“Mkululuchilaneje jwine ni mjakwe naga jwine amlemwechesye mjakwe.”—AKOLOSE 3:13.

Wosopewe tukusalemwesya. Mpaka twaleŵele ŵane kapena jemanjajo mpaka atuleŵele m’weji. Payitendekwe yeleyi, tukusosekwa kwakululuchila achimjetuwo ni mtima wosope. Patwakululuchile ŵane tukasunjilagasoni chakulukosi. Mundu patutendele chakusakala, ngatukusosekwa ‘kuwuchisya chakusakalacho.’ Nambosoni tuŵambaleje kumkumbusya yaŵatuleŵeleyo. (Aloma 12:17) Nambi wuli naga yaŵatuleŵeleyo yikutupweteka mnope mwamti ngatukuyiliŵalila? Naga yili myoyo, akusosekwa kukambilana ni mundu juŵaleŵelejo. Pajawile kukukambilana, atendeje yakuti akamulane ni mjawojo ngaŵa kumlosya kuti ali jwakulemwa.—Aloma 12:18.

“Mŵeje ŵakulinondiya, soni jwalijose amwoneje mjakwe kuti ali jwakumpunda jwalakwejo.”—AFILIPI 2:3.

Ŵandu mpaka asangalale kukunguluka ni m’weji naga tuli ŵakulinondiya soni naga tukusachimbichisya. Jemanjaji akusamanyilila kuti chitutendeje nawo yindu mwachinonyelo soni mwakwaganichisya. Akusamanyililasoni kuti nganituŵa twaleŵele mwamele. Nambo naga tukusaliwona kuŵa ŵakusosekwa  mnope kwapunda ŵane, mpaka tutandisye ukangani. Ŵandu mpaka atande kututila soni mpaka tusoŵe ŵakunguluka nawo.

“Mlungu jwangali lusagu. Jwalijose jwakusamjogopa jwalakwe ni kutenda yambone akumpochela, pangalolela kuti akutyochela mtundu wapi.”—MASENGO 10:34, 35.

Mlungu jwangamwonaga mundu kuŵa jwakusosekwa mnope ligongo lya chilambo chakusatyochela, chiŵecheto chakwe, yindu yakwete soni kawoneche kakwe. “Kutyochela kwa mundu jumo, Jwalakwe ŵapanganyisye mitundu josope ja ŵandu.” (Masengo 17:26) Yeleyi yikugopolela kuti ŵandu wosope tuli ŵapaulongo. Myoyo patukwachimbisya ŵane soni kwatendela yindu yambone, jemanjaji akusaŵa ŵakusangalala. M’wejisoni tukusaŵa ŵakusangalala soni tukusamsangalasya Mlungu.

“Mŵeje . . . ŵakuweŵa [kapena kuti ŵakuwusimana mtima].”—AKOLOSE 3:12.

Naga tuli ŵakuwusimana mtima, ŵandu akusasangalala kuŵa ni m’weji. Akusaŵa ŵagopoka kuŵechetana nawe. Soni ngakusajogopa kutusalila patulemwisye ligongo akusamanyilila kuti ngatutumbila. Patumleŵele mundu jwine, kwanga mwakuwusimana mtima mpaka kumtamiche mtima pasi. Pa Misyungu 15:1 pakusati, “Kwanga kwakufasa kukusasimisya kutumbila, nambo maloŵe gakwela gakusakolechesya ukali.”

“Kupeleka kukusampa upile mundu kulekangana ni kupochela.”—MASENGO 20:35.

Ŵandu ŵajinji masiku agano ali ŵa umbombo soni ŵangaganichisya ŵane. Nambo mundu akusaŵa jwakusangalala mnope naga akusiŵakamuchisya ŵane. (Luka 6:38) Ŵandu ŵakupeleka akusaŵa ŵakusangalala ligongo akusalosya kuti akusanonyela mnope ŵandu kulekangana ni yindu yakwete. Chinonyelo chelechi chikusichatendekasya kuyamichila ŵane paŵakamuchisye. (Akolose 3:15) Ni aliwusye kuti ‘ana ngusanonyela kukunguluka ni ŵandu ŵapi, ŵa umbombo soni ŵangayamichila? Kapena ŵakupeleka soni ŵakuyamichila?’ Pelepa ngani jili jakuti, atendeje yindu yakusasaka kuti ŵane ŵatendeleje wawojo.—Mateyu 7:12.