JWAMKONGWE jwine lina lyakwe Soo-Jeong akusakamucisya ŵanace ŵakusimana ni yakusawusya pa sukulu ja Sekondale ku South Korea. Jwalakwe aŵele ali mkamulicisya masengo mafidiyo ga pa webusayiti ja jw.org pakwakamucisya ŵanacewo. Soo-Jeong jwatite, “Ŵanacewo ŵasangalele mnope paŵalolelele kafidiyo kakuti, What’s a Real Friend? (Ana Mjetu Jusyesyene Akusaŵa Jwatuli?) Pambesi pakulolela kafidiyoka, jwalijose akusaŵeceta kuti, ‘Nganinganisyaga kuti pana litala line lyambone lyakupatila acimjangu ŵasyesyene. Ali lili litala lyasambano!’ Ŵanace ŵane ŵasasile kuti cajawuleje pa webusayitiji naga akusaka kupata cikamucisyo.” Soo-jeong jwaŵecetesoni kuti, “Nalimbikasisyesoni acimjangu kamulicisya masengo kafidiyoka pakwajiganya ŵanace, soni acimjanguwo ŵasangalele kuyiwona kuti lili litala lyambone lyakwajiganyila.”

Kafidiyo kane kakusakanonyela ŵanace ŵa sukulu ku South Korea kali kakuti Kwagomeka Ŵakutulagasya Mwangamenyana Nawo. Jwamkongwe jwinesoni jwakusakamula masengo m’ciwanja cakwacenjela ŵanace ku yangalwe ku South Korea, jwalosisye kafidiyoka kwa ŵanace ŵa pa sukulu jine. Jwamkongwejo jwatite, “Kafidiyoka kakusayika pamtima ŵanace ŵajinji ligongo kakwete yakwambulajambula yakusangalasya. Konjecesya pelepa, kafidiyoka kakusala yampaka ŵanace atende pakulimbana ni yangalwe, nambosoni kakwiganya matala gakuŵambalila yangalweyo.” Ciwanjaci caŵendile Ŵamboni naga mpaka cikamulicisyeje masengo kafidiyoka pakwajiganya ŵanace ku masukulu gane. Ŵamboniwo ŵajiticisye. Ku South Korea, atamose ŵapolisi atandite kamulicisya masengo mafidiyo ga pa webusayiti ja jw.org pakwakamucisya ŵandu.

Ana pakwete pawugwile webusayitiji? Naga nganawuguleje, tukwaŵenda kuti atende yeleyo. Jili jangasawusya kamulicisya masengo, nambosoni mpaka ajigalepo mafidiyo, yakupikanila, Baibulo ni mabuku gane mwalulele.