Kukululuchila kukusagopolela kumasya kutumbila kulikose soni ngasunga chakulukosi ŵane patulemwechesye. Kukululuchila nganikuŵa kwamba kunandiya yakulemwecheka kapena kwamba kuyilechelela.

MFUNDO JA M’BAIBULO: “Mpitilisye kupikana ya ŵane soni kululuchilana ni mtima wosope atamose jwine ali akwete ligongo lyakudandawulila ya mjakwe.”—Akolose 3:13.

Aaron jwatite, “Naga mkusamnonyela mjenu ngamkusagamba kulola yakulemwecheka yakusatenda mjenujo, m’malo mwakwe mkusalola yambone yakulingalinga kutenda.”

Kusunga chakulukosi mpaka kujonanje ulombela wawo, chilu, soni nganisyo.

Julia jwatite, “Lisiku line ŵamkwangu ŵambepesye ligongo lya yindu yaŵandendele yayambwetekaga mu mtima. Nambo yaliji yakusawusya kuti nakululuchile. Pambesi pakwe nakululuchile. Nambope nalijimbaga magambo ligongo lyangakululuchila mwachitema. Yeleyi yatendekasisye kuti papagwe yakusawusya yine.”

ALIWUNGUNYE

Naga ŵamkwawo chiŵaŵechetele kapena kwatendela yindu yakupweteka, chaliwusye kuti:

• ‘Ana ndili mundu jwakwanguya kutumbila?’

• ‘Ana andemwechesye chindu chekulungwa chakusosekwa kumbepesya kapena mpaka ngambe kuchiliŵalila?’

AKAMBILANEJE NI ŴAMKWAWO

• Ana pakusajigala ndaŵi jelewu chamtuli kuti tukululuchilane?

• Ana mpaka tutende wuli kuti tukululuchilaneje mwachitema jwine palemwisye?

ALINJE KUTENDA AYI

• Naga atulemwechesye, tukawutuchila ganisya kuti ŵamkwetuwo akwete chakulinga chakusakala.

• Alinjejelinjeje kwakululuchila ŵamkwawo ligongo lya ndamo syawo pakumbuchila kuti “wosopewe tukusalemwesya ndaŵi syejinji.”—Yakobo 3:2.

Jwamkongwe jwine lina lyakwe Kimberly jwatite, “Yikusaŵa yangasawusya kululuchilana pamlemwisye wosope. Nambo naga jwalemwisyejo ali mundu jumo, yikusaŵa yakusawusya kumkululuchila. Myoyo kunda kupepesya soni kululuchilana kukusasosekwa kuŵa ŵakulinandiya yisyesyene.”

MFUNDO JA M’BAIBULO: “Mjanguyeje kumasya ngani.”—Mateyu 5:25.