ANA WAWOJO akusakulupilila kuti Baibulo jatyocele kwa Mlungu, kapena jigambile kuŵa nganisyo sya ŵandu?

Kulekangana nganisyo panganiji kukwendelecelape atamose pasikati pa ŵandu ŵakusati ali Aklistu. Mwambone, mu caka ca 2014, ciwanja cine ku United States cawungunyisye pakusaka kumanyilila yeleyi. Pakuwungunyaku ŵandu ŵajinji ŵakusati ali Aklistu ŵajiticisye kuti “Baibulo jikusakamulana ni Mlungu m’litala line lyakwe.” Nambope mundu jumo mwa ŵandu msano ŵaliwose ŵasalaga kuti Baibulo jili buku ja adisi, soni kuti jili buku ja mbili jakala nambosoni buku jakola malamusi gakulembedwa ni ŵandu. Yeleyi yalosisye cenene kuti ŵandu ŵane ngakumanyilila kugopolela kwa maloŵe gakuti Baibulo “jasalilidwe” ni Mlungu.—2 Timoteo 3:16.

Baibulo japanganyidwe ni mabuku gamwanamwana gakwana 66. Mabukuga galembedwe ni ŵandu ŵakwana 40, nambo papite yaka ciŵandika 1,600 kuti Baibulo josope jimale. Naga Baibulo jalembedwe ni ŵandu, ligongo cici tukusati “jasalilidwe ni Mlungu”? Maloŵe gakuti “jasalilidwe ni Mlungu” gakwamba gopolela kuti utenga wawuli m’Baibulo watyocele kwa Mlungu. Baibulo pakusala yeleyi jikusati, “Msimu weswela walongolele jemanjajo kuŵeceta maloŵe gakutyocela kwa Mlungu.” (2 Petulo 1:21) Yeleyi yikugopolela kuti Mlungu ŵakamulicisyaga masengo macili gakwe gangawoneka ni meso, wawuli msimu wakwe weswela pakusala utenga wakwe kwa ŵandu ŵaŵalembile mabuku ga m’Baibulo. Yeleyi mpaka tuyiwanicisye ni abwana ŵakumsalila mlembela jwawo kuti alembe cikalata. Cikalataco ngaŵa mkujila kuti cili ca mlembelajo, nambo ca abwanawo.

Ŵakulemba Baibulo ŵane ŵapikanaga utenga wa Mlungu kupitila mwa malayika. Soni ŵane, Mlungu ŵatendekasyaga kulola mesomkulola. Nambosoni ndaŵi sine, Mlungu ŵasalaga utenga wakwe kupitila mu sagamisi. Atamose kuti Mlungu jwakundile ŵanduŵa kulemba utenga wakwe, nambope jwasalilagasoni mwampaka alembele. Cinga yindu yaliji wuli pandaŵiji, nambo ŵanduŵa ŵalembile nganisyo sya Mlungu ngaŵaga syawo.

Ana mpaka tusimicisye camtuli kuti Mlungu ni juŵalongolelaga ŵanduŵa kuti alembe Baibulo? Kwende tulole maumboni gatatu gagakusatusimicisya kuti Baibulo jatyocele kwa Mlungu.