LITALA LYA UMI WAKUSANGALALA MPAKA TULIPATE CAMTULI?

Kola Cembeceyo

“[Une] nguganisya yakwapa mtendele ngaŵaga yisawusyo kuti akole sogolo jambone, soni cembeceyo.”—Yeremiya 29:11.

 “CEMBECEYO CILI . . . CAKUSOSEKWA MNOPE PAUMI WETU WAUSIMU, soni cili mpela mtela wambone wakamucisya pakumasya kutenguka, kulipatula soni woga,” jasasile m’yoyo buku jine (Hope in the Age of Anxiety).

Kusacilila kwetu kola cembeceyo akulosisye cenene kupitila m’Baibulo. Nambosoni Baibulo jikusatukalamusya kuti tukaŵikaga cembeceyo cetu pa yindu yangaŵajilwa. Palilemba lya Salimo 146:3 pakusati, “Akakulupililaga acayimwene, kapena mwanace jwa mundu, ŵanganaŵa akombwele kupeleka cikulupusyo.” Mmalo mwakwegamila ŵandu kuti atukulupusye, luli lunda kwegamila Mkupanganya jwetu, jwakwete macili gakwanilisya yilanga yakwe yosope. Ana jwalakwe atulagucisye yamtuli? Kwende tulole yindu yakuyicisyayi.

YAKUSAKALA YICIMALA SONI ŴAKULUNGAMA CACIŴA PAMTENDELE WANGAMALA. Lilemba lya Salimo 37:10, 11 likusati, ‘Kasigele kandaŵi panondi, ŵakutenda yakusakala cacimala . . . Nambo ŵakulinondiya cacapa cilambo capasi. Nambosoni cacisangalala ni mtendele wejinji.’ Nambosoni pa ndime 29 pakusati, “ŵakulungama . . . cacitama” pacilambo capasi kwangamala.

NGONDO SICIMALA. “Yehofa . . . akulekasya ngondo mpaka kumbesi kwa cilambo capasi. Akutemangula ukunje soni kuposokolanya lipanga. Nambosoni akoca magaleta ga ngondo ni moto.”—Salimo 46:8, 9.

YILWELE, YIPWETESI KAPENA CIWA YICIMALA. “Citenti ca Mlungu cili pasikati pa ŵandu . . . Jwalakwe cacipukuta misosi josope m’meso mwawo, soni ciwa ngasicipagwasoni. Ngasipapagwasoni kulila, kuwuwula kapena kupikana kupweteka.”—Ciunukuko 21:3, 4.

JWALIJOSE CACIŴA NI YAKULYA YEJINJI. “Pacilambo capasi paciŵa yagungula yejinji. Pacanya pa matumbi paciŵa yagungula yejinji.”—Salimo 72:16.

PACIŴA JWAKULAMULILA JUMO SONI BOMA JIMO JA UCIMWENE WA KLISTU. “[Yesu Klistu] ŵampele ulamusi, ni ucimbicimbi ni ucimwene, kuti ŵandu wosope ni mitundu josope ja ŵandu, ni ŵa yiŵeceto yosope amtumicile; ulamusi wakwe wucitama mpaka kalakala, soni uli wangamala. Ucimwene wakwe ngasiwujonasika.”—Danieli 7:14.

Ana cici campaka citutendekasye kulupilila yilanga yeleyi? Yesu ali pa cilambo capasi, jwalosisye kuti ali jwakuŵajilwa kuŵa Mwenye. Jwalakwe ŵaposisye ŵakulwala, kulisya ŵakulaga, soni kwimusya ŵawe. Cindu cine cakusosekwa mnope caliji yaŵajiganyaga. Jwalakwe jwasasile yindu yampaka yakamucisye ŵandu kutama yalumo mwamtendele, soni mwakamulana kwangamala. Yesu ŵasasilesoni mkanipaŵe yindu yine yayicitendekwa msogolo, kupwatikapo yimanyilo yayicilosya kuti tuli m’masiku gambesi ga cilamboci.

KUCIŴA YINDU YAKOGOYA MKANIWUYICE MTENDELE

Yesu ŵasasile mkanipaŵe kuti m’masiku gambesi kuciŵa kwangali mtendele soni citeteyo. Jwalakwe jwasasile kuti yine mwa yimanyilo ya “mbesi ja ndaŵi ajino” yiciŵa ngondo, sala, milili, soni yisicinya yekulungwakulungwa. (Matayo 24:3, 7; Luka 21:10, 11; Ciunukuko 6:3-8) Yesu jwasasilesoni kuti, “Ligongo lya kutupa kwa ungapikanila malamusi, cinonyelo ca ŵandu ŵajinji cicimala.”—Matayo 24:12.

Mundu jwine juŵalembile nawo Baibulo jwalosisye kuti kumala kwa cinonyelo kweleku kuciwonecela m’matala gejinji. Pa lilemba lya 2 Timoteo 3:1-5, jwalakwe jwatite, ‘m’masiku gambesi’ ŵandu ŵajinji caciŵa ŵakulinonyela acimsyene, ŵakunonyela mbiya soni yakusangalasya. Caciŵa ŵakulikwesya, soni ŵakogoya. Cinonyelo m’maŵasa gejinji cicimala, soni ŵanace caciŵa ŵangapikanila acinangolo. Nambosoni yacinyengo yiciŵa palipose mu dini syakulekanganalekangana.

Yindu yakogoya yeleyi yikutusimicisya kuti cilamboci cili m’masiku gambesi. Yikutusimicisyasoni kuti Ucimwene wawucilamulila mwamtendele usigele panandi kwika. Yesu jwasasilesoni cindu cine pakwamba ya masiku gambesi, jwalakwe jwatite, “Ngani asi syambone syakwamba Ucimwene sicilalicidwa pacilambo cosope capasi, kuti uŵe umboni kwa ŵandu ŵa mitundu josope, kaneko mbesi jiciyika.”—Matayo 24:14.

Kulalicidwa kwa ngani syambone syelesi, kukulosya kuti ŵandu ŵakutenda yakusakala asigele panandi konanjidwa, soni kuti ŵandu ŵakulungama asigele panandi kupocela majali gaŵalagucisye Mlungu. Ana akusaka kumanyilila yejinji pakwamba ya majaliga? Naga akusaka, alole peji jakumalisya ja magasini ajino.