Peji jandanda ja webusayiti jetu jikusakola ngani soni mafidiyo gakwatendekasya lung’wanu ŵandu ŵakwete nganisyo syambone ŵele nganaŵa Ŵamboni. (Mas 13:48) Ndaŵi syejinji pakusaŵa ngani syasikusimanikwa mma nyusi kapena syakunonyela kukambilana ŵandu pandaŵijo.

Ana mpaka akamulichisye masengo chamtuli peji jandanda ja jw.org pali mu utumiki?

• Ndaŵi syosope aloleje yayili pa webusayitiji. Amanyilileje ngani syasigambile kukopoka kwene soni aganichisyeje yampaka atende pakukambilana ni mundu jwalosisye lung’wanu. (Kuti apate ngani sine syasyakopweche pa peji jandanda, atowanye palembile kuti “Alole Yine.”) Naga akumanyilila ngani syasigambile kukopoka kwene pa webusayiti jetu nikuti chachikola ngani syasambano syampaka asikamulichisye masengo pali mu utumiki.

• Akamulichisyeje masengo ngani soni mafidiyo gagakusasimanikwa pa peji jandandaji pakutanda kukambilana ni mundu. Yindu yeleyi mpaka yakamuchisye kumanyilila yindu yayikwalagasya ŵandu ŵa mu dela jawo.

• Ŵalosyeje ŵandu peji jandanda ja webusayitiji. Apate ngani jinejakwe ni ŵakamuchisye ŵane mwampaka akamulichisye masengo webusayitiji.

• Ŵatumichisyeje linki. Ŵandu ŵane mpaka yasawusye kuŵechetana ni m’weji pameso ni pameso nambo mpaka aŵe kuti akusaka kwinjila pa webusayiti jetu. Myoyo akalepelaga kwatumichisya ŵandu mpela ŵeleŵa linki ja mpaka jajigalile ku peji jandanda ja webusayiti jetu kapena ku ngani jine kapenasoni fidiyo jajikusasimanikwa pelepa.