LIGONGO LYAKWE KULI KWAKUSOSEKWA: Jwakulijiganya pakosecele, cacipikanicisya cenene soni kumbucila yatumjiganyisye. Pakupikanicisya cenene soni kumbucila yalijiganyisye, cacijawula pasogolo mwacitema mnope. Atamose pabatiswe, cacisosekwa kwendelecela kosecela misongano soni undumetume ni cakulinga cakuti ajendelecele “kuŵa mesope.” (Mat. 25:13) Myoyo, ligongo lyakumanyilila mwampaka alijiganyile soni kola cisyoŵe cakulijiganya, yicakamucisya pa umi wawo wosope. Kutandila pandanda, tukusosekwa kumjiganya jwakulijiganya jwetu kuti akole cisyoŵe cakosecela lijiganyo lya Baibulo.

MWAMPAKA TUTENDELE:

• Tuŵeje cisyasyo cambone. (Alo. 2:21) Pandaŵi jatukosecela, tum’woneje jwakulijiganyajo munganisyo mwetu. (km 11/15 3) Mpaka tumkunde kuti aloleje mu buku jetu jatukatile misele patukoseceleje

• Tumlimbikasye kuti akoseceleje. Panyuma pakuti atamilikasisye lijiganyo, amsalile kuti kosecela jili mbali jimo ja lijiganyo lya Baibulo, soni asale umbone wakwe. Amsalile matala gampaka gamkamucisye kupata ndaŵi jakosecela. Ŵakulalicila ŵane akusamkunda jwakulijiganya jwawo kamulicisya masengo buku jawo jekate misele pakusaka kumlosya umbone wakosecela. Am’yamicileje pakosecele

• Tumlosye mwampaka akosecelele. Ŵakulalicila ŵane, akusakamulicisya masengo ndawi josope ja lijiganyolyo ali mkulosya jwakulijiganyajo mwampaka akosecelele