Cilamusi ca Mose casalaga kuti mundu jwakusaka kumasya ulombela akusosekwa kola cikalata cakumacisya ulombelawo. Yeleyi yakamucisyaga kuti ŵandu akawutucilaga kumasya maulombela gawo. Nambope, mu ndaŵi ja Yesu, acimlongola wa dini ŵatendekasisye kuti kumasya ulombela kuŵeje kwangasawusya. Acalume ŵakombolekaga kumasya maulombela gawo pa magongo galigose. (nwtsty yakamucisya pakulijiganya kutyocela pa Maliko 10:4, 11) Yesu jwasasile kuti Yehofa ni juŵatandisye ulombela. (Maliko 10:2-12) Jwamlume ni jwamkongwe ŵaliji ŵakuti caciŵa “cilu cimo” mu mkamulano wangamala. Ligongo lya m’Malemba lyakumalila ulombela, mwakamulana ni buku ja Matayo, lili naga jwine “atesile yamsese.”—Mat. 19:9.

Masiku agano, ŵandu ŵajinji akusawuwona ulombela mpela muŵawuwonelaga Afalisi, ngaŵa mpela muŵawuwonelaga Yesu. Maŵasa ga kucilamboku pagasimene ni yakusawusya, gakusagamba kuwutucila kumasya ulombelawo. Mwakulekangana ni yeleyi maŵasa ga Ciklistu gakusayiwona yilanga yaŵatesile kuŵa yakusosekwa mnope mwamti akusalingalinga kamulicisya masengo yiwundo ya m’Baibulo. Pacalolele fidiyo ja mtwe wakuti Cinonyelo Soni Kucimbicisyana Yikusakamulanya Maŵasa, ajanje yiwusyo yakuyicisyayi:

• Ana lilemba lya Miyambo 15:1 mpaka tulikamulicisye masengo camtuli mu ulombela wetu, soni ligongo cici yeleyi yili yakamucisya?

• Ana lilemba lya Miyambo 19:11 mpaka litukamucisye camtuli kuŵambala yakusawusya?

• Naga ulombela wetu usigele panandi kusokonecela, mmalo mwakuliwusya kuti, ‘Kapena ngambe kumasya?’ ana ni yiwusyo yapi yampaka tusosekwe kuliwusya?

• Ana kamulicisya masengo lilemba lya Matayo 7:12 mpaka kutukamucisye camtuli kuŵa jwamlume kapena jwamkongwe jwambone?