Majiganyo ga m’Baibulo gakwete machili gakwachenga ŵandu mwakusimonjesya. Kwende tulole chisyasyo cha Ricardo soni Andres.

RICARDO: Ndili ni yaka 15, najinjile m’kakuga ka yigaŵenga. Ŵachinyamata achimjangu ŵanjisyaga kuti ndendeje ya uchigaŵenga. Yeleyi yandendekasisye kola chakulinga chakuja kutama yaka  10 kundende yayikupikanika mpela kuloŵela. Nambo pandaŵijo, mundu kutama kundende kwa ndaŵi jelewu, ŵandu ŵamkumbilaga soni kumchimbichisya. Nombe une nasakaga kuŵa mpela jemanjajo.

Natandite kutenda nawo ndamo syosope sya uchigaŵenga kupwatikapo kumwa mitela jakusokonasya mtwe, yagonana soni yachiwawa. Lisiku line chilo, twagombelanaga ni likuga line lya yigaŵenga. Naganisyaga kuti chimbulajidwe nambo mwaupile natisile ndili nganimbulala palipose. Panyuma pa yeleyi, natandite ganichisya mnope yaumi soni sogolo jangu mwamti nasakaga kuchenga. Nambo ana ngatesile wuli? Ana ngapatile kwapi chikamuchisyo?

Achalongo achimjangu ŵajinji nganasangalalaga, ligongo umi wawo wakwete yakusawusya yejinji. Nambope papali liŵasa line lya mjomba lyalyawonekaga kuti lili lyakusangalala. Namanyililaga kuti ali ŵandu ŵambone soni kuti akusakuyaga mfundo sya m’Baibulo. Liŵasali lyanjiganyisye kuti lina lya Mlungu lili Yehofa. Mkanipapite ndaŵi jelewu chimalile gombelana kula, namŵendile Yehofa kuti angamuchisye mwakumkolanga lina lyakwe. Nasimonjile kuti lisiku lyakuyichisya, jwa Mboni sya Yehofa jwapoposisye kunyumba jangu. Jweleju ni juŵanjiganyisye Baibulo.

Kaneko nasimene ni chakusawusya chekulungwa. Ndaŵi ni katema achimjangu ŵala ŵanjimbilaga foni kuti tukang’andejepe. Atamose kuti yaliji yakusawusya, nambope nakanile. Naganisisye yakupitilisya kulijiganya Baibulo. Ndili jwakusangalala kuti nakombwele kutenda yeleyi. Umi wangu wachenjile mwakusimonjesya soni napatile chisangalalo chisyesyene.

Ngusakumbuchila ndili mkumsalila Mlungu mwipopelo kuti ndaŵi jine nasakaga kutama mu ndende kwa yaka 10. Natendaga yeleyi, pakusaka kuchimbichikwa mpela mundu jwa m’likuga lya uchigaŵenga. Namŵendile jwalakwe kuti angunde namtumichile kwa yaka 10 mpela jwakulalichila jwa ndaŵi syosope. Nasakaga kwakamuchisya ŵane kuti achenje mpela yaŵatite ŵane pakungamuchisya. Mlungu ŵanjanjile lipopelo lyangu, mwamti apano masile yaka 17 ndili jwakulalichila jwa ndaŵi syosope. Konjechesya pelepa, nganindameje mu ndende.

Ŵajinji mwa achimjangu ŵala, atemi mu ndende kwa yaka yejinji soni ŵane ŵamasile kuwa. Panguganichisya yamunyuma, yikusandendesyaga kwayamichila achamlongo achimjangu Ŵamboni ŵala. Jemanjaji ŵatamaga umi wakulekangana ni ŵane ligongo ŵakuyaga yaŵalijiganyaga m’Baibulo. Ngusinachimbichisyaga mnope mwakulengana ni yigaŵenga yila. Kupunda yosope ngum’yamichila Yehofa pakunjiganya litala lyambone mnopeli.

 ANDRES: Kumalo kwanapagwile kwaliji kwakulaga. Yindu yakusakala mpela mitela jakusokonasya mtwe, kusumula yindu, kuwulagana soni uhule yaliji posepose. Baba ŵangu ŵaliji ŵakumwa ukana soni ŵakamulichisyaga masengo mitela jakusokonasya mtwe. Mama ni baba ŵatamilaga kangana soni kumenyana.

Ndili jwachinandipile natandite kumwa ukana soni kukamulichisya masengo mtela wakusokonasya mtwe. Namalilaga ndaŵi syejinji ndili mkwendajenda, kwiŵa soni kusumisya yanjiŵileyo. Panakusile baba ŵasakaga kuti tusyoŵekaneje m’litala lyangaŵajilwa. Ŵanjiganyisye mwampaka syembechesyeje mitela soni yindu yine yakulekasidwa ni boma kaneko kuyisumisyaga m’chilambo mwetu. Napataga mbiya syejinji mwachitema. Lisiku line ŵapolisi ŵayiche kunyumba kukundaŵa ni ŵasalile kuti simanikwe ni magambo gakuwulaga mundu. Kaneko ŵandamwile kuti ngatame yaka msano kundende.

Lisiku line kundaŵi, papelechedwe chimanyisyo kundendeko chakwaŵilanjila ŵandu ku kukulijiganya maloŵe ga Mlungu ni ŵa Mboni sya Yehofa. Naganisisye yakuti ngapikanile nawo. Yanayipikene kweleku yaliji yakamuchisya mwamti natandite kulijiganya Baibulo ni Ŵamboni. M’malo mwakamulichisya masengo Malemba mwakuŵasya, jemanjaji ŵangamuchisye kumanyilila ndamo syapenani sya Mlungu.

Namanyilile kuti yaliji yakusawusya kuchenga pali pangali chikamuchisyo, mnopemnope pandaŵi jele achimjangu ŵanaliji nawo mundende ŵasisyaga ligongo lya yindu yanatendaga. Naŵendile machili soni lunda kwa Yehofa ni ŵangamuchisye. Mmalo mwakuwujila munyuma ligongo lya yindu yaŵaŵechetaga achimjanguŵa, mwakulimba mtima nakombwele kwasalila yajikusasala Baibulo.

Ligongo lyakuti nasyoŵelele umi wa kundende, yandendekasisyesoni kuti ndande kudandawula paŵangoposyaga. Panatyokaga, ŵajinji mwa achimjangu ŵanaliji nawo mu ndendemu ŵambaga bayibayi. Ŵane ŵaŵechete mwakwayidwa kuti, “Ajende chenene abusa.”

Yeleyi yandendekasisye kuganichisya mwawukaŵelele umi wangu yikaŵe kuti nganinamkunda Mlungu kuti anjiganye. Ndili jwakusangalala mnope ligongo lyakuti Mlungu ŵanonyele nambosoni nganambonaga mpela mundu jwamsokonechele. *