganiwuŵa mwesi wagaŵila. Pakutendesya lijiganyo lya Baibulo akamulicisyeje masengo yiwulili pakusala ngani ja m’Baibulo. Am’wusyeje yiwusyo kuti jwakulijiganyajo ajigaleje nawo mbali soni kuti amanyilile naga akupikanicisya. Aŵalanjeje ni kutagulilana malemba gagali pasi pa peji. Pamalisisye kulijiganya kabukuka, atande kulijiganya najo buku jakuti Ana Baibulo Jikusatujiganya Yatuli? kuti mundujo aŵajilwe kubatiswa.