LIGONGO CICI KULI KWAKUSOSEKWA: Buku ja 1 Akolinto cili cimo mwa yikalata 14 yaŵalembile ndumetume Paulo pakwalimbikasya Aklistu acimjakwe. Mundu jwakulemba cikalata akusasagula cenene maloŵe, soni mundu jwakumlembelajo akusaciŵalanga mwakuwilisyawilisya. Kulemba yikalata lili litala lyambone lyakwalalicilila ŵacinasi ŵetu soni ŵandu ŵane. Yikusakamucisyasoni kuti tukombole kwalalicila ŵandu ŵanganituŵa tukombwele kuŵecetana nawo meso ni meso. Mwacisyasyo, ŵane mpaka alosye lung’wanu nambo mpaka yiŵe yakusawusya kwasimana pamlango. Mpaka yiŵesoni yakusawusya kusimana ni ŵandu ŵane ŵamumkuli mwetu ligongo lyakuti akusatamaga kumalo gakusawusya kwayicila, ndenje syakola mageti, kapena kumalo gakutalicila mnope. Ana tukusosekwa kukumbucilaga cici mnopemnope patukulemba cikalata kwa mundu jwakutyocela cilambo cine?

MWAMPAKA TUTENDELE:

• Alembe yindu yakaŵecetene najo meso ni meso. Alembe yakwamba wawojo kundanda kwa cikalataco. Soni asale mwakupikanika ligongo lyakwe alembile cikalataco. Mwinesoni mpaka awusye ciwusyo cakuti mundujo aciganicisye, kaneko mpaka asale ya webusayiti jetu. Amsalile yakwamba Lijiganyo lya Baibulo lya pa Intaneti, kapena lijiganyo lya Baibulo lya panyumba. Nambosoni alembe mitwe jine kutyocela m’kabuku kamo katukusajiganyicisya. Yindu yine yampaka aŵice m’cikalataco, yili mpela, kadi, kapepala, kapena kapepala kakumŵilanjila.

• Alembeje cikalata cejipi. Cikalata cawo ciŵeje cejipi kuti mundujo akaja kupela naco pakuŵalanga.—Alole cisyasyo ca cikalata pa peji 8

• Mkanaŵe kutumisya cikalataco, aciŵalanje cenene kuti alole naga maloŵe galigose galembedwe cenene. Soni alolecesye kuti cili cakusangalasya soni cikupikanika cenene. Akusosekwasoni kuŵika masitampa gakwanila.