ANA ŵanduŵa akutenda cici sambano? Akulambila mwanace jwa ng’ombe! Ana ligongo cici akutenda yeleyi?

Musa patemi kwitumbi kula kwandaŵi jelewu, ŵandu ŵala akutanda kuŵeceta kuti: ‘Ngatukumanyilila cacimtendecele Musa. Kwende sambano tulipanganyicisye mlungu jwakuti atulongolele kopoka m’cilambo acino.’

Mkulugwe Musa, Aloni, akwiticisya acitiji: ‘Cambone, awule ndolo syawo sya golidi, ni ayice nasyo kwa une.’ Ŵandu ŵala patesile yeleyi, Aloni akunyelenyendula ndolo sila nikupanganya mwanace jwa ng’ombe jwa golidi. Ŵandu ŵala akuŵeceta kuti: ‘Aju ni Mlungu jwetu, juŵatukopwesye m’cilambo ca Eguputo!’ Kaneko Ayisalayeliwo akutenda cindimba cekulungwa, soni akulambila mwanace jwa ng’ombe jwa golidi jula.

Yehofa pakuyiwona yeleyi, akutumbila nayo mnope. Ni akumsalila Musa kuti: ‘Mjawule mwacitema pasi. Ŵandu akutenda yakusakala mnope. Aliŵalile malamusi gangu ni akulambila mwanace jwa ng’ombe jwa golidi.’

Musa jula akuwutucila pasi pa litumbilyo. Pakuŵandicila, akwawona ŵandu ali mkwimba ni kuŵina mwakusyungulila mwanace jwa ng’ombe jwa golidi! Sambano Musa akutumbila mnope mwati akuponya pasi mapale gaŵili ga maganga gala, ni gakasikakasika. Kaneko akujigala mwanace jwa ng’ombe jwa golidi jula nikumnyelenyendula pamoto. Kaneko akumsyaga nikuŵa mpela utandi.

Ŵanduŵa atesile cindu cakusakala mnope. M’yoyo Musa akwasalila ŵane mwa acalume kujigala maupanga gawo. Ni akwasalila kuti: ‘Ŵandu ŵakusakala ŵalambileje mwanace jwa ng’ombe jwa golidi akusosekwa kuwa.’ M’yoyo acalume ŵala akuwulaga ŵandu ŵakwana 3,000! Ana yeleyi ngayikulosya kuti tukusosekwa kusamala kuti tulambileje Yehofape, ngaŵaga milungu jine jaunami?