Nambope, maŵasa gane ngagakusakamulichisya masengo yipangiso yamakono mwakuŵajilwa, yayikusatendekasya kuti ŵalombane . . .

• akapataga ndaŵi jakunguluchila yimpepe.

• atamileje kutenda yindu ya kumasengo atamose pali kunyumba.

• akayichilaneje soni kusisilana yindu yine.

APATEJE NDAŴI JAKUNGULUKA NI ŴAMKWAWO

Michael jwatite, “Ndaŵi sine pandili ni ŵamkwangu yikusaŵa mpela ndili jikape. Ŵamkwanguŵa ndaŵi syosope akusatamila kulola mameseji mufoni.” Nombe Jonathan jwasasile kuti, “Mpaka yisimanikwe kuti ŵalombane ali yimpepe nambo ni kutendaga yindu mpela atemi malo gakulekangana.”

YAKUSOSEKWA KUYIGANICHISYA: Ana akusamalila ndaŵi jelewu chamtuli ali mkwimba foni, kulemba kapena kulola mameseji pandaŵi jakukunguluka ni ŵamkwawo?—AEFESO 5:33.

MWAKUSAGAWONELA MASENGO

Ŵandu ŵane akusapitilisyape kukamula masengo atamose pali kunyumba ligongo lya mtundu wa masengo gawo. Nambo pana ŵane ŵakusalikanganichisyape kukamala masengo pali kunyumba atamose kuti ngakusosekwa kutenda yeleyo. Jwamlume jwine lina lyakwe Lee jwajitichisye yeleyi. Jwalakwe jwatite, “Yikusaŵa yakusawusya kuti ngajanga foni kapena kulola meseji jakutyochela kumasengo, pandaŵi jangukunguluka ni ŵamkwangu.” Nombe jwamkongwe jwine lina lyakwe Joy jwatite, “Ngusakamulila masengo kunyumba, mwamti gakusandupila mnope. Myoyo yikusasosekwa kuganisya chenene kuti manyilile ndaŵi jakusosekwa kwimichila kaje.”

YAKUSOSEKWA KUYIGANICHISYA: Ana akusiŵapikanila ŵamkwawo pakuŵecheta?—LUKA 8:18.

KUKULUPICHIKA

Ŵandu ŵajinji akusaŵecheta kuti yindu yakusaŵika pamalo gakunguluchila ga pa intaneti yikusatendekasya kuti ŵandu ŵalombane akakamulanaga. Ŵane mwajemanjaji ŵasasile kuti akusaŵika yindu yine pa intaneti, yakusaka kuti ŵamkwawo akamanyilila.

Ŵandu ŵane akusakulupilila kuti malo gakunguluchila ga pa intaneti gali gakogoya ligongo mpaka gatendekasye ulombela kusokonechela kapena jumo mulombela kutenda chikululu. Ni ligongo lyakwe maloya gagakusalondesya ngani syakumala kwa ulombela gakusasala kuti malo gakunguluchila ga pa intaneti ni gagakutendekasya kuti malombela gamaleje.

YAKUSOSEKWA KUYIGANICHISYA: Ana akusakunguluka mwakusisa ni mundu jwanganaŵa ŵamkwawo?—MISYUNGU 4:23.

AŴICHEJE YINDU YAKUSOSEKWA MNOPE PAMALO GANDANDA

Mundu jwangakusanonyela kulya ngakusakola chilu chambone. Mwakulandana ni yeleyi, mundu jwakusalepela kupata ndaŵi jakunguluka ni ŵamkwakwe akusatendekasya kuti mwiŵasa mwakwe muŵe yakusawusya.—Aefeso 5:28, 29.

Asagule pasipa yindu yakusaka kuyikamulichisya masengo, kapena alembe yiliyose yakuyiwona kuti mpaka yakamuchisye kuti yipangiso yamakono yikasokonasya ulombela wawo.

• Alolechesyeje kuti lisiku lililyose akoleje ndaŵi jakulya yimpepe ni ŵamkwawo

• Akoleje ndaŵi jangakamulichisya masengo yipangiso yamakono

• Alinganyeje ndaŵi jakuti atendeje yindu yakusangalasya ni ŵamkwawo

• Aŵicheje yipangiso yawo yamakono pakutalichila ni pamalo gakusagona

• Alinganye yakuti aŵechetaneje ni ŵamkwawo kwa 15 minisi pali pangali chakusokonasya chilichose

• Lisiku lililyose akoleje ndaŵi jakusimisya intaneti pa yipangiso yawo yamakono