ANA akumanyilila yakakuŵeceta kamwalika? Kakumsalila jwamkongwejo yakwamba Elisa, jwakulocesya jwa Yehofa, soni yindu yakusimonjesya yakusatenda ni cikamucisyo cakutyocela kwa Yehofa. Jwamkongwejo ngakusammanyilila Yehofa ligongo jwalakwe nganaŵa jwa ku Yisalayeli. Sambano kwende tulole ligongo lyakwe mwaliju akusimanikwa m’nyumba ja jwamkongweju.

Jwamkongweju ali jwa ku Suli. Ŵamkwakwe ali Namani, jwali mlongola jwa asilikali ŵa ku Suli. Asuli ŵamkamwile mwali jwa ku Yisalayeliju, ni ŵapite najo kwa jwamkongwe jwa Namani kuti aŵe jwamasengo jwakwe.

Namani akwete ulwele wakogoya wa matana. Ulwelewu ukusatendekasya mnowu wa mundu kunyelenyenduka. Sambano mwaliju akwasalila ŵamkwawo Namani kuti: ‘Ninganonyele ambuje ŵanguŵa akajawule kukuwonegana ni jwakulocesya jwa Yehofa ku Yisalayeli. Jwalakwejo mpaka ŵaposye ulwele wawo wamatanawo.’ Kaneko jwamkongwe jula akwasalila nganijo ŵamkwakwe.

Namani akusacilila mnope ali aposile, ni jwalakwe akusaka ali apite ku Yisalayeli. Payice kweleko, akwawula kunyumba ja Elisa. Sambano Elisa akumsalila jwakutumicila jwakwe kuti amsalile Namani kuti ajawule kukoga ndaŵi msano ni siŵili. Yeleyi yikumtendekasya Namani kutumbila mnope, ni akuŵeceta kuti: ‘Sulo syakumangwetu sili syambone kupundana ni lusulo lulilose lwa ku Yisalayeli!’ Paŵecete yeleyi Namani akutyoka.

Nambo jumo jwa ŵamasengo ŵakwe akumsalila kuti: ‘Ambuje naga Elisa akasalile kutenda cindu cakusawusya, wawotu akacitesile. Sambano uli ngagamba koga mpela mwasalile jwalakwejo?’ Namani akumpikanila jwamasengo jwakwe ni akwawula kukoga mu Lusulo lwa Yolodani kakwana kamsano ni kaŵili. Patesile yeleyi cilu cakwe cikulama, soni cikulimbangana!

Namani ali jwakusangalala. Jwalakwe akwawula kwa Elisa ni kumsalila kuti: ‘Sambano simicisye nditu kuti Mlungu jwa ku Yisalayeli ali Mlungu jusyesyene pacilambo cosope capasi. Sambano conde, apocele mtuka.’ Nambo Elisa akwanga kuti: ‘Iyayi, une ngambocela.’ Elisa akumanyilila kuti cikuŵe kulemwa kupocela mtukawo, ligongo Yehofa ni jwamposisye Namani. Nambo Gehasi, jwakutumicila jwa Elisa akusaka ali apocele mtukawo.

Sambano Gehasi akutenda ayi, pagambile kutyoka Namani, Gehasi akwawutucila ŵandu ŵala. Nikuŵeceta kuti: ‘Elisa andumile kuti nasalile jemanja kuti jwalakwejo apocele acalendo ni akusaka wine mwa mtuka ula.’ Nambo welewu waliji unami. Namani ngakumanyilila kuti yeleyi yili yakulambusya, ni jwalakwe akumpa Gehasi wine mwa mtuka wula.

Gehasi pawusile kunyumba, Elisa akumanyilila yatesile jwalakwe. Yehofa amsalile. Sambano Elisa akuŵeceta kuti: ‘Ligongo lyakuti mwatesile cindu cakusakala, matana ga Namani cigayice pa mmwejo.’ Ni ndaŵi jijojo gam’yicile.

Ana pelepa tukulijiganya cici? Candanda, tukusosekwa kuŵecetaga pakwamba ya Yehofa mpela kamwalika. Kutenda yeleyi kuli cindu cakamucisya. Caŵili, ngatukusosekwa kuŵa ŵandu ŵakupoka mpela mwaŵaŵelele Namani pandanda pala, nambo twapikanileje ŵakutumicila ŵa Yehofa. Soni catatu, tukalambusyaga mpela mwaŵatendele Gehasi. Ana ngaŵa mkulijiganya yejinji pamkuŵalanga Baibulo?