CHIWUNDO CHA M’BAIBULO: “Mundu jwangatumbila chitemape akusampunda mundu jwamachili mnope.”—Misyungu 16:32.

ANA YELEYI YIKUGOPOLELA CHICHI?: Tukusapindula naga tukusilamulila nganisyo syetu. Ndaŵi sine mpaka tutumbile paligongo lyakupikanika. Nambo naga ngatukulikamula, mpaka tujonanje yindu yejinji. Ŵakuwungunya ŵapachangakaŵapa asasile kuti ŵandu patumbile ngakusaganisya chenene soni yeleyi yikusatendekasya kuti alijimbeje magambo pambesi pakwe.

YATUKUSOSEKWA KUTENDA: Tulijiganyeje kuwukamula mtima mkaniyiyiche pakusawusya. Ŵane akusaganisyaga kuti ŵandu ŵakutumbila ali ŵamachili, nambo yisyesyene yakwe niyakuti nganaŵa ŵamachili. Baibulo jikusati, “Mundu jwangawukamula mtima wakwe, ali mpela msinda wepasulidwe ni amagongo ni kuwuleka uli wangali mapupa gakuchinjilichisya.” (Misyungu 25:28) Litala lyampaka lyakamuchisya kuwukamula mtima wawo lili kumanyilila yisyesyene yayitendekasisye ngani jinejakwe mkanitutende chilichose. Baibulo jikusati, “Lunda lukusamtendekasya mundu kuŵa jwangatumbila chitema.” (Misyungu 19:11) Mpaka tutende chenene kupikanila mwakusamala mbali syosope sya nganijo. Yeleyi mpaka yitukamuchisye kola lunda lwampaka lutamiche nganisyo syetu pasi.

CHIWUNDO CHA M’BAIBULO: “Mŵeje ŵakutogolela kapena kuti ŵakuyamichila.”—Akolose 3:15.

ANA YELEYI YIKUGOPOLELA CHICHI?: Ŵandu akusasala kuti mundu jwakuyamichila ni jwakusaŵa jwakusangalala. Atamose ŵandu ŵele  ŵakunonyelwa ŵawo ŵajasiche kapena ŵaŵajasile chindu chaŵachinonyelaga mnope akusajitichisya yeleyi. Jemanjaji akusasala kuti chachakamuchisye kumalana ni kulaga nganisyo chaliji kuyamicila yindu yakwete mmalo mwakuganichisya yindu yayajasiche.

YATUKUSOSEKWA KUTENDA: Lisiku lililyose tukusosekwa kuganichisya kapena kulemba yindu yatukusaka kuyamichila. Yinduyi ngayikusosekwa kuŵa yekulungwa mnope. Tuganichisyeje tuyindu twamwanamwana mpela kusalala kwa lyuŵa palikukopoka, tungani twakusangalasya twakusaŵecheta ni ŵakunonyelwa ŵawo kapena ayamichileje paliweni lisiku line. Yindu yakusangalasyayi, yichakamuchisya kola nganisyo syambone naga akusayiganichisyaga soni kuyiyamichila.

Yikusaŵasoni yakamuchisya kupata magongo gakuliyamichila liŵasa lyawo soni achimjawo. Payiweni yindu yambone kwa ŵane, ŵayamichileje ŵanduwo meso ni meso, kwalembela chikalata, kapena kwalembela meseji. Kutenda yeleyi, mpaka kwakamuchisye kuŵa ŵakusangalala.—Masengo 20:35.

TUŴAMBALEJE KANGANA.

“Ndande ja ukangani jili mpela mesi gakwitichila, myoyo mtukucheje pa malopo ndewo mkanijitande.”​—MISYUNGU 17:14.

TUŴAMBALEJE KUDANDAWULA YINDU YAMSOGOLO.

“Mkaŵaga ŵakusingalilwa ni kuganisya ya malaŵi. Ya malaŵi ni ya malaŵi. Lisiku lili lyose lyana yakusawusya yakwe yakwepe.”​—MATEYU 6:34.

TUKAGAMBAGA KUJIGALIKA NGANISYO, TUGANICHISYEJE MWAKUSAMALA MKANITUTENDE CHILICHOSE.

“Ganichisya chilepe ya msogolo tikuchimsunga m’mwejo soni kupikanichisya chenene yindu, tikuchimchenjela.”​—MISYUNGU 2:11.