Chilu Chambone
Baibulo nganijiwa buku jakusala yachipatala. Nambope jikwete yiwundo yampaka yitukamuchisye kola chilu chambone. Kwende tulole yiwundo yine ya m’Baibulo yampaka yitukamuchisye kola chilu chambone.
TUSAMALILEJE CHILU CHETU
CHIWUNDO CHA M’BAIBULO: “Pangali mundu jwakuŵengana ni chilu chakwe, nambo akusachilisya ni kuchisamalila.”—Aefeso 5:29.
ANA YELEYI YIKUGOPOLELA CHICHI?: Chiwundo cha m’Baibulochi, chikutulimbikasya kusamalila chilu chetu. Lipoti line likusalosya kuti yakusawusya yejinji yam’chilu, yikusayika ligongo lya mwatukusatendelaga yindu paumi wetu. Myoyo, kusagula yakutenda mwalunda mpaka kutukamuchisye kola chilu chambone.
YATUKUSOSEKWA KUTENDA:
-
Yakulya. Tulyeje yakulya yambone yakamuchisya m’chilu soni tumweje mesi gakwanila.
-
Tukagambaga Kutama. Mwangasamala kandu ya yaka yatukwete, kanga tuli ŵalemale kapena tukwete ulwele wekulungwa, nambo kutenda yindu yakuchilimbisya chilu kuli kwakamuchisya. Achimjetu soni madokotala mpaka atukamuchisye kuti tutendeje mang’asi gakulimbisya chilu, nambo m’weji ni ŵatukwete udindo wakutenda yinduyo kuti yitukamuchisye.
-
Tugoneje Mwakwanila. Ŵandu ŵangakusagona mwakwanila mpaka alwale ulwele wekulungwa mkupita kwandaŵi. Ŵajinji ngakusagonaga mwakwanila ligongo akusatendaga yine pandaŵi jagona. Nambo naga tukusagona mwakwanila, nikuti tukusagula kola umi wambone.
TUŴAMBALEJE NDAMO SYAKONANGA UMI
CHIWUNDO CHA M’BAIBULO: “Kwende tutyosye yindu yosope yakusakasya chilu chetu kapena mtima wetu.”—2 Akolinto 7:1.
ANA YELEYI YIKUGOPOLELA CHICHI?: Tukusakola chilu chambone naga ngatukamulichisya masengo yindu yakonanga umi mpela sona jwele mpaka atandikasye ulwele soni chiwa.
YATUKUSOSEKWA KUTENDA: Asagule lisiku lyakusaka kuleka ndamojo. Mkanilikwane lisikulyo, akusosekwa kwasa sona, mwakusunjila sona, makwemba, machesi ni yindu yine yakwayana ni ndamoji. Aŵambaleje kutama pamalo pele pana ŵandu ŵakwete ndamoji. Akusosekwa kwasalila achimjawo yasagwileyo.
YIWUNDO YINE YA M’BAIBULO
Kuti ajipate Baibulo aŵechetane ni ŵa Mboni sya Yehofa ŵa mudela jawo.
TUTENDEJE YINDU MWAKUSAMALA.
“Ndaŵi jimkutawa nyumba, mlolechesyeje kuti mtaŵile lipupa lyakuchiga mumbali mwa msakasa. Pelepo jemanja ngasimjimbidwa magambo ga kuwulaga mundu naga ali agwile pasi ni kuwa.”—DETULONOMO 22:8.
TUŴAMBALEJE KUTUMBILA.
“Mundu jwangapya mtima mwachitema, akusapikanichisya yindu mnope, nambo mundu jwakwanguya kupya mtima akusalosya usilu wakwe wosope.”—MISYUNGU 14:29.
TUŴAMBALEJE KULYA MNOPE.
‘Mkatama pasikati pa ŵandu . . . ŵakunyela kapena kuti ŵakutunduka.’—MISYUNGU 23:20.
You May Also Like
AJIMUCHE!
Litala Lya Umi Wakusangalala Mpaka Tulipate Camtuli—Kusamalila Cilu Soni Kupilila Yipwetesi
Ana ulwele ututendekasyeje kuŵa ŵakudandawula ndaŵi syosope?
