Mwanace jwa Sukulu Lummalile Lunda
Peter akulinjilila kutamilicika pampando wakwe, nambo mtima wakwe nganiwuŵa m’malo. Aticala ŵakwe ŵakongwe ŵakusiŵacimbicisya mnope agambile kumalisya kwene kwiganya kuti yaŵalembile Charles Darwin kupitila mu cijiganyo cakwe cakuti yaumi yatesile kucenga kutyocela ku yindu yine, yikamucisye ŵandu kupikanicisya cenene yakwamba sayansi, soni yagopwele ŵandu ku yikulupi yaunami. Kaneko mticalaju akwasalila ŵanace ŵa sukuluŵa kuti nombe nawo asale nganisyo syawo panganiji.
Peter lummalile lunda. Acinangolo ŵakwe ŵamjiganyisye kuti Mlungu ni juŵapanganyisye cilambo capasi kupwatikapo yaumi yosope. Ŵamjiganyisyesoni kuti ngani ja m’Baibulo jakusala kuti Mlungu ni juŵapanganyisye yindu jili jisyesyene, soni cijiganyo cakuti yaumi yacenjile kutyocela ku yindu yine cili cangali maumboni. Aticalaŵa soni acinangolo ŵakwe akusamsosela yambone. Nambo ana pelepa Peter akusosekwa kwakulupilila ŵani?
Pacilambo cosope, ŵanace ŵa sukulu ŵajinji caka cilicose akusasimana ni yindu mpela yeleyi. Ana Peter soni ŵanace wosope ŵakusimana ni yeleyi akusosekwa kutenda cici? Ana ngakwiticisya kuti jemanjaji akusosekwa kuwungunya maumboni kuti amanyilile yakutenda pa nganiji? Jemanjaji akusosekwa kuwungunya maumboni gakulosya kuti yaumi yatesile kucenga kutyocela ku yindu yine, soni naga yili yisyene kuti Mlungu ni juŵapanganyisye yindu yosope. Panyuma pakulola maumboniga ŵanacewo akusosekwa kusagula jika yampaka ayikulupilile.
Pajasoni Baibulo jikusatusalila kuti tukusosekwa kulupililaga yindu yakwiganya ŵandu ŵane panyuma pakuti tupatile maumboni gakulosya kuti yakwiganyayo yili yisyene. Baibulo jikusasala kuti, “Mundu jwangamanyilila yindu akusagamba kulupilila yiliyose, nambo jwakalamuka akusaganicisyaga mwakwendela.” (Miyambo 14:15) Baibulo jikusijalimbikasya Aklistu kuti akamulicisyeje masengo ‘lunda lwawo lwakuganisya’ kuti akomboleje kumanyilila cenene yindu yakwiganyidwa.—Aloma 12:1, 2.
Kabukuka nganikalinganyidwa ni cakulinga cakuti kakamucisye makuga ga dini gagakusasaka kuti m’masukulu ajiganyejemo yakuti yaumi yatesile kucenga kutyocela ku yindu yine. Cakulinga ca kabukuka cili kuwungunya yakusasala ŵandu ŵakusajiganya kuti umi wagambile kusimanikwa mwangosi soni ŵakwete nganisyo syakuti ngani ja m’Baibulo jakusala ya kupanganyidwa jigambile kuŵa adisi.
Citutagulilane mnope ya selo ligongo ni papakusatyocela umi. Calijiganye mwagakusapanganyidwila maselo mwakusimonjesya mnope. Nambosoni pakuŵalanga kabukuka aloleje maumboni gakulekanganalekangana gakusasala ŵandu ŵakusajiganya kuti yaumi yatesile kucenga kutyocela ku yindu yine.
Cinga apano kapena kusogolo, wosopewe tukusosekwa kuliwusya kuti, Ana yaumi yatesile kupanganyidwa, kapena yagambile kusimanikwa mwangosi? Tukukulupilila kuti m’kabuku kandanda kala ngani jeleji ajitagulile cenene kwabasi. Kabuku akano kakutagulila gane mwa maumboni gagatendekasisye kuti ŵandu ŵane atande kulupilila kuti yaumi yatesile kupanganyidwa.
