NGANI JA DAMI

Baba ŵagambile kutanda kupaca ya mtwe. Nambo piyagundice mnope, mama ŵaŵilasisye ambulasi. Ngusakumbucila adokotala ali mkwajigala baba. Nganimanyililaga kuti jeleji jaliji ndaŵi jakumalisya kwawona baba ali cijumi. Panyuma pa masiku gatatu, baba ŵangu ŵawile ni ulwele wakuyimba mitasi. Pandaŵiji naliji ndili ngwete yaka 6.

Kwa yaka yejinji, nalijimbaga magambo ligongo lya ciwa ca baba. Nagambaga kumbucila adokotala ali mkwajigala baba, soni naliwusyaga kuti, ‘Ligongo cici pandaŵijo nganindendapo kandu?’ Panawonaga acakulungwa ali mkulagasika ni yilwele, naliwusyaga kuti, ‘Wuli jemanjaji ali ciŵela umi, nambo baba ŵawile?’ Pali papite ndaŵi, mama ŵangamucisye kuti sale munapikanilaga mumtima. Pakuŵa tuli Mboni sya Yehofa, ŵandu ŵa kumpingo kwetu ŵatukamwile mkono.

Ŵandu ŵane akusaganisya kuti mlongo mjenu pajasice mpaka mlile, kaneko canasa cosope ni kumala mwacitemacitema. Nambo nganiyiŵa m’yoyo kwa uneji. Pandaŵijo nganingola canasa mnope, nambo panakusile panandi cangamwile mnope.

Maloŵe gangu kwa mwanace jwalijose jwele nangolo jwakwe jwajasice gali gakuti, “Mumsalileje mundu jwine mwamkupikanila mumtima. Kwasalila ŵane mwacitemacitema, mpaka kumkamucisye kunandiya canasa.”

Yili yakupweteka kukulaga uli wangali baba. Nambo yaŵalagwisye Mlungu pa lilemba lya Ciunukuko 21:4 yikusandamika mtima pasi. Lilembali likusati pacangakaŵapa Mlungu “cacipukuta misosi josope mmeso [mwetu], soni ciwa ngasicipagwasoni. Ngasipapagwasoni kulila, kuwuwula kapena kupikana kupweteka.”

NGANI JA DERRICK

Yindu yakusangalasya yangusakumbucila mnope yili kuloposya somba soni kwawula kwitumbi yimpepe ni baba. Baba ŵaganonyelaga mnope matumbi.

Baba ŵalagaga ni ulwele wamtima. Ngusakumbucila kaŵili kose ndili mwanace pinapite kukwalola kucipatala. Nambo nganimanyililaga kupweteka kwa ulwelewu. Baba ŵajasice ndili ni yaka 9.

Baba paŵajasice, nalisile mnope. Yambwetece mnope, mwamti nganisakaga kuŵecetana ni jwalijose. Nganimbikaneje camti m’yiyi cipagwile soni nganisakaga kutenda cilicose. Ŵanace ŵa m’kakuga ketu ka kucalici ŵayikaga kukundondoya, nambo kaneko ŵalesile. Ŵandu ŵasalaga yindu mpela  yakuti, “Ndaŵi ja baba ŵenu jakwanile” kapena “Mlungu ŵajigele” kapena “Apano ali kwinani.” Yaŵaŵecetaga ŵanduyi nganiyingamulaga mtima, nambo nganimanyililaga yajikusasala Baibulo pangani syelesi.

Kaneko mama ŵatandite kulijiganya Baibulo ni Ŵamboni sya Yehofa. Pali papite ndaŵi, une ni akuluŵangu twanditesoni kulijiganya Baibulo. Twalijiganyisye cacikusamtendecela mundu pawile soni cilanga ca Mlungu cakwamba kwimusya ŵawe. (Yohane 5:28, 29) Lilemba lyalyangamucisye mnope lyaliji lya Yesaya 41:10. Pa lilembali Mlungu akuti, “Mkasimtenda woga, pakuŵa ndili namwe. Mkasimdandawula, pakuŵa ndili Mlungu jwenu. Cinamlimbisye, soni cinamkamucisye.” Kumanyilila kuti Yehofa ali ni une kwangamucisye mnope pandaŵi jakusawusyaji, mwamti kukungamucisyape mpaka apano.

NGANI JA JEANNIE

Mama ŵawile ni ulwele wakansa ndili ni yaka 7. Kwa une, yaliji mpela ngusagamila. Ngukumbucila kuti ŵawilile kunyumba, mwanja anganga ali papopo. Jwalijose jwagambile kuŵa jii. Ngukumbucilasoni kuti yakulya ya ligulo ya palisikuli yaliji mandanda. Nalipikanaga kuti cilicose cicenjile.

Kutandila pandaŵiji mpaka yaka yine pasogolo pakwe, naganisyaga kuti ngwamba kusosekwa kulimba mtima kuti namsamalileje mpwanga. M’yoyo nganinamsalila jwalijose mwanapikanilaga. Mpaka apano, jwanganonyela kwasalila ŵane yayikumbweteka mumtima. Nambope, yeleyi mpaka yitandikasye yakusawusya yejinji.

Ngukumbucila cinonyelo caŵatulosisye Ŵamboni sya Yehofa acimjetu. Atamose twaliji tuli tutandite kwene kusongana ni Ŵamboni, nambope ŵamboniwo nganasoŵaga kumangwetu. Yagambaga kuŵa mpela twaŵele liŵasa limpepe kwa yaka yejinji. Ngangukumbucila naga baba ŵatutelecelaga yakulya ya ligulo, ligongo acimjetuŵa ŵayikaga nayo ligulo lililyose.

Lilemba lyangusalikumbucila mnope lili lya Salimo 25:16, 17. Pa lilembali jwamasalimo jwam’ŵendile Mlungu kuti, “Angalawucile une, ni kundendela canasa. Ligongo ndili jikajikape soni pangali jwakungamucisya. Yisawusyo ya mumtima mwangu yitupile. Andyocesye yipwetesi yangu.” Yili yakusangalasya kumanyilila kuti patusimene ni yakusawusya ngatukusaŵa jika. Mlungu akusaŵa ni m’weji. Ni cikamucisyo cakutyocela m’Baibulo, yindu yatandite kunjendela cenene. Natanditesoni ganicisya yindu yakulimbikasya, mpela ya cembeceyo ca kwimuka kwa ŵawe. Ngwete cembeceyo cakuti cinjawonasoni mama ali ŵamlama m’paladaiso pacilambo capasi.—2 Petulo 3:13.

Ana akusaka kulijiganya yejinji pakwamba ya utenga wakutondoya wa m’Baibulo? Tukwaŵenda kuti ajigale mwalulele kabuku kakuti “Pamene Munthu Amene Mumakonda Amwalira.” Ajawule pa www.pr418.com/ny, ni kulola palembile MABUKU › MABUKU.