YINDIMBA yakumanyika mnope ya dini, soni yindimba yine yakusatendaga ŵandu m’yilambo yejinji moŵa agano, yangatyocela m’Baibulo. Sambano, ana yindimba yeleyi yatandite catuli? Naga akusawungunya ngani m’mabuku, cacimanyilila yagakusasala mabuku gane pakwamba ya yindimba yakumanyika mnope kumangwawoko. Kwende tulole yine mwa yindimba yeleyi.

Isitala (Páscoa). Buku jine jikusasala kuti: “M’Malangano ga Sambano pangali palipose pakusalosya kuti ŵandu ŵatendaga cindimba ca Isitala.” (The Encyclopædia Britannica) Ana Isitala jatandite wuli? Jatyocele kukulambila kwacikusa. Atamose kuti ŵandu akusaŵeceta kuti palisikuli akusakumbucila kwimuka kwa Yesu, nambo yakusatendaga pandaŵi ja Isitala ngaŵa ya Ciklistu. Mwambone, pakwamba ya “Acikalunga ŵa Isitala,” buku jine jatite: “Kalunga jili cimanyilo cacikusa cakulosya kuti mundu mpaka aŵelece.”—The Catholic Encyclopedia.

Valentine. Buku jine jikusati: “Valentine jikusatendekwa pa lisiku lya cindimba ca Aklistu ŵaŵili ŵaŵamanyikwaga ni lina lyakuti Valentine ŵaŵaliji ŵakulipeleka mnope pa dini jawo. Nambo misyungu jajikusatendekwa palisikuli komboleka kuti jatyocele ku cindimba ca Aloma cakolanjikwa Lupercalia. Cindimbaci catendekwaga pa February 15 caka cilicose. Cindimbaci catendekwaga pakusaka kucimbicisya milungu jiŵili, Juno, mlungu jwamkongwe jwa Ciloma jwakulolela acakongwe ni ulombela, soni Pan, mlungu jwa yakupanganyikwa.”—The World Book Encyclopedia.

Yindimba yine. Yili yangakomboleka kusala yakwamba yindimba yosope yayikusatendekwa pacilambopa. Yehofa jwangajiticisya yindimba yayikusacimbicisya ŵandu kapena yiwanja ya ŵandu. (Yeremiya 17:5-7; Masengo 10:25, 26) Tukaliŵalilasoni kuti ndandilo ja yindimba ya dini mpaka jilosye naga Mlungu akusasangalala nayo kapena iyayi. (Yesaya 52:11; Ciunukuko 18:4) Malamusi ga m’Baibulo gagali mu Mtwe 16 wa buku ajino mpaka gakamucisye kumanyilila mwakusayiwonela Mlungu yindimba yine yangakwayana ni dini.