LYAKUŴELUKA pa April 25, 2015, cisicinya camacili catendekwe ku Nepal, mkuli wa m’matumbi kumpoto kwa cilambo ca India. Cisicinyaci, catendekwe pa lutando lwa makilomita 80 kumpoto ca kungapilo lyuŵa kwa msinda wa Kathmandu. Yakutesya canasa yili yakuti ŵandu ŵakupunda 8,500 ŵawile. Keleka kali kandanda kuti ŵandu ŵajinji m’yiyi awe pa ngosi ja cipago ku Nepal. Majumba gakupunda 500,000 gajonasice. Ku Nepal kwana Ŵamboni sya Yehofa ŵakwana 2,200. Ŵajinji mwa jemanjaji akusatama mumkuli wawatendekwe cisicinyaci. Yakudandawulisya yili yakuti jwamkongwe jumo Jwamboni ni ŵanace ŵakwe ŵaŵili ŵawile.

Jwamkongwe jwine Jwamboni lina lyakwe Michelle jwatite, “Pacatendekwaga cisicinyaci Ŵamboni sya Yehofa ŵajinji mu mkuliwu ŵatendaga misongano jawo. Yikaŵe kuti ŵajinji ŵaliji m’majumba gawo, nikuti ŵapawinji akawile kapena kuwulala.” Ligongo cici Ŵamboni ŵaŵatendaga misonganowo ŵakulupwice? Ligongo lyakuti ŵaliji mu Nyumba sya Ucimwene syaŵasitaŵile mwakulimbangana.

Nyumba sya Ucimwene syasambano ku Nepal akusitaŵaga mwakulimbangana kuti sikagumukaga mwacitema ni cisicinya. Jwamlume jwine lina lyakwe Man Bahadur, jwakusakamucisya nawo pamasengo gakutaŵa Nyumba sya Ucimwene jwatite, “Ŵandu ŵatuwusyaga ligongo lyakwe tukutaŵa yilimbilimbi yakulimbangana camti m’yiyi pa majumba gamwanamwana mpela gelega. Sambano tuwuweni umbone wakwe!” Cili citendekwe cisicinyaci, ofesi ja Mboni jajiticisye kuti ŵandu ŵaŵasoŵaga pakutama mpaka atameje mu Nyumba sya Ucimwene. Atamose kuti pandaŵiji patendekwagasoni yisicinya yine yamwanamwana, Ŵamboni sya Yehofa ni ŵandu ŵane, ŵaliji pamalo gambone.

Mwacitema, acakulungwa ŵa mumpingo wa Mboni sya Yehofa ŵatandite kwasosasosa ŵandu ŵa mu dini jawo. Jwamkongwe jwine Jwamboni lina lyakwe Babita jwatite, “Acakulungwa ŵa mumpingo ŵalesile yindu yawo kuti atukamucisye. Cinonyelo caŵatulosisye catulimbikasisye.” Panyuma palisiku limo cili citendekwe cisicinyaci, ŵandu ŵatatu ŵa mu komiti jakulolela masengo ga Mboni sya Yehofa ku Nepal, yalumo ni ŵakutumicila ŵakusajenda m’cilimbikasyaga mipingo ja Mboni, ŵatandite kwendela mipingo jawo. Cakulinga cawo caliji kukwalola ŵanduwo, soni kuti akakamucisye acakulungwa ŵa m’mipingo ja Mboni ja mu mkuliwu.

Panyuma pa masiku 6 cili citendekwe cisicinyaci, Gary Breaux, ni ŵamkwakwe, lina lyawo Ruby, ŵayice kutyocela ku likulu lya Mboni sya Yehofa pacilambo cosope ku United States. Reuben, jwa mu komiti jakulolela masengo ga Mboni sya Yehofa ku Nepal jwatite, “Ligongo lya yakusawusya yine yayapali mu msinda wa Kathmandu, nambosoni yisicinya yamwanamwana yayatendekwaga, twakayicilaga yakuti m’bale Breaux cayice. Nambope, jwasimicisye yakuti cayice. Ŵamboni sya Yehofa ŵa mu mkuliwu ŵayamicile kutyocela pasi pamtima kwika kwa m’baleju.”

Jwamlume jwine lina lyakwe Silas, jwakusakamula masengo pa maofesi ga Mboni sya Yehofa ku Nepal, jwatite, “Matelefoni pagatanditesoni kamula masengo, ŵandu ŵatujimbilaga mafoni musi ni cilo. Acimjetu Ŵamboni sya Yehofa pacilambo cosope yakwayiye paŵapikene ya cisicinyaci. Atamose nganitupikanaga yiŵeceto ya ŵandu ŵane ŵaŵatujimbilaga mafoni, nambope yalosisye kuti akusatunonyela soni ŵaliji ŵakusacilila kutukamucisya.”

 Pali papite masiku cili citendekwe cisicinyaci, Ŵamboni sya Yehofa ŵane mu mkuliwu, ŵapelekaga yakulya kwa ŵandu ŵaŵatamaga m’Nyumba sya Ucimwene. Konjecesya pa yeleyi, ofesi ja Mboni jatamilikasisye Komiti Jakamucisya Pangosi Jacipago. Mwangacelewa, cikamucisyo cejinji catandite kwika kutyocela ku yilambo yine, mnopemnope kutyocela ku Bangladesh, India, ni Japan. Payicesoni madokotala gamboni gakutyocela ku Europe. Madokotalaga gatamilikasisye Nyumba ja Ucimwene jine kuti jiŵe mpela cipatala. Pelepo ŵapelekaga cikamucisyo ca mitela, nambosoni kwalimbikasya ŵandu ŵaŵalagaga nganisyo ni cisicinyaco.

Pakusala mwaŵapikanilaga ŵandu ŵajinji, jwamkongwe jwine lina lyakwe Uttara jwatite, “Cisicinyaci caliji cakogoya. Nambope ndaŵiji jatupele upile wakulosyana cinonyelo cekulungwa mpela liŵasa lyausimu kupunda ni kala kose.” Kusala yisyene, cisicinyaco nganicatengusya Ŵamboni sya Yehofa pakulosya cinonyelo kwa jwine ni mjakwe. M’malo mwakwe calimbikasisye kuti anonyelaneje mnope.