YAKUSAŴECETA ŴANDU ŴANE

Ŵandu ŵajinji ŵakusalikolanga kuti ali Aklistu, akusakulupilila kuti lina lya Mlungu lili Yesu. Ŵane akusasala kuti Mlungu Jwamaciligose ali jumo basi, m’yoyo pangali ligongo lyakamulicisya masengo lina lyakwe lisyesyene. Nambope ŵandu ŵane akusasala kuti kamulicisya masengo lina lisyesyene lya Mlungu nganikuŵa kwakuŵajilwa.

YAJIKUSASALA BAIBULO

Lina lya Mlungu Jwamaciligose nganiliŵa Yesu. Atamose Yesujo jwasalile ŵakulambila acimjakwe kuti apopeleje kwa Mlungu kuti, “Atati, lina lyawo liswejesyedwe.” (Luka 11:2) Jwalakwesoni ŵapopesile kwa Mlungu kuti, “Atati, acimbicisye lina lyawo.”—Yohane 12:28.

M’Baibulo, Mlungu msyene ŵasasile kuti “Une ndili Yehofa, Lyelelyo ni lina lyangu, soni pangali jwalijose jucinjimpa lumbili lwangu.” (Yesaya 42:8) Lina lyakuti “Yehofa,” ŵaligopolele kutyocela ku yilembo mcece ya Cihebeli yakwimila lina lya Mlungu, YHWH. Lina lyeleli likusasimanikwa ndaŵi ciŵandika 7,000, m’Malemba Gacihebeli. * Yeleyi yili yakulekangana ni mwayiŵelele ni mena ga ucimbicimbi gakuti “Mlungu,” “Jwamaciligose,” kapena “Ambuje.” Nambosoni likusasimanikwa ndaŵi syejinji kupunda mena mpela Abulahamu, Mose, kapena Daudi.

Pangali palipose pakusalekasya m’Baibulo kamulicisya masengo linali mwaucimbicimbi. Mmalo mwakwe, Malemba gakusalosya kuti ŵakutumicila ŵakala ŵaliji ŵagopoka kamulicisya masengo linali. Ŵapagasoni ŵanace ŵawo mena gakola lina lya Yehofa. Mwambone, lina lyakuti Eliya likusagopolela kuti “Mlungu Jwangu Ali Yehofa,” soni lina lyakuti Sekaliya likusagopolela kuti, “Yehofa Atukumbucile.” Ŵaliji ŵagopokasoni kamulicisya masengo lina lya Mlungu pakuŵecetana.—Rute 2:4.

Mlungu akusasaka kuti tukamulicisyeje masengo lina lyakwe. Baibulo jikusatulimbikasya kuti ‘tum’yamicileje Yehofa, soni tuŵilanjileje pa lina lyakwe.’ (Salimo 105:1) Mlungu akusiŵamanyilila soni kusangalala ni ŵandu ‘ŵakusaganicisya ya lina lyakwe.’—Malaki 3:16.

Ŵalijiganye ŵane akusakulupilila kuti m’Cihebeli, lina lya Yehofa likusagopolela kuti, “Akusatendekasyaga.” Maloŵega, gakulosya kuti Mlungu mpaka alitendekasye kapena kutendekasya cakupanganyikwa cakwe kuŵa cindu cilicose cakusaka kuti akwanilisye lisosa lyakwe. Pangali jwine jwampaka atende yeleyi kulekapo Mkupanganya Jwamaciligose, Yehofa.

UMBONE WAKUMANYILILA LINA LYA MLUNGU

Kumanyilila lina lya Mlungu mpaka kucenje kaganisye kawo. Yiciŵasoni yangasawusya kumŵandicila Mlungu. Kusala yisyene, nganiyiŵa yikombolece kuŵa paunasi ni mundu jwakuti ngakummanyilila lina lyakwe. Ni ligongo lyakwe Mlungu ŵasasile ya lina lyakwe ni lisosa lyakuti tumŵandicileje.—Yakobo 4:8.

Caciŵasoni ŵakusimicisya kuti Mlungu cacikwanilisya lisosa lyakwe mwakamulana ni ngopolelo ja lina lyakwe. Ni ligongo lyakwe Baibulo jasasile kuti, “Ŵandu ŵakumanyilila lina lyawo cacakulupilila.” (Salimo 9:10) Cacikola cikulupi celeci pakulijiganya kukamulana kwa lina lya Yehofa ni ndamo syambone syakwete mpela, cinonyelo cisyesyene, canasa, soni cilungamo. (Eksodo 34:5-7) Kumanyilila kuti Yehofa ndaŵi syosope akusakwanilisya yakulinga yakwe mwakamulana ni ndamo syakwe, yili yakulimbikasya.

Kusala yisyene, kumanyilila lina lya Mlungu Jwamaciligose wuli upile. Yeleyi mpaka yitukamucisye kuti tupate majali apano soni msogolo. Mlungu jwasasile kuti, “Cinjimcenjela ligongo mkumanyilila lina lyangu.”—Salimo 91:14.

“Jwalijose jucaciŵilanga pa lina lya Yehofa cacikulupuka.”—Yoweli 2:32.