Ligongo Chichi Ŵandu Ngakusaliwona Mwakuŵajilwa?
LIGONGO CHICHI KULIWONA MWAKUŴAJILWA KULI KWAKUSOSEKWA MNOPE?
Ŵandu ŵakusaliwona mwakuŵajilwa soni kuliwona kuti ali ŵakusosekwa ngakusajimika makono pasimene ni yakusawusya. Jemanjaji akusatenda yampaka akombole kuti amalane ni yakusawusyayo.
-
Ŵakuwungunya ŵapatile kuti ŵandu ŵele akusalikayichila mnope yikusaŵa yangasawusya kuti atande kudandawula, kulagasika mnope nganisyo, soni nganonyela kulya. Jemanjaji mpaka amweje mnope ukana soni kukamulichisya masengo mitela mwangakuya malangiso.
-
Ŵandu ŵakusaliwona mwakuŵajilwa soni kuliwona kuti ali ŵakusosekwa akusaŵambala kuliwanichisya ni ŵane. Yeleyi yikusiyakamuchisya kuti akungulucheje chenene ni ŵandu soni kupata achimjawo ŵambone. Mwakulekangana ni yeleyi, ŵandu ŵakusalikayichila akusagamba kulola yakulemwecheka ya achimjawo yayikusatendekasya kuti akaŵa nawo paunasi wambone.
-
Ŵandu ŵakusaliwona mwakuŵajilwa akusakombola kupilila pasimene ni yakusawusya mwamti ngakusakunda kuti yakusawusyayo yalepelekasye kukwanilisya yakulinga yawo. Nambo mwakulekangana ni yeleyi, ŵandu ŵele akusaliwona kuŵa ŵangali mate pasimene ni yakusawusya yamnono akusayiwona mpela litumbi lyekulungwa lyamti nganaŵa akombwele kukwela mwamti akusawujila munyuma mwachitema.
YAMPAKA ATENDE KUTI ALIWONEJE MWAKUŴAJILWA
Asaguleje achimjawo ŵampaka ŵalimbikasye. Akungulucheje ni ŵandu ŵakusachimbichisya achimjawo, ŵampaka ŵakamuchisye pakusimana ni yakusawusya, soni ŵampaka ŵalimbikasye.
Ŵakamuchisyeje ŵane. Ŵatendeleje ŵane chanasa soni ŵakamuchisyeje atamose yili mkuti nganaŵa akombwele kwapa wawojo chindu chilichose. Naga akutenda yeleyi chachiŵa ŵakusangalala mnope ligongo lya kupeleka. Mpaka aŵepe ŵakusangalala atamose ŵandu ŵane ali ngakuyamichila yakutendayo.
Ŵakamuchisyeje ŵanache ŵawo kuti aliwoneje mwakuŵajilwa. Ŵakundeje ŵanache ŵawo kuti apateje matala gampaka akamulichisye masengo pakumasya yakusawusya yasimene nawo naga mpaka akombole ŵanachewo. Kutenda yeleyi kuchikamuchisya ŵanachewo kuti akombole kupilila yakusawusya yampaka asimaneje nayo. Nambosoni yichakamuchisya pachachikulapo.
YATUKUSATENDA ŴA MBONI SYA YEHOFA
Misongano soni pologalamu jakwajiganya ŵandu Baibulo jakusatenda ŵa Mboni sya Yehofa yikusiyakamuchisya ŵandu kuti akole umi wakusangalala soni kuti akalikayichilaga.
MISONGANO JATUKUSATENDA WIKI JILIJOSE
Pamisongano jeleji tukusapikanila ngani sya m’Baibulo syasikusasala yampaka tutende kuti tukaliwonaga kuŵa ŵandu ŵangasosekwa. Misonganoji jikusaŵa jalulele soni tukusampochela mundu jwalijose. Payiche pamisongano jetu chachilijiganya . . .
-
ligongo lyakwe wawojo ali ŵakusosekwa mnope kwa Mlungu
-
yampaka atende kuti aŵeje ŵakusangalala
-
yampaka atende kuti aŵe paunasi wambone soni wakulimba ni achimjawo
Chachisimanasoni ni achimjawo ŵampaka ‘ŵasamalile’ yisyesyene wawojo.—1 Akolinto 12:25, 26.
Kuti amanyilile yejinji pakwamba misongano jetu, awungunye pa jw.org kafidiyo kakuti Ana ku Nyumba ja Uchimwene Kukusatendekwa Yamtuli?
POLOGALAMU JAKWAJIGANYA ŴANDU BAIBULO
Tukusakamulichisya masengo buku ja Asangalaleje Mpaka Kalakala pakwajiganya ŵandu Baibulo mwalulele. Buku jeleji jikwete yindu mpela malemba gejinji, mfundo syakamuchisya kuganichisya, yiwusyo yakupikanika chenene, mafidiyo gakulimbikasya, soni yiwulili yakusalala mnope. Ŵandu patandite kulijiganya Baibulo ni m’weji yikwakamuchisyaga kuti atande kuliwona mwakuŵajilwa soni kuti aŵeje ŵakusangalala.
Naga akusaka kumanyilila ligongo lyakwe kulijiganya Baibulo ni ŵa Mboni sya Yehofa mpaka kwakamuchisye wawojo, awungunye pa jw.org kafidiyo kakuti Ligongo Chichi Tukusosekwa Kulijiganya Baibulo?
You May Also Like
AJIMUCHE!
Yampaka Atende Kuti Acimbicisyaneje
Ŵalombane akusosekwa kucimbicisyana ndaŵi syosope. Ana mpaka alosye catuli kuti akusiŵacimbicisya ŵamkwawo?
