Ana mpaka atusalile mbili jawo?

Napagwile ku China, m’caka ca 1959, mu msinda wa Funzhou. Msindawu wuli mu mkuli wa Jiangxi. Ndili ni yaka 8, cipani ca Cultural Revolution catandite kulamulila cilambo ca China. Ligongo lyakuti baba ŵangu ŵamanyililaga masengo ga yakutaŵataŵa, ŵapatile kontalakiti jakutaŵa njanje ku cipululu cine, kutali ni kumangwetu. Pa caka, ŵayikaga kampepe kutulola. Pandaŵiji, natamaga ni mama ŵangu ŵaŵakamulaga masengo gakwiganya pakasukulu kanekakwe. Twatamilaga kusukulu peko. M’caka ca 1970, twasamile kweleku ni kwawula ku kamusi kane line lyakwe Liufang. Kamusi keleka kaliji kakulaga mnope m’boma josope ja Linchuan. Cakulya caliji cakusoŵa.

Ana liŵasa lyawo lyakupililaga yamtuli?

Baba ŵangu nganayikosyaga ya dini soni yandale. Mama ŵangu ŵaliji mu dini ja Cibuda. Kusukulu nalijiganyisye kuti yaumi yacenjile kutyocela ku yindu yine, soni nakulupililaga yosope yaganjiganyaga maticala gangu.

Ligongo cici ŵalijiganyisye yamasamu?

Natandite kulijiganya masamu ligongo lyakuti gakusasaka kuti mundu awungunye cenene kuti amanyilile yisyesyene yakwe. Caka ca ŵajasice pulesidenti jwacipani ca Cultural Revolution, Mao Tse-tung, mu 1976, natandite majiganyo gangu gapenani. Nasagwile kuti ndende mnope yamasamu. Panapatile digili jangu ja masters, masengo gandanda kukamula galiji ga kopocela ni kupanganya yida yasambano yamagesi.

Ligongo cici ŵatandite kulijiganya Baibulo?

M’caka ca 1978, napite ku United States kuti ngajonjecesya majiganyo gangu gapenani. Natandite kulijiganya pa koleji ja A&M mu msinda wa Texas. Panayice kweleko, nayiweni kuti ŵandu ŵajinji ku America akusakulupilila Mlungu,  soni akusaŵalanga Baibulo. Napikenesoni kuti mpaka mbate lunda kutyocela m’Baibulo, m’yoyo natandite kujiŵalanga.

Yanalijiganyisye m’Baibulo, nayiweni kuti yili yakamucisya. Nambo ligongo lyakuti nganimbikanicisyaga mbali sine, nalesile kujiŵalanga.

Yaŵele camtuli kuti atandilesoni kujinonyela Baibulo?

M’caka ca 1990, jwamkongwe jwine Jwamboni sya Yehofa jwayice kunyumba. Jwasalile yajikusasala Baibulo pakwamba ya yindu yambone yacacitutendela Mlungu. Kaneko, jwalinganyisye yakuti liŵasa line liyiceje kukungamucisya kujipikanicisya Baibulo. Ŵamkwangusoni lina lyawo Liping, ŵatandite kulijiganya Baibulo. Nombe nawo pandanda nganakulupililaga ya Mlungu, soni ŵatesile majiganyo gapenani pa koleji ja sayansi ku China. Twalijiganyisye m’Baibulo kuti Mlungu ni juŵapanganyisye yaumi. Kaliji kandanda kupikana yeleyi, m’yoyo, naganisisye yakuwungunya cenene nganiji.

Ana ŵawungunyisye camtuli yeleyi?

Ligongo lyakuti natesile yamasamu, nalijiganyisye mwampaka tuwungunyilile yindu kuti tumanyilile yisyesyene. M’yoyo natandite kuwungunya muwatandile umi. Kuti yaumi yipagwe pasosekwaga yindu yakolanjikwa kuti mapulotini. Yindu yeleyi yili yamwanamwana mnope. M’maselo mukusasimanikwa mapulotini gejinji gakulekanganalekangana. Mapulotiniga gakusakamulana mwadongosolo. Nayikene pakwiticisya mpela mwatendele ŵandu ŵajinji kuti yeleyi ngaŵa mkutendekwa jika. Naŵalasile mabuku gejinji gakusala yakuti yaumi yacenjile kutyocele ku yindu yine nambo nganigangamulaga mtima. Nayiweni kuti kalumbikane kakusimonjesya ka mapulotiniga kapanganyidwe ni Mlungu.

Ana cici cacatendekasisye kulupilila kuti Baibulo jatyocele kwa Mlungu?

Panajendelecele kulijiganya yejinji ni Ŵamboni sya Yehofa, nalijiganyisye kuti m’Baibulo mwana yakulocesya yejinji yayakwanilicikwe. Natanditesoni kuwuwona umbone wakamulicisya masengo yangulijiganyayo. Ni naliwusyaga kuti, ‘Yakombolece camtuli kuti acalume ŵaŵatemi kalakala alembe yindu yakamucisya atamose masiku agano?’ Kaneko napikanicisye kuti Baibulo jatyocele kwa Mlungu.

Ana cicisoni cacikusatendekasya kulupilila kuti Mkupanganya apali?

Panguganicisya yakusimonjesya yayikusatendekwa mu yakupanganyikwa yejinji, jwangakayicila ata panandi kuti Mkupanganya apali. Apano ngusapanganya mapologalamu gapakompyuta. Nambope ngusayiwona kuti kompyuta nganijiŵa jilandene ni ututu. Mwambone, yayikusatendekwa mkati mwa ututu patupikene maloŵe yili yakusimonjesya. Ŵajinjiwe, tukusakombola kupikanicisya yakuŵeceta mundu, atamose yakuŵecetayo ngayikupikanika cenene, soni pana masegwe kapena yindu yine yakusokonasya. Nambo pologalamu ja pakompyuta, ngaŵa mkutenda yeleyi atamose pologalamujo jiŵe jambone mnope.

Mwakulekangana ni mwajikusatendela kompyuta, ututu wetu mpaka umanyilile mwakupikanila mundu. Ukusakombolasoni kumanyilila maloŵe ga mundu soni mwakusaŵecetela. Ŵakupanganya mapologalamu gapakompyuta akulinjilila kupanganya pologalamu jakuti jikomboleje kumanyilila maloŵe ga mundu mpela mwawukusatendela ututu. Ngangukayicila ata panandi kuti pakutenda yeleyi akulijiganya masengo gakusimonjesya ga Mlungu.