Mabuku ga Jikusatujiganya Yatuli ni Baibulo Jikusajiganya Cici gali gakulandana. Gosopega gali gakamulicisya masengo pakwiganya Baibulo, gakwete usyesyene wakulandana soni ŵagalembile mwakulandana. Nambope, buku ja Jikusatujiganya Yatuli jikwete maloŵe gangasawusya soni mundu ngaŵa mkulajila kujipikacisya. Bukuji ŵajipanganyisye kuti tujikamulicisyeje masengo pakwinganya ŵandu ŵangakusapikanicisya cenene patukwajiganya buku ja Baibulo Jikusajiganya Cici. Bukuji nganijikola yakonjecesya, mmalo mwake jikwete yakumbesi yayikutagulila cenene maloŵe soni songa sine syasikusimanikwa mu nganijo. Nganijikola yiwusyo kundanda kwa mtwe wuliwose, soni kumbesi kwangali libokosi lyakuwilisya. Mmalo mwakwe, mtwe wuliwose ukumalisya mwakutagulila mwakata usyesyene wa m’Baibulo wa mu ngani josopejo. Mpela mwayiŵelele ni buku ja Baibulo Jikusajiganya Cici, buku ja Jikusatujiganya Yatuli mpaka tujigaŵile ndaŵi jilijose, atamose kuti m’mwesi welewo nganasala ya bukujo. Ana mpaka tukamulicisye masengo catuli yindu yayikusimanikwa m’bukuji patukutendesya lijiganyo lya Baibulo?

YATULIJIGANYISYE: Litala lyatukusakamulicisya masengo pakutendesya lijiganyo lya Baibulo mwakuŵalanga buku ja Baibulo Jikusajiganya Cici kaneko ni kuwusya yiwusyo lili lyambone. Nambo tuwanicisye kuti jwakulijiganya Baibulo jwawo ngakumanyilila cenene ciŵecetoco kapena jwangapakombola kuŵalanga cenene. Naga yili m’yoyo mpaka asagule kamulicisya masengo buku ja Jikusatujiganya Yatuli. Mpaka akamulicisye masengo yayitagulile mwakata kumbesi yakuti yatulijiganyisye pakutendesya lijiganyo lya Baibulo ni mundujo, soni mpaka amlimbikasye kuti aliŵalanjile jika ndime jakamulana ni songajo. Mpaka asagule songa ja usyesyene pa yakumbesi ni kutendesya lijiganyo lya Baibulo kwa maminisi 15. Pakuŵa yayikusimanikwa kumbesi ngayikusatagulila yosope ya mundimejo, jwakutendesya lijiganyolyo akusosekwa kosecela cenene, soni kulola mwampaka amkamucisye jwakulijiganyajo. Naga jwakutendesya lijiganyo akukamulicisya masengo ndime sya munganijo, mpaka atagulilane mbali jeleji pamalisisye mtwewo.

YAKUMBESI: Maloŵe soni songa sine syakumbesi asiŵisile cenene mwakuya ndime sya m’bukujo. Jwakutendesya lijiganyo lya Baibulo mpaka asagule ndaŵi jakuŵajilwa jakutagulilana yakumbesi ya m’buku ja Jikusatujiganya Yatuli.