1, 2. Ana Yesu jwalosisye mwamtuli kuti ali jwakulongolela jwalunda?

 AWANICISYE kuti mundu jwakumanyilila cenene malo, akwalongolela paulendo wakuja kulola msinda wakutesya lung’wanu soni wakusalala. Msindawo uli wacilendo kwa wawojo soni kwa acimjawo ŵali nawo yalumo. M’yoyo akudalila yakwasalila jwakwalongolelajo. Paulendowu, wawojo ni acimjawo akusacilila kuti ayimanyilile yindu yakuti nganaŵe kuyiwona. Pakuwusya ya yinduyi, jwakwalongolelajo ngakwasalila mwacitema kwikana mpaka pa ndaŵi jakuŵajilwa. Jwalakwe akwasalila pakopocele pa malo payili yinduyo. Mkupita kwandaŵi, akutenda lung’wanu ni lunda lwa jwakwalongolelajo, ligongo akwasalila yindu yakusosekwa kumanyilila pandaŵi jakwe.

² Aklistu ŵasyesyene ali mpela ŵandu ŵali paulendoŵa. Tukusaŵaga ŵakusacilila kumanyilila ya msinda wakupunda misinda jakutesya lung’wanu, “msinda wa yilimbilimbi yakutamilicika,” wauli Ucimwene wa Mlungu. (Aheb. 11:10) Yesu paŵaliji pacilambo capasi, ŵalongolele ŵakumkuya ŵakwe kuti amanyilile cenene yakwamba Ucimwenewo. Nambo ana Yesu ŵajangaga ŵakumkuya ŵakweŵa yiwusyo yosope, soni kwasalila cilicose cakwamba Ucimwene wa Mlungu pandaŵi jimo? Iyayi. Jwalakwe jwatite, “Ngwete yindu yejinji yakuti namsalile, nambo sambano jino tiyimtupile mpaka ngapakombola kuyipikanicisya.” (Yoh. 16:12) Mpela jwakulongolela jwalunda mnope, Yesu nganiŵasalilaga ŵakulijiganya ŵakwe yindu yejinji yakuti ngamkanayipikanicisya pandaŵi jimo.

3, 4. (a) Ana Yesu apitilisye mwamtuli kwajiganya ŵandu ŵakulupicika pakwamba ya Ucimwene wa Mlungu? (b) Ana mu mtwe awuno citukambilane yamtuli?

³ Yesu ŵaŵecete maloŵe ga pa Yohane 16:12 pa cilo cakumalisya caumi wakwe pacilambo capasi. Panyuma pa ciwa cakwe, ana Yesu akapitilisye camtuli kwajiganya ŵandu ŵakulupicika yakwamba Ucimwene wa Mlungu? Jwalakwe ŵasimicisye ŵandumetume ŵakwe kuti, “Msimu wakusala yakuwona ya Mlungu . . . tucimlongolela mu yakuwona yosope yene.” a (Yoh. 16:13) Pelepa msimu weswela uli mpela mundu jwakulitimalika jwakwalongolela ŵandu kukulola malo. Yesu akusakamulicisya masengo msimu weswela mpela litala lyakwajiganyila ŵakumkuya ŵakwe yakwamba Ucimwene wa Mlungu, soni jwalakwe akusiŵajiganya pandaŵi jakuŵajilwa.

⁴ Sambano kwende tulole yawuŵele uli mkutenda msimu weswela wa Yehofa pakwakamucisya Aklistu ŵasyesyene kumanyilila cenene  yindu yakwamba Ucimwene. Candanda kwende tukambilane mutwapatile kwanga kwa ciwusyo cakuti, ‘Ana Ucimwene wa Mlungu watandite cakaci kulamulila?’ Kaneko citulole yakwamba acayimwene soni ŵandu ŵakulamulidwa ni Ucimwenewu. Citukambilanesoni cembeceyo cakwete ŵakulamulila soni ŵakulamulidwawo. Pambesi pakwe citulole muŵayimanyile ŵakumkuya Klistu yakusosekwa kutenda pakulosya kuti ali ŵakulupicika ku Ucimwene wa Mlungu.

5, 6. (a) Ana Ŵakulijiganya Baibulo ŵakwete nganisyo syakulemweceka syamtuli, pakwamba yakutamilikasidwa kwa Ucimwene soni masengo gagungula? (b) Ligongo cici nganisyo syakulemwecekasi nganisiŵa sitendekasisye kayicila kuti Yesu ŵalongolelaga ŵakumkuya ŵakwe?

⁵ Mpela mutwalijiganyicisye mu Mtwe 2 wa bukuji, twayiweni kuti kwa yaka yejinji Ŵakulijiganya Baibulo ŵaŵele ali mkusala kuti caka ca 1914 ciciŵa cakusosekwa mnope pakwanilisya yakulocesya ya m’Baibulo. Nambope, jemanjaji pandaŵijo ŵakulupililagasoni kuti kuŵapo kwa Klistu kwatandite mu 1874, soni kuti mu 1878 Klistu ŵalamulilaga ali kwinani. Jemanjaji ŵakulupililagasoni kuti Ucimwenewu ngasiwukola macili gosope mpaka mu October 1914. Ŵakulupililagasoni kuti ndaŵi jagungula jicitanda mu 1874 mpaka mu 1914, soni kuti jicimala ŵasagulwe pacacijawula kwinani. Ana nganisyo syakulemwecekasi mpaka situtendekasye kukayicila kuti Yesu ŵalongolelaga ŵakulupicikaŵa ni msimu weswela? Iyayi, nganituŵa tukayicile.

⁶ Kwende tuganicisyesoni ya cisyasyo cacili kundanda kwa nganiji. Ana ŵandu ŵakuja kukulola malo ŵala mpaka amkayicile jwakwalongolela jula ligongo lyakuti ngakwanga yiwusyo yawo mwacitema pandaŵi jakusaka jemanjajo? Iyayi nganaŵa amkayicile. Mwakulandana ni yeleyi, ndaŵi sine ŵandu ŵa Mlungu akusasacilila kumanyilila yindu yakwamba cakulinga ca Yehofa pandaŵi jakuti msimu weswela nganiwuŵe kwalongolela kuti apikanicisye usyesyenewo. Nambo yeleyi ngayikusalosya kuti Yesu ngakwalongolela jemanjajo. M’yoyo ŵandu ŵakulupicika akusaŵaga ŵakusacilila kwajongolela soni mwakulinandiya akusacengaga nganisyo syawo.—Yak. 4:6.

7. Ana ŵandu ŵa Mlungu ŵapikanicisye yiwundo yapi ya usyesyene?

⁷ Panyuma pa caka ca 1919, ŵandu ŵa Mlungu ŵaŵele ali mkupikanicisya cenene yiwundo ya usyesyene. (Aŵalanje Salimo 97:11.) Mu Sanja ja Mlonda jine ja mu 1925, mwakopwece ngani japajika ja mtwe wakuti “Kupagwa kwa Mtundu.” Nganiji jasasile maumboni gangasisika ga m’Malemba gakulosya kuti Ucimwene wa Umesiya wapagwile mu 1914. Yeleyi yakwanilisye yakulocesya yaŵayiweni Yohane m’mesomkulola ga pa Ciwunukuko mtwe 12. Yakulocesyayi yalosyaga jwamkongwe jwa Mlungu ali mkuŵeleka mwanace. b Nganijo jalosisyesoni kuti ngalwe soni yakusawusya yaŵatendelaga ŵandu ŵa Yehofa mu yaka ya ngondoyo, yaliji umboni wangasisika wakulosya kuti Satana ŵaliji ali amgwicisye pacilambo capasi kutyocela kwinani. Jwalakwe “ali jwaukali mnope ligongo akumanyilila kuti jigambile kumsigalila ndaŵi panandipe.”—Ciw. 12:12.

8, 9. (a) Ana Ucimwene wawonecele kuŵa wakusosekwa camtuli? (b) Ana ni yiwusyo yapi yacitukambilane?

⁸ Ana Ucimwenewu uli wakusosekwa camtuli? Mu 1928, Sanja ja Mlonda jatandite kugombelecesya kuti Ucimwenewu waliji wakusosekwa mnope kupundana ni cikulupusyo cetu cakupitila mu ciwombolo. Kusala yisyene, Yehofa caciswejesya lina lyakwe, kulosya kuti ali jwakuŵajilwa kulamulila soni kwanilisya yakulinga yakwe kwa ŵandu kupitila mu Ucimwene wa Umesiyawu.

 ⁹ Ana ŵani ŵacacilamulila ni Klistu mu Ucimwenewo? Soni ana Ucimwenewu ucilamulilaga ŵani pacilambo capasi? Ana ŵakumkuya Klistu akusosekwa kukamulaga masengo gamtuli?

10. Ana ŵandu ŵa Mlungu ŵamanyilile yamtuli pakwamba ya ŵa 144,000?

¹⁰ Yaka yejinji mkaniciyice caka ca 1914, Aklistu ŵasyesyene ŵapikanicisye kuti ŵakumkuya ŵakulupicika ŵa Klistu ŵa 144,000, cacilamulila yalumo ni Yesu kwinani. c Ŵakulijiganya Baibuloŵa ŵamanyilile kuti nambalaji jangali kugopolela kwine kwakwe, soni kuti ŵa 144,000 ŵeleŵa ŵatandite kwasonganganya mu yaka 100 yandanda.

11. Ana ŵandu ŵaŵajembeceyaga kuŵa likuga lyakulombedwa ni Klistuŵa, ŵapele masengo gamtuli gaŵasosekwaga kutenda paŵaliji pacilambo capasi?

¹¹ Ana ŵandu ŵaŵajembeceyaga kuŵa likuga lyakulombedwa ni Klistuŵa, ŵapele masengo gamtuli gaŵasosekwaga kutenda paŵaliji pacilambo capasi? Jemanjaji ŵayiweni kuti Yesu jwagombelecesye mnope ya masengo gakulalicila soni kuti masengoga galiji gakamulana mnope ni ndaŵi jagungula. (Mat. 9:37; Yoh. 4:35) Mpela mutwayiwonele mu Mtwe 2, Ŵakulijiganya Baibuloŵa ŵakulupililaga kuti ndaŵi jagungulaji jiciŵa ja yaka 40, soni jicimala ni kujigalidwa kwa ŵasagulwe kwawula kwinani. Nambo ligongo lyakuti masengoga gapitilisye panyuma pa yaka 40, nikuti Ŵakulijiganya Baibuloŵa ŵasosekwaga kupikanicisyasoni cenene nganiji. Sambano tukumanyilila kuti ndaŵi jagungula jili ndaŵi jakulekanganya tiligu ni namsongole. Kweleku kuli kwalekanganya Aklistu ŵasagulwe ni Aklistu ŵaunami soni kuti ndaŵi jagungulaji jatandite mu 1914. Sambano jakwanile ndaŵi jakuti asonganganye ŵasagulwe ŵakusigalila paciŵalanjiloci.

12, 13. Ana yitagu ya Yesu yakwamba aciŵali likumi soni mbiya yikwanilicikwa mwamtuli m’masiku gambesi?

¹² Kutandila mu 1919 kwawula msogolo, Yesu Klistu jwajendelecele kukamucisya kapolo jwakulupicika ni jwalunda kuti alimbikasyeje masengo gakulalicila. Yesu jwapelesoni masengoga ŵakumkuya ŵakwe ŵa mu yaka 100 yandanda. (Mat. 28:19, 20) Jwalakwe jwasasilesoni ya ndamo syakusosekwa kola ŵakumkuya ŵakwe ŵasagulwe kuti apakombole kukamula masengoga. Ana jwalakwe jwasasile yeleyi camtuli? Mu citagu cakwe ca aciŵali likumi, jwalakwe jwalosisye kuti ŵasagulwe cacisosekwa kwendelecela kuŵa mesope mwausimu kuti cakasimanikwe pa cisangalalo cekulungwa ca ulombela kwinani. Muyakutendekwa yakwinaniyi, ŵasagulwe ŵakulupicikaŵa mwalitala line, ali mpela jwamkongwe jwakwinani jwaulombela, jwali  ŵa 144,000. (Ciw. 21:2) Kaneko mucitagu cakwe ca mbiya, Yesu ŵasasile kuti ŵasagulwe cacisosekwa kamula mwakulimbicila masengo gakulalicila gaŵapele.—Mat. 25:1-30.

¹³ Mu yaka 100 yipiteyi, ŵasagulweŵa alosisye kuti aŵele mesope mwausimu soni kuti aŵele ŵakulimbicila masengo gakulalicila. Mwangakayicila jemanjaji cacipocela malipilo ligongo lyakuŵa kwawo mesope mwausimu. Nambo ana cakulinga ca masengo gekulungwa gagungulaga caliji kwamba kusonganganya ŵasagulwe ŵakusigalila ŵa 144,000, ŵele cacilamula yimpepe ni Yesu basi?

14, 15. Ana makuga mcece gapi gaŵagakolasile m’buku jetu jine?

¹⁴ Acalume soni acakongwe ŵakulucipicika aŵele ali mkola lung’wanu lwakusaka kulimanyilila “likuga lya ŵandu ŵangaŵalanjika” lyakulikolanga pa Ciunukuko 7:9-14. Ni ligongo lyakwe Yesu mkaniŵakamucisye kumanyilila yakwamba likugali, yaliji yangasimonjesya kuti ŵanduŵa ŵaŵecetaga yejinji yakulekangana ni usyesyene wakwamba likugali.

¹⁵ Mu caka ca 1917, buku jetu jine (The Finished Mystery) jasasile kuti pana “makuga gaŵili gagacijawula kwinani, soni makuga gaŵili gagacikulupuka ni kuŵa pacilambopa.” Ana ŵani ŵaŵapanganyisye makuga mcece ga ŵandu ŵakukola yembeceyo yakulekanganaŵa? Likuga lyandanda lyaliji lya ŵa 144,000, ŵacacilamulila yalumo ni Klistu. Lyaŵili, lyaliji lya ŵandu ŵangaŵalanjika. Pandaŵiji ŵaganisyaga kuti likuga lyaŵilili lili ŵandu ŵaŵaliji ciŵela mu dini syasikusalikolanga kuti sili sya Ciklistu. Ŵanduŵa ŵakwete cikulupi, nambo nganiciŵa cakwanila kuti atendeje yindu mwakulupicika. M’yoyo, paligongo lyeleli cacipedwa udindo wakutuluka kwinani. Likuga lyatatu ŵaganisyaga kuti lili ŵakutumicila ŵakala mpela Abulahamu, Mose, soni ŵane, ŵacaciŵa pacilambo capasi ni kukola udindo wakwalolela ŵa m’likuga lyamcece lyalili ŵandu ŵacaciŵa pasi pa Ucimwene pacilambopa.

16. Ana usyesyene wapi wawamanyice mu 1923 soni mu 1932?

¹⁶ Ana msimu weswela wakamucisye camtuli ŵakumkuya Klistu kupikanicisya usyesyene watukusangalala nawo masiku aganowu? Usyesyenewu ŵawupikanicisye mwapanandipanandi. Kutandila m’caka ca 1923, Sanja ja Mlonda jatandite kusala ya ŵandu ŵanganakola cembeceyo cakwawula kwinani kuti cacitamaga pacilambo capasi mu ulamusi wa Klistu. Mu 1932, Sanja ja Mlonda jasasile ya Yonadabu juŵakamulene ni Yehu, Mwenye jwa Aisalaeli pakuputa ngondo jakulimbana ni kulambila kwawunami. (2 Ayi. 10:15-17) Nganiji jasasile kuti pana likuga lya ŵakutumicila Mlungu ŵa masiku agano ŵali mpela Yonadabu. Nganijo jajendelecele kuti Yehofa cacilikulupusya likugali pa “ngondo ja Alamagedo” kuti cilitame ni umi pacilambo capasi.

17. (a) Ana usyesyene wakusosekwa wapi wawamanyice mu 1935? (b) Ana Aklistu ŵakulupicika ŵapikene uli ali amanyilile yakwamba likuga lya ŵandu ŵangaŵalanjika? (Alole libokosi lyakuti “Mitima Jatemi Mmalo.”)

¹⁷ Nambo mu 1935, ŵandu ŵapikanicisye cenene ciwundo ca usyesyeneci. Pamsongano wawatendecele mumsinda wa Washington, D.C., likuga lya ŵandu ŵangaŵalanjika lyamanyice kuŵa ŵandu ŵakwete cembeceyo cakutama ni umi pacilambo capasi. Ŵapikanicisyesoni ya ngondolo syaŵasikolasile Yesu m’citagu cakwe ca ngondolo ni mbusi. (Mat. 25:33-40) Likuga lya ŵandu ŵangaŵalanjikali, liciŵa  mbali ja “ngondolo sine” syele Yesu ŵatite, “Une nguŵajilwa kusisonganya nombe nasyo.” (Yoh. 10:16) M’bale J F. Rutherford, pakuŵeceta ngani pamsonganowu, jwatite, “Tukwaŵenda ŵandu wosope ŵakwete cembeceyo cakutama ni umi pacilambo capasi kuti ajime.” Ciŵandika hafu ja ŵanduwo ŵajimi. M’balejo jwatite, “Alole!, Likuga lya ŵandu ŵangaŵalanjika!” Ŵandu ŵajinji ŵayamicile mnope ligongo lyakupikanicisya ya cembeceyo cakwete kusogolo.

18. Ana ŵakumkuya ŵa Klistu ŵaŵisile camtuli nganisyo syawo pamasengo gakulalicila, soni yakuyicisya yakwe yiŵele yamtuli?

¹⁸ Kutandila pandaŵiji, Klistu aŵele ali mkwakamucisya ŵandu ŵakwe kuti aŵiceje mnope nganisyo pamasengo gakwasonganganya ŵandu ŵa m’likuga lyangaŵalanjika ŵacacikulupuka pa yisawusyo yakogoya. Pandanda yawonekaga mpela kuti masengoga ngagajenda cenene. Mwamti M’bale Rutherford jwayikene pakuŵeceta kuti, “Yikuwoneka kuti ‘likuga lya ŵandu ŵangaŵalanjikali’ ngaliŵa lyekulungwa mnope.” Nambope kusala yisyene, tukumanyilila kuti Yehofa aŵele ali mkujaliwa mnope masengo gagungulaga. Ni cikamucisyo ca Yesu soni msimu weswela, ŵasagulwe soni ‘ŵangondolo sine,’ sambano aŵele “likuga limo” lyakulongoleledwa ni “mkucinga jumo” mpela muŵaŵecetele Yesu.

19. Ana mpaka tujigale nawo mbali camtuli kuti likuga lya ŵandu ŵangaŵalanjika lipitilisye kukula?

¹⁹ Ŵandu ŵajinji ŵakulupicika cacitama ni umi pacilambo capasi ca paladaiso mwakulamulidwa ni Klistu soni acimjakwe ŵa 144,000. Kusala yisyene yili yakusangalasya kuti Klistu aŵele ali mkwalongolela ŵandu ŵa Mlungu kuti apikanicisye cenene cembeceyo ca m’Malemba ca msogolo. Uli upile wekulungwa kwasalila ŵane ya cembeceyoci patuli mu undumetume. Naga yindu yili cenene paumi wetu, kwende tujigaleje nawo mbali mwakwanila pakusaka kuti likuga lya ŵandu ŵangaŵalanjikali lijendelecele kula, kuti lina lya Yehofa, licimbicikwe mnope.—Aŵalanje Luka 10:2.

20. Ana likuga lya Satana lipanganyidwe ni mbali syapi, soni ana tukusalosya camtuli kuti tuli wakulupicika ku Ucimwene wa Mlungu?

²⁰ Ŵandu ŵa Mlungu paŵajendelecelaga kulijiganya yakwamba Ucimwenewu, ŵasosekwagasoni kupikanicisya cenene yayikusagopolela kuŵa ŵakulupicika ku boma jakwinaniji. Panganiji, m’caka ca 1922, Sanja ja Mlonda jasasile kuti pana makuga gaŵili. Likuga lya Yehofa soni lya Satana. Likuga lya Satana lipanganyidwe ni ŵamalonda, ŵadini, soni ŵandale. M’yoyo ŵandu ŵakulupicika ku Ucimwene wa Mlungu akusosekwa kuŵambala kwinjilila mbali sya Satanasi. (2 Akoli. 6:17) Ana yeleyi yigopolela cici?

21. (a) Ana kapolo jwakulupicika jwakamucisye mwamtuli ŵandu ŵa Mlungu pangani ja malonda? (b) Ana Sanja ja Mlonda jasasile yamtuli yakwamba “Babiloni Jwamkulungwa” m’caka ca 1963?

²¹ Ndaŵi ni katema, kapolo jwakulupicika ni jwalunda aŵele ali mkusala ya cinyengo cacikusatendekwa ni ŵa malonda soni aŵele ali mkalamusya ŵandu ŵa Mlungu yakusosekwa kwa kuŵambala mtima wakunonyela mnope yipanje. (Mat. 6:24) Konjecesya pelepa, mabuku getu gaŵele gali mkutukamucisya kumanyilila cenene kuti dini syaunami sili mbali ja likuga lya Satana. M’caka ca 1963, Sanja ja Mlonda jasasile cenene kuti “Babiloni Jwamkulungwa” ngakwamba kwimila dini syasikusalikolanga kuŵa syaciklistu, nambosoni akwimila ucimwene wacilambo cosope wa dini syaunami. M’yoyo, tucilijiganya yejinji ya nganiji mu Mtwe 10 wa bukuji. Tucilola yalitite likuga lya Mlungu pakwakamucisya ŵandu ŵa Mlungu m’cilambo cilicose kuti  ‘akopoce mu msindamo, kapena kuti mwa jwalakwe,’ soni kuti alece ndamo jilijose jakukamulana ni dini syaunami.—Ciw. 18:2, 4.

22. Pangondo jandanda ja pacilambo cosope, ana ŵandu ŵa Mlungu ŵamanyilile yamtuli pakwamba ya maloŵe ga pa Aloma 13:1?

²² Nambi uli pakwamba ya mbali ja ndale ja cilambo ca Satanaci? Ana Aklistu ŵasyesyene akusasosekwa kujigala mbali pa maukangani soni ngondo sya m’cilamboci? Pa ngondo jandanda ja pacilambo cosope, Ŵakulijiganya Baibulo ŵamanyililaga kuti ŵakumkuya Klistu nganasosekwaga kuwulaga mundu mjawo. (Mat. 26:52) Nambope kwa ŵajinji, maloŵe ga pa Aloma 13:1 gakuti ŵapikanileje “acakulungwa ŵakulamulila” gagopolelaga kuti akusosekwa kwinjila usilikali, kuwala yunifolomu ja usilikali, soni kujigala yida ya ngondo. Nambope palamulidwe kuti amgombele mmagongo jwawo, ŵasosekwaga kugombela mwinani.

23, 24. (a) Ana likuga lyetu lyamanyilile yamtuli pakwamba ya maloŵe ga pa Aloma 13:1 pandaŵi ja ngondo jaŵili ja pacilambo cosope capasi? (b) Ana msimu weswela wakamucisye ŵakumkuya Klistu kupikanicisya cici?

²³ Ngondo jaŵili ja pacilambo cosope pajatandaga mu 1939, Sanja ja Mlonda jalondesisye mnope ya ungajinjilila mu yam’cilambo. Nganiji jasasile mwakupikanika kuti Aklistu nganasosekwaga kujigala mbali m’maukangani soni ngondo sya m’cilambo ca Satanaci. Gelegatu galiji maloŵe gapandaŵi jakwe. Pelepa, ŵakumkuya Klistu ŵaŵambele magambo gekulungwa ga miyasi gaŵakwete ŵandu pangondoji. Nambope kutandila mu 1929, mabuku getu gaŵele gali mkusala kuti acakulungwa ŵakulamulila ŵakwakolanga pa Aloma 13: 1, nganaŵa ŵakulamulila ŵa maboma gacilamboci, nambo ŵaliji Yehofa ni Yesu. Pelepa yalosisye kuti ŵaliji mkanalipikanicisye cenene lilembali.

²⁴ Mu 1962, msimu weswela wakamucisye ŵakumkuya Klistu kulipikanicisya cenene lilembali. Ngani syapajika syakulondesya Aloma  13:1-7 syalembedwe mu Sanja ja Mlonda ja November 15 ni December 1 m’cakaci. Pambesi pakwe ŵandu ŵa Mlungu ŵapikanicisye kuti ciwundo cakuti twapikanileje acakulungwa ŵakulamulila cana malile gakwe mwakamulana ni maloŵe gakumanyika cenene ga Yesu gakuti, “Mpeleceje kwa mwenye yakwenela kupeleka kwa mwenye, soni mpeleceje kwa Mlungu yayili yakwe ya Mlungu.” (Luk. 20:25) Aklistu ŵasyesyene sambano akusamanyilila kuti acakulungwa ŵakulamulila ŵakusosekwa kuti Aklistu ŵapikanileje ali ŵakulamulila ŵa maboma ga cilamboci. Nambope kupikanilako kwana malile gakwe. Yeleyi yikusatendekwa naga ŵakulamulila ŵa boma akutuŵenda kutenda yindu yampaka yitutendekasye kuti tukampikanila Mlungu. Yeleyi payitendekwe tukusajanga mpela muŵajanjile ŵandumetume kala kuti, “Tukwenela kumpikanila Mlungu kupunda kupikanila mundu.” (Mase. 5:29) Mu Mtwe 13 ni 14 wa bukuji, tucilijiganya yatesile ŵandu ŵa Mlungu pakuya ciwundo cakuti Aklistu ŵangajinjililaga nawo ya m’cilambo.

25. Ana akusayamicila camtuli yawukusatenda msimu weswela pakwakamucisya kupikanicisya Ucimwene wa Mlungu?

²⁵ Aganisye yindu yejinji yalijiganyisye ŵakumkuya Klistu mu yaka 100 yipiteyi yakwamba Ucimwene wa Mlungu. Tulijiganyisye ya ndaŵi jele Ucimwene wa Mlungu ŵawutamilikasisye kwinani soni kusosekwa kwa Ucimwenewu. Tupikanicisye cenene ya ŵandu ŵakulupicika ŵakwete cembeceyo cakwawula kwinani, soni ya ŵandu ŵakwete cembeceyo cakutama ni umi pacilambo capasi. Nambosoni tukumanyilila yampaka tutende pakulosya kulupicika kwetu ku Ucimwene wa Mlungu, pandaŵi jijojo tuli mkwapikanila mwakuŵajilwa ŵakulamulila ŵa cilamboci. M’yoyo aliwusye kuti, ‘Ana ngawumanyilile usyesyenewu yikaŵe kuti Yesu Klistu nganalongolelaga kapolo jwakulupicika pacilambo capasi kuti ayipakanicisye yeleyi ni kwajiganya ŵandu?’ Kusala yisyene uli upile wekulungwa kuti tukulongoleledwa ni Yesu soni msimu weswela.