Ligongo Chichi Ŵandu Ngakwachimbichisyaga Achimjawo?

ALOLELE

LIGONGO CHICHI KWACHIMBICHISYA ŴANE KULI KWAKUSOSEKWA?

Kwachimbichisya ŵane kukusakamuchisya kuti patutindene nawo chiyawo tuŵe nawosoni pamtendele.

Msyungu wine wa m’Baibulo ukusasala kuti, “Kwanga kwakufasa kukusasisimisya kutumbila, nambo maloŵe gakwela gakusakolechesya ukali.” (Misyungu 15:1) Kuŵecheta yindu yachipongwe soni yangachimbichisya ŵane yili mpela kutaga mawuta pamoto soni yakuchisya yakwe ndaŵi syejinji yikusaŵa yakogoya.
Yesu jwasasile kuti, “Pakamwa pakusaŵecheta yayigumbele mumtima.” (Mateyu 12:34) Naga tukusaŵechetaga yindu yangachimbichisya ŵane yikusagamba kulosya kuti ngatukusanonyela ŵandu ŵatukulekangana nawo kawoneche, mtundu, chilambo, soni ŵatukusalekangana nawo kapate ka yindu soni majiganyo.

Kuwungunya kwakwatendekwe pachangakaŵapa ŵapatile kuti pa ŵandu ŵakupunda 32,000 ŵakutyochela m’yilambo 28, ŵandu 65 pa 100 ŵaliwose, ŵasasile kuti ndamo jangachimbichisya ŵane jiyikene pakusakala mnope kulekangana ni kalakose.

YAMPAKA ATENDE KUTI AKOMBOLEJE KWACHIMBICHISYA ŴANE

Chinga ali ku sukulu kapena ku masengo ŵachimbichisyeje ŵandu atamose yili mkuti ngakusangalala ni yindu yakutenda. Aloleje yindu yambone yakutenda achimjawowo yampaka yasangalasye wawojo. Kutenda yeleyi mpaka kwakamuchisye kuti ŵawoneje mwakuŵajilwa ŵane soni kuti akawelusyaga.

“Mleche kwawelusya ŵane kuti nombe jemanja Mlungu akam’welusya.”—Mateyu 7:1.

Ŵatendeleje ŵane yindu yakusasaka kuti jemanjajo ŵatendele wawojo. Naga akusiŵatendela ŵandu ŵane yindu yambone, yili yangakayikasya kuti nombe jemanjajo mpaka ŵatendele wawojo yindu yambone.

“Yindu yimkusaka kuti ŵandu amtendele, jemanjasoni mwatendeleje yeleyo.”—Luka 6:31.

Ŵakululuchileje ŵane. Naga mundu jwine ŵaŵechetele maloŵe gachipongwe, akayikosyaga yaŵecheteyo.

“Lunda lukusamtendesya mundu kuŵa jwangatumbila chitema, uchimbichimbi wakwe ugonile pangayikosya ya chipongwe yakusamtendelaga ŵandu.”—Misyungu 19:11.

YATUKUSATENDA ŴA MBONI SYA YEHOFA PAKWACHIMBICHISYA ŴANDU

Ŵa Mboni sya Yehofawe tukusitwachimbichisya ŵandu kumadela gatukusatama soni kumalo gatukusakamula masengo.

Tukusitwajiganya ŵandu Baibulo mwalulele. Tukusatenda yeleyi kwa mundu jwalijose nambo ngatukusamkanganichisya kuti akuyeje kapena kukulupilila yatukumjiganyayo. Mmalomwakwe tukusakamulichisya masengo yajikusatusalila Baibulo kuti tulalichileje utenga wetu “mwakuwusimana mtima soni mwauchimbichimbi wekulungwa.”—1 Petulo 3:15; 2 Timoteyo 2:24.

Tukusaŵambala lusagu. Tukusatenda yeleyi mwakwapochela ŵandu ŵa mtundu uliwose ŵayiche kumisongano jetu ligongo lyakuti akusaka kulijiganya Baibulo. Tukusalingalinga kwapikanichisya soni ‘kwachimbichisya ŵandu wa mtundu uliwose.’—1 Petulo 2:17.

Tusachimbichisya ŵakulamulila ŵa boma mu yilambo yatukusatama. (Aloma 13:1) Tukusapikanila malamusi ga boma soni tukusapeleka misongo. Atamose kuti ngatukusajinjilila nawo yandale nambo tukusachimbichisya yasagwile ŵandu ŵane pangani jeleji.

AJIMUCHE!