Kutandila kalakala ŵandu ŵa Yehofa aŵele ali mkukamula masengo gejinji gakusawusya. Jemanjaji akusakombola kukamula masengoga ni chikamuchisyo cha Yehofa. Mu 1954, ŵa Mboni sya Yehofa ŵakopwesye fidiyo ja mtwe wakuti Yajikutenda Gulu ja Yehofa Masiku Agano. Ŵaŵajambwile fidiyoji ali ŵandu ŵaŵatumichilaga pa Beteli. Nambotu jemanjaji nganamanyililaga yejinji yakwayana ni masengoga. Yehofa ŵakamulichisye masengo msimu wakwe weswela kuti masengo gakusawusyaga gakomboleche. Yeleyi yikutupa chikulupi chakuti naga tukumdalila Yehofa, mpaka tukombole kukamula masengo galigose gatupochele.—Sak 4:6.

ALOLELE FIDIYO JAKUTI YAYATENDEKWE PAKUKOPOSYA FIDIYO JA “YAJIKUTENDA GULU JA YEHOFA MASIKU AGANO,” KANEKO AJANJE YIWUSYO AYI:

• Ligongo chichi ŵaganisisye yakwambula fidiyo jakusala ya masengo gagakusatendekwa ku likulu lyetu?

• Ana fidiyoji jalosisye chamtuli kuti ŵandu ŵakusatumichila pa Beteli ali ŵakamulana mpela chilu?—1Ak 12:14-20

• Apa paŵajambulaga fidiyoji ŵasimene ni yakusawusya yamtuli soni ana ŵamalene nayo uli?

• Ana yeleyi yikutujiganya chichi pakwamba ya msimu weswela wa Yehofa?