Ŵanduwe ŵatupanganyisye kuti tumanyilileje naga cindu cili cakusalala kapena iyayi. Yeleyitu yili yakusimonjesya kwabasi! Baibulo jangasala mwayikusatendecela yeleyi, nambo jikusalosya ligongo lyakwe tukusasangalala patuyiweni yindu yakusalala. Jikusati ligongo lyakuti Mlungu ŵatupanganyisye kuti tukomboleje kujigalila ndamo syakwe. (Genesis 1:27; Mlaliki 3:11) Mlungu ŵacipanganyisye cilu cetuci kuti citendeje yindu yakusimonjesya kwabasi. Ni ligongo lyakwe ndumetume jwine jwa Mlungu ŵalembile kuti, ‘Ngwalumba ŵalakwe [Mlungu] pakuŵa ŵambanganyisye mwakusimonjesya.’—Salimo 139:14.

Nambo moŵa agano ngani ja kulisalalisya jiyice pangasalilana. Ŵakupanganya yakulisalalicisya soni mapologalamu ga pa TV ni yayikutendekasya yeleyi. Mwakamulana ni yajasasile buku jine jakusala ya kulisalalisya, m’yilambo yejinji ya ku Europe, paŵawungunyisye ŵapatile kuti “ŵandu ŵajinji ŵangasangalala ni kawonece kawo, atamose ali ŵandu ŵambone. Nambo akusasangalala naga ali ŵakusalala mnope.”—Body Image. Ganisya m’yiyiku kukusatendekasya ŵandu ŵajinji kuliŵalila ya cindu cakusosekwa mnope, cacili mtima wetu.—1 Samueli 16:7.

Konjecesya pelepa, ŵandu ŵajinji, mnopemnope acakongwe, akusalisalalisya kuti ŵandu pakwawona aganisyeje mnope yagona nawo. Mu 2007 ciwanja ca American Psychological Association (APA) cakopwesye lipoti lyakuti, “Ciŵandika yindu yosope yakuwandisya ngani mpela TV, wailesi ni yine, yikusalosya kapena kusala yakusatenda acakongwe pakwatendekasya ŵandu kuti aganisyeje yagonana.” Baibulo jikusatusalila mwamacili kuti tukusosekwa kuŵambala kujigalila yeleyi!—Akolose 3:5, 6.

“Kulisalalisya kwenu kukagambaga kuŵa kwakusape . . . , nambo kuŵeje kwa umi wamkati, kusalala kwangamala kwa mtima wakulitimalika ni wakutulala. Umi wati m’yiyiwu uli wamtengo wapenani pameso pa Mlungu”.—1 Petulo 3:3, 4.

Pakwamba ya kusalala, ŵane akusati, “Naga uli kandondwa, ulilosyeje kwa ŵandu!” Ciwanja ca APA cila, capatilesoni kuti m’yilambo mwele ŵandu ŵajinji akusaganisya m’yiyi, asikana ŵajinji “akusasaka kuti ŵandu agambeje kwalolecesya soni kwalapilila.” Nambo nganisyo  syelesi sili syakogoya kwabasi. Mwakamulana ni lipoti lya ciwanja ca APA, naga ŵandu ngakumlapilila mundujo akusatanda “kuliwona mpela jwangali mate . . . , ŵanganonyela kulya, akusalikayicila soni akusalagaga nganisyo.”

‘Mtyosye yayikumsawusya mumtima mwenu. Mliŵambasye ku yindu yakuwulasya cilu cenu, pakuti ucanda ni pamnong’a pa umi yangali mate.’—Mlaliki 11:10

Baibulo jikusalosya kuti ‘lunda’ kapena kuti ganisya cenene yikusakamulana ni kulinandiya. (1 Timoteo 2:9) Aganicisye ayi: Mundu jwakulinandiya jwangalilapilila kapena kusacilila kuti ŵandu amlapilileje. Akusatenda yindu mwakwaganicisya ŵane, mwati ŵanduwo akusamnonyela, kumcimbicisya, nambosoni Mlungu akusamnonyela. (Mika 6:8) Ŵandu ŵakulinandiya akusakola acimjawo ŵapamtima ŵambone. Akusapatasoni mundu jwambone jwakulombana najo, jwakusanonyela ndamo syambone syakwete, ngaŵaga kusalalape.

Ni ligongo lyakwe Baibulo jikusatulimbikasya kuti tusalalisyeje mnope umundu wetu wamkati, wawuli “umi wamkati.” (1 Petulo 3:3, 4) Yeleyitu yili yambone mnope! Kusalala kwamkati kwangakalambala. Soni yisyesyene yakwe ni yakuti, pajikwawula ndaŵi umunduwu ukusajendelecela kuŵa wambone. Lilemba lya Miyambo 16:31 likusati, ‘Wuuli mumtwe sili cisoti caucimbicimbi naga sikusimanikwa m’litala lyakulungamika.’ Nambope, jwalijose jwakusapikanila yajikusasala Baibulo, cinga ali mwanace kapena jwamkulungwa, caciŵa ni umundu wakusalala mpaka kalakala. Ŵandu tacimcimbicisyaga soni jwalakwejo taciŵa jwakusangalala mnope.

“Kuwoneka cenene mpaka kuŵe kwakulambusya, soni kusalala mpaka kuŵe kwakandaŵi, nambo jwamkongwe jwakumjogopa Yehofa cacimpa majali.”—Miyambo 31:30.