Mwambone, kwende tulole yindu yine mwa yeleyi:

• “Mtundu ucijimucilana ni mtundu wine, soni ucimwene ucijimucilana ni ucimwene wine. Kuciŵa sala, soni yisicinya m’malo gakulekanganalekangana.”—Matayo 24:7.

• “Masiku gambesi gaciŵa ndaŵi japajika soni jakusawusya. Pakuŵa ŵandu caciŵa ŵakulinonyela, ŵakunonyela mbiya, ŵakulikwesya, ŵakunyosya, ŵangapikanila acinangolo ŵawo, ŵangayamicila, ŵangakulupicika, ŵanganonyela ŵacinasi ŵawo, ŵangakamulana ni acimjawo, ŵakulambusya, ŵangaligosa, ŵakogoya, ŵanganonyela yambone, ŵaciswamba, ŵangapikana ya ŵane, ŵakulitulumbasya soni ŵakupoka, ŵakunonyela yakusangalasya mmalo mwakumnonyela Mlungu.”—2 Timoteo 3:1-4.

Yindu yeleyi ni yayikutendekwa pacilambopa, ni ligongo lyakwe ŵandu ŵane akuganisya kuti cilamboci cikwawula soni pangali cilicose campaka mundu atende. Yili yisyene kuti ŵandu nganaŵa akombwele kumasya yakusawusya yayikutendekwa pacilambopa. Baibulo jikusasala kuti mundu nganakola lunda soni macili gakupakombola kumasya yeleyi. Malemba gakuyicisyaga gakulosya yeleyi:

• “Pana litala lyakuwoneka mpela lyagoloka kwa mundu, nambo mbesi jakwe jili ciwa.”—Miyambo 14:12.

• ‘Mundu akusampweteka mjakwe pakumlamulila.’—Mlaliki 8:9.

• “Mundu . . . nganaŵa akombwele kulondesya kajende kakwe.”—Yeremiya 10:23.

Yikaŵe kuti Mlungu ngakusamala ya cilamboci, mwangakayicila ŵandu akakombwele kucijonanga. Nambope jwalakwe nganaŵa akundile yeleyi. Ligongo cici? Baibulo jikusasala kuti:

• Mlungu “ŵacitamilikasisye cilambo capasi payilimbilimbi yakulimba, ngasicitenganyika mpaka kalakala.”—Salimo 104:5.

• “Mpago ukusamala ni kwika wine, Nambo cilambo capasi cicitama mpaka kalakala.”—Mlaliki 1:4.

• “Ŵakulungama cacipocela cilambo capasi. Ni cacitamaga mwelemo kwandaŵi syosope.”—Salimo 37:29.

• “Pacilambo capasi paciŵa tiligu jwamjinji. Pacanya pa matumbi paciŵa tiligu jwamjinji.”—Salimo 72:16.

Malemba ga m’Baibulo gelega, gakulosya mwangapita mumbali kuti ŵandu nganaŵa  akombwele konanga cilambo soni yindu yosope. Ŵandu wosope ngaŵa mkumala kuwa ligongo lya konasika kwa lipuje soni yindu yine, kusoŵa kwa yakulya soni mesi gambone, kapenasoni ligongo lya milili ja yilwele yakulekanganalekangana. Mlungu nganaŵa akundile kuti ŵandu apyajile cilambo cosopeci ni ngondo ja nyukiliya. Ligongo cici tukuti m’yoyo? Ligongo lyakuti Mlungu akusaka kuti cilamboci citame mpaka kalakala. Mlungu akundile kuti ŵandu atendeje yakusaka yawo. Nambope yakusaka yawoyi yitendekasisye ŵandu kuti asimaneje ni yakusawusya. (Agalatia 6:7) Cilamboci nganiciŵa mpela sitima japamkuli, jakwamba kulijendela jika mwamti jisigele panandi kutenda ngosi. Mlungu ngasakunda kuti ŵandu ajendelecele kutenda yindu yakuliwulasya.—Salimo 83:18; Ahebeli 4:13.

Mlungu cacitenda yejinji kusogoloku. Jwalakwe caciyikasya “mtendele wejinji.” (Salimo 37:11) Yindu yakusangalasya yatutagulilene mungani ajino, yili yine mwa yindu yejinji yakusalijiganya Ŵamboni sya Yehofa pakwamba ya msogolo kutyocela m’Baibulo.

Mboni sya Yehofa lili likuga lya ŵandu ŵakutyocela m’mitundu josope ja pacilambo capasi soni ali ŵamisingu jakulekanganalekangana. Mwakamulana ni yajikusasala Baibulo, jemanjaji akusalambila Mlungu jusyesyene lina lyakwe Yehofa. Ngakusajogopa yamsogolo ligongo Baibulo jikusasala kuti, ‘Yehofa, juŵapanganyisye kwinani, Mlungu jusyesyene, juŵapanganyisye cilambo capasi ni kucitamilikasya, nganagamba kucipanganya pali pangali cakulinga cilicose, jwalakwe ŵacipanganyisye ni cakulinga cakuti ŵandu atamejemo.’—Yesaya 45:18.