Kuti ŵandu ŵakusalijiganya Baibulo amsangalasyeje Yehofa akusosekwa kola chikulupi chakulimba. (Ahe 11:6) Mpaka twakamuchisye kutenda yeleyi pakukamulichisya masengo buku ja Asangalaleje Mpaka Kalakala. Mtwe uliwose m’bukuji, ukwete malemba gakamulana ni yakulijiganya, yindu yakumkamuchisya jwakulijiganya kuganisya, yiwusyo yakamuchisya, mafidiyo gakulimbikasya, soni yiwulili yambone. Patukwakamuchisya ŵatukusiŵajiganya kola ndamo syambone soni kuŵa paunasi wambone ni Yehofa tukusaŵa kuti tukutaŵa ni yindu yangakamula moto.—1Ak 3:12-15.

Ligongo lyakuti Mlungu ali jwangawoneka, ŵandu ŵane yikusiyasawusya kuyiwona kuti mpaka aŵe najo paunasi. Myoyo tukusosekwa kwakamuchisya kuti ammanyilile Yehofa soni kuti amkulupilileje.

ALOLELE FIDIYO JAKUTI ALIMBISYE CHIKULUPI CHAWO MWA YEHOFA PAKAMULICHISYA MASENGO BUKU JA “ASANGALALEJE MPAKA KALAKALA,” KANEKO AKAMBILANE YIWUSYO AYI:

• Ana tukumanyilila wuli kuti mlongoju jwakosechele chenene lijiganyoli?

• Ana jwakamulichisye masengo wuli yiwusyo pakusaka kumkamuchisya jwakulijiganya kupikanichisya lilemba lya Yesaya 41:10, 13?

• Ana fidiyo soni malemba gamkamuchisye wuli jwakulijiganyaju?

Ŵandu ŵajinji ŵangapikanichisya ngani jakuti Yesu ŵatuwombwele, soni ŵangakulupilila kuti yayatendekweyi uli mtuka wakutyochela kwa Mlungu. (Aga 2:20) Myoyo tukusosekwa kwakamuchisya kuti akulupilileje mbopesi jaŵapeleche Yesu.

ALOLELE FIDIYO JAKUTI ALIMBISYE CHIKULUPI CHAWO MWA YESU PAKAMULICHISYA MASENGO BUKU JA “ASANGALALEJE MPAKA KALAKALA” KANEKO AKAMBILANE YIWUSYO AYI:

• Ana tukumanyilila wuli kuti m’baleju jwakosechele chenene lijiganyoli?

• Ana m’baleju akamulichisye masengo chamtuli yindu yakusimanikwa pa “Yakulinga Yinesoni” pakusaka kumkamuchisya jwakulijiganyaju?

• Ana kupopela kuli kwakusosekwa chamtuli kwa jwakulijiganya Baibulo?