1. Ana ŵandu ŵane akusaganisya yamti uli pangani jakutama ni umi mpaka kalakala?

 ŴANDU ŵajinji akusalingalinga kulya yakulya yambone soni kutenda masewela gakulimbisya chilu ndaŵi syosope. Akusatenda yeleyi ni chakulinga chakuti akole yilu yambone. Nambope, jemanjaji akusamanyilila kuti kutenda yindu yeleyi nganikuŵa kwakamuchisye kuti akakalambala soni akawa. Mwamti akusayiwona kuti nganaŵa akombwele kutama ni umi mpaka kalakala. Atamose yili myoyo, Yesu jwaŵechete maloŵe gakulosya kuti yili yakomboleka kupata “umi wangamala” mpela mwakusaŵechetela pa Yohane 3:16 soni pa Yohane 5:24.

2. Ana buku ja Yohane chaputala 6 jikusasala yamti uli pakwamba ya umi wangamala? (Yohane 6:​39, 40)

² Pandaŵi jine, Yesu jwatesile chakusimonjesya mwakwapa mkate soni somba ŵandu masausande gejinji. a Yaŵatesile Yesuyi yaliji yakusangalasya, nambo palisiku lyakuyichisya jwalakwe jwasasile chindu chine chachasimonjesye mnope ŵanduwo. Gulu ja ŵandu jamkuyisye jwalakwe ku Kapelenawo. Mwamti ali kweleko jwasalile jemanjajo kuti ŵandu ŵaŵawile chachijimuka soni chachisangalala ni umi mpaka kalakala. (Aŵalanje Yohane 6:​39, 40.) Aganichisye ya achimjawo soni ŵachinasi ŵawo ŵaŵawile. Maloŵe ga Yesuga gakulosya kuti ŵandu ŵajinji ŵaŵawile mpaka ajimuche ku chiwa soni wawojo pampepe ni ŵachinasi ŵawo mpaka yiŵe yakomboleka kuti chasangalale ni umi wangamala. Gulu ja ŵandujo nganijipikanichisya maloŵe gane ga Yesu gagakusasimanikwa m’buku ja Yohane chaputala 6. Kwende tukambilane maloŵe gelega.

3. Ana Yesu jwasasile yamti uli pa Yohane 6:51?

³ Gulu ja ŵandu jijasongene ku Kapelenawo jakuweni kukamulana kukwapali pasikati pa mkate waŵapele Yesu jemanjaji soni mana  giŵapele Yehofa Ayisalayeli. Mwamti pakwamba ya managa, Baibulo jikusasala kuti jaliji “mikate jakutyochela kwinani.” (Sal. 105:40; Yoh. 6:31) Yesu jwakamulichisye masengo mana pakusaka kwajiganya ŵanduwo chindu chakusosekwa mnope. Atamose kuti mana chaliji chakulya chakusimonjesya chachatyochele kwa Mlungu, nambope mkupita kwandaŵi ŵandu wosope ŵaŵalilewo ŵawile. (Yoh. 6:49) Mwakulekangana ni yeleyi, Yesu jwalikolasile kuti ali “mkate usyesyene wakutyochela kwinani,” soni “mkate wakusapeleka Mlungu” nambosoni “mkate wakupeleka umi.” (Yoh. 6:​32, 33, 35) Yesu jwalondesisye kulekangana kukwapali pasikati pa mana ni jwalakwejo. Jwalakwe jwatite, “Une ndili mkate wakupeleka umi wawayiche kutyochela kwinani. Naga mundu akulya mkate welewu chachitama ni umi mpaka kalakala.” (Aŵalanje Yohane 6:51.) Maloŵe gelega gasokonasisye mnope Ayuda ŵaŵapali pandaŵijo. Jemanjaji nganapikanichisya ligongo lyakwe Yesu jwasasile kuti jwaliji mkate wakutyochela kwinani. Nambosoni kuti “mkate” welewu waliji wambone mnope kupunda mana gele Mlungu ŵapele Ayisalayeli ŵaŵaliji achinangolo ŵawo. Kaneko Yesu ŵasalile jemanjajo kuti, “Mkate welewu ukwimila chilu changu.” Ana jwalakwe jwagopolelaga chichi pelepa? Tukusosekwa kumanyilila yaŵagopolelaga Yesu ligongo kwanga kwa chiwusyochi ni kwampaka kutukamuchisye kumanyilila yindu yayikusatendekasya kuŵa yakomboleka kutama ni umi wangamala. Kwende tulole yaŵagopolelaga Yesu.

MKATE WAKUPELEKA UMI SONI CHILU CHAKWE

4. Ligongo chichi ŵandu ŵane ŵasimonjile mnope ni yindu yaŵasasile Yesu?

⁴ Ŵandu ŵajinji ŵasimonjile mnope paŵampikene Yesu ali mkuŵecheta yakwamba kupeleka ‘chilu chakwe kuti chilambochi chipate umi.’ Komboleka kuti ŵanduŵa ŵaganisyaga kuti Yesujo akusaka kuti jemanjaji alye chilu chakwe chisyesyene. (Yoh. 6:52) Nambo kaneko Yesu jwasalilesoni chindu chine chele komboleka chasimonjesyesoni mnope. Jwalakwe jwatite, “Naga ngamkulya chilu cha Mwanache jwa mundu soni kumwa myasi jakwe, ngasimpata umi.”—Yoh. 6:53.

5. Ana chichi chachikutusimichisya kuti Yesu nganagopolelaga kuti ŵanduwo ŵasosekwaga kumwa myasi jakwe jisyesyene?

⁵ M’masiku ga Nowa, Mlungu ŵalekasisye ŵakutumichila ŵakwe kulya myasi. (Gen. 9:​3, 4) Yehofa jwawilisyesoni lilamusi lyakulekasya kulya myasili pajwapelekaga Chilamusi kwa Ayisalayeli. Mwamti mundu jwalijose jwakulya myasi ‘ŵasosekwaga kumwulaga.’ (Lef. 7:27) Nombe Yesu jwachimbichisyaga mnope lilamusili. (Mat. 5:​17-19) Myoyo yikaliji yangapikanikasoni kuti jwalakwe ajilimbikasye gulu ja Ayuda jila kulya chilu chakwe soni kumwa myasi jakwe. Nambope, chakulinga cha Yesu pakamulichisya masengo maloŵe gakusawusya kugapikanichisyaga, chaliji kwajiganya jemanjaji yampaka atende kuti apate “umi wangamala.”—Yoh. 6:54.

6. Ana tukumanyilila chamti uli kuti maloŵe gagakusasimanikwa pa Yohane 6:53 galiji gakuwanichisya?

⁶ Ana Yesu jwagopolelaga chichi pajwasalaga ya kulya chilu chakwe soni kumwa myasi jakwe? Pelepatu Yesu jwagambaga kuŵecheta yindu mwakuwanichisya mpela muŵatendele ni jwamkongwe jwa Chisamaliya. Jwalakwe ŵamsalile kuti, “Jwalijose jwakumwa mesi gangumpa une, ngasijimkolasoni njota ata panandi, soni mesi gele chinjimpago gachiŵa mwa jwalakwejo mpela nduluko ja mesi gakumpa umi wangamala.” (Yoh. 4:​7, 14) b Apatu jwalakwe nganagopolelaga kuti jwamkongwe jwa Chisamaliyaju chachipata umi wangamala naga jwalakwejo akumwa mesi ganegakwe. Mwakulandana ni yeleyi, Yesu pajwaŵechetanaga ni gulu ja ŵandu ku Kapelenawo, nganagopolelaga kuti jemanjajo chachipata umi wangamala naga akulya chilu chakwe chisyesyene soni kumwa myasi jakwe.

 KULEKANGANA KWAKUPALI PASIKATI PA YAKUTENDEKWA YIŴILI

7. Ana ŵandu ŵane akusasala yamti uli pakwamba ya maloŵe ga Yesu ga pa Yohane 6:53?

⁷ Ŵandu ŵane akusaŵecheta kuti maloŵe gagakusasimanikwa pa Yohane 6:53 gagakusala ya kulya chilu cha Yesu soni kumwa myasi jakwe, gagambaga yayatendekwe pa mwambo wa Chakulya Chaligulo cha Ambuje. Jemanjaji akusaganisya yeleyi ligongo lyakuti pandaŵi ja mwambo welewu, Yesu jwakamulichisyesoni masengo maloŵe gakulandanago. (Mat. 26:​26-28) Jemanjaji akusasala kuti mundu jwalijose jwasimanikwe nawo pa mwambo wa Chakulya Chaligulo cha Ambuje, akusasosekwa kulya mkate soni kumwa finyo yayikusasimanikwa pa mwambowu. Ana yeleyi yili yisyene? Yili yakamuchisya mnope kumanyilila naga yakusaganisya jemanjaji yili yisyene kapena yaunami. Yili myoyo ligongo lyakuti chaka chilichose ŵandu mamiliyoni gejinji akusasongana yimpepe ni m’weji pa mwambo welewu. Kuti tupikanichisye nganiji, chitukambilane kulekangana kwakupali pasikati pa maloŵe ga Yesu gagakusasimanikwa pa Yohane 6:​53, soni maloŵe gane gajwaŵechete Yesu pa mwambo wa Chakulya Chaligulo cha Ambuje.

8. Ana yakutendekwa yiŵili yatukambileneyi yikusalekangana chamti uli? (Alolesoni yiwulili.)

⁸ Kwende tulole kulekangana kuŵili kwakupali pasikati pa yakutendekwa yeleyi. Chandanda, Ana maloŵe ga Yesu ga pa Yohane 6:​53-56 ŵagaŵechetele kwapi soni pandaŵi japi? Jwalakwe jwaŵechete maloŵega ku gulu ja Ayuda ku Galileya mu 32 C.E. Pandaŵiji kwaliji kuli kusigele chaka  chimpepe kuti jwalakwe atandisye mwambo wa Chakulya Chaligulo cha Ambuje ku Yelusalemu. Chaŵili, ana maloŵe gakwega ŵasalilaga ŵandu ŵamti uli? Jwalakwe jwasalilaga ŵandu ŵajinji ŵaŵampikanilaga ku Galileya ŵaŵagambaga kusaka kupata yakusosekwa yakuchilu, nambo ŵanganasakaga kulijiganya yakwamba Uchimwene wa Mlungu. (Yoh. 6:26) Mwamti Yesu pajwagambile kwasalila yindu yele yasawisye jemanjajo kuyipikanichisya, mwachitema ŵalesile kumkulupilila. Atamose ŵane mwa ŵakulijiganya ŵakwe ŵalesile kumkuya jwalakwe. (Yoh. 6:​14, 36, 42, 60, 64, 66) Nambotu ŵandu ŵeleŵa ŵaliji ŵakulekangana mnope ni ŵandumetume 11 ŵakulupichika ŵa Yesu ŵaŵasimanikwe pa mwambo wa Chakulya Chaligulo cha Ambuje wawatendekwe pali papitile chaka mu 33 C.E. Pandaŵiji ŵandumetumeŵa ŵaliji yimpepe ni jwalakwejo atamose kuti nganapikanichisya yindu yosope yajwajiganyaga Yesujo. Atamose kuti yaliji myoyo, jemanjaji ŵakulupilile kuti Yesu jwaliji Mwanache jwa Mlungu soni kuti jwatyochele kwinani. Yeleyi yaliji yakulekangana ni yaŵatesile ŵandu ŵaŵasongene ku Galileya ŵala. (Mat. 16:16) Mwamti pakwayamichila ŵandumetume ŵakweŵa Yesu jwatite, “Jemanja mŵele ni une mu yakusawusya yangu.” (Luk. 22:28) Kulekanganaku kukwamba kulosya kuti pa Yohane 6:​53, Yesu nganalondesyaga ya yindu yayichitendekwa pa mwambo wa Chakulya Chaligulo cha Ambuje. Sonitu pana magongo gejinji gakututendekasya kuŵecheta yeleyi.

YAŴAŴECHETE YESUYI YIKWAKWAYASONI WAWOJO

9. Ana maloŵe ga Yesu gaŵaŵechete pa Chakulya Chaligulo cha Ambuje gajawulaga kwa ŵani?

⁹ Pa mwambo wa Chakulya Chaligulo cha Ambuje, Yesu ŵapele ŵandumetume ŵakwe mkate wangali chakusasaŵisya soni ŵasalile jemanjajo kuti mkatewo wajimilaga chilu chakwe. Kaneko ŵapele finyo soni ŵasalile kuti jwajimilaga ‘myasi ja chilangano.’ (Maliko 14:​22-25; Luk. 22:20; 1 Akoli. 11:24) Yindu yajwasasile jwalakwejo yakwamba chilanganochi yili yakusosekwa mnope. Chilangano chasambanochi ŵatesile ni “nyumba ja Yisalayeli [jwausimu]” ŵaŵaliji ŵandu ŵachachilamulila ni Yesu mu “Uchimwene wa Mlungu,” ngaŵaga mundu jwalijose. (Aheb. 8:​6, 10; 9:15) Pandaŵijo ŵandumetumewo nganapikanichisya ya chilanganochi. Nambo ŵaliji ali asigele panandi kuti asagulidwe ni msimu weswela kuti aŵe mu chilangano chasambano ni kuja kulamulila yimpepe ni Yesu kwinani.—Yoh. 14:​2, 3.

10. Ana pana kulekangana kwamti uli pasikati pa yindu yiŵaŵechete Yesu ali ku Galileya ni yindu yiŵaŵechete pa mwambo wa Chakulya Chaligulo cha Ambuje? (Alolesoni chiwulili.)

¹⁰ Maloŵe gajwasasile Yesu pa Chakulya Chaligulo cha Ambuje gajawulaga kwa “kagulu ka ngondolo.” Kagulu kamwanaka katandite ni ŵandumetume ŵakwe ŵakulupichika ŵiŵaliji yimpepe ni Yesujo paŵatandikasyaga mwambowu. (Luk. 12:32) Jemanjaji pampepe ni ŵandu ŵane ŵaŵaliji m’chilanganochi ni ŵaŵasosekwaga kulya mkate soni kumwa finyo pandaŵi jakutenda mwambo wa Chakulya Chaligulo cha Ambuje. Jemanjaji ni ŵaŵaliji ŵakuti chachijawula kwinani. Yindu yaŵasalile Yesu ŵandumetume ŵakwe pandaŵi ja mwambowu yalekanganaga ni yindu yaŵaŵechete ali ku Galileya. Tukuŵecheta yeleyi ligongo lyakuti yindu yaŵasasile Yesu pa mwambowu yagambaga kwakwaya ŵandu ŵakuŵalanjikape. Pele maloŵe gaŵaŵechete Yesu ali ku Galileya gakwayaga ŵandu ŵajinji.

11. Ana ni yindu yapi yaŵaŵechete Yesu ali ku Galileya yayalosisye kuti nganasalaga ya ŵandu ŵakuŵalanjikape?

¹¹ Yesu pajwaliji ku Galileya mu 32 C.E., jwaŵechetaga ni gulu ja Ayuda ŵaŵagambaga kusaka kuti jwalakwejo ŵape mkate basi. Nambo Yesu jwakamuchisye jemanjaji kumanyilila kuti papali chindu chakusosekwa mnope kupunda chakulya. Mwamti chindu chelecho chikakamuchisye kupata umi wangamala. Yesu jwasasilesoni kuti ŵandu ŵaŵawile chachijimuka palisiku lyakumalisya soni chachiŵa ni umi mpaka kalakala.  Pelepatu jwalakwe nganasalaga ya ŵandu ŵakuŵalanjika mpela muyaŵelele pajwatandisyaga mwambo wa Chakulya Chaligulo cha Ambuje. Nambo jwalakwe pajwaŵechetaga ali ku Galileya, jwasalaga ya upile wachachipata ŵandu ŵajinji. Mwamti jwasasile kuti, “Naga mundu akulya mkate welewu chachitama ni umi mpaka kalakala; . . . Mkate welewu ukwimila chilu changu chele chinjichipeleka kuti chilambochi chipate umi.”—Yoh. 6:51. c

12. Ana mundu akusasosekwa kutenda chichi kuti apate umi wangamala?

¹² Yesu nganiŵasalila Ayuda ŵaŵaliji ku Galileya kuti mundu jwalijose chachipata umi wangamala. Nambo jwalakwe jwasasile kuti ŵandu ŵachachikola upilewu ali ŵandu ŵele pewo ‘ŵachachilya mkatewu,’ kwakuli kumkulupilila jwalakwejo. Ŵandu ŵajinji masiku agano, akusasala kuti akusamkulupilila Yesu soni kuti jwalakwejo ali mkulupusyo jwawo. (Yoh. 6:29) Nambotu ŵandu ŵajinji ŵaŵaliji mu gulu ja ŵandu ŵaŵasimanikwe ku Galileya nombenawo ŵamkulupilile Yesu nambo kaneko ŵalesile kumkulupilila. Ligongo chichi jemanjaji ŵatesile yeleyi?

13. Ana mundu akusosekwa kutenda chichi kuti aŵe jwakumkuya jwa Yesu jusyesyene?

¹³ Ŵandu ŵajinji ŵiŵaliji pa gulu jila ŵamkuyaga Yesu ligongo lyakuti jwalakwejo jwapaga yindu yaŵasakaga. Jemanjaji ŵagambaga kusangalala ni yindu mpela kwaposya mwakusimonjesya, chakulya chalulele, nambosoni yijiganyo yiyakamulanaga ni yakusaka yawo. Nambope, Yesu jwasasile kuti ŵakumkuya ŵakwe akusasosekwa kutenda yindu yejinji kupunda yeleyo. Jwalakwe jwasasile mwakupikanika chenene kuti nganayika pachilambopa pakwamba kusaka kwapa ŵandu yakusaka yawo. Nambo jemanjajo ŵasosekwaga “kwika  kwa” jwalakwejo mwakupikanila soni kukuya yosope yajwajiganyaga.—Yoh. 5:40; 6:44.

14. Ana tukusosekwa kutenda chichi kuti tupindule ni mbopesi ja chilu soni myasi jiŵapeleche Yesu?

¹⁴ Yesu ŵasalile Ayuda ŵaŵampikanilagawo kuti kupitila mu mbopesi ja chilu soni myasi jachachipeleka jwalakwejo yichiŵa yakomboleka kutama ni umi mpaka kalakala. Mwamti jemanjaji ŵasosekwaga kukulupilila yeleyo. Chikulupichi chaliji chakusosekwa mnope kwa Ayudawo, mwamti chili chakusosekwasoni kwa m’weji masiku agano. (Yoh. 6:40) M’wejisoni kuti tupindule ni mbopesi ja chilu soni myasi jiŵapeleche Yesu jakusajikolanga pa Yohane 6:​53, tukusasosekwa kukulupilila mnope mbopesiji. Mwamti ŵandu ŵajinji mpaka apindule ni mbopesiji.—Aef. 1:7.

15-16. Ana tulijiganyisye yindu yapi yakusosekwa mnope kutyochela mu buku ja Yohane chaputala 6?

¹⁵ M’buku ja Yohane chaputala 6, tulijiganyisye yindu yejinji yakusosekwa soni yakulimbikasya mnope. Tulijiganyisye kuti Yesu akusiŵanonyela mnope ŵandu. Pijwaliji ku Galileya, jwalakwe jwaposisye ŵakulwala soni ŵajiganyisye jemanjajo yakwamba Uchimwene. Konjechesya pelepa, Yesu jwatesile yakomboleka mwakwapa ŵanduwo yakulya yiŵasosechelaga. (Luk. 9:11; Yoh. 6:​2, 11, 12) Nambo chindu chakusosekwa mnope kupunda pa yosopeyi chaliji chakuti, jwasalile jemanjajo kuti jwaliji “mkate wakupeleka umi.”—Yoh. 6:​35, 48.

¹⁶ Myoyo, ŵandu ŵaŵakolasile jwalakwejo kuti ali “ngondolo sine” ŵangasosekwa kulya mkate soni kumwa finyo yayikusasimanikwa pa mwambo wa Chakulya Chaligulo cha Ambuje wawukusatendekwa chaka chilichose. (Yoh. 10:16) Atamose yili myoyo, jemanjaji akusalya mwakuwanichisya “mkate wakupeleka umi.” Akusatenda yeleyi mwakulupilila mnope mbopesi jakutuwombola jiŵapeleche Yesu Klistu, soni yindu yakusangalasya yayichikomboleka ligongo lya mbopesi jeleji. (Yoh. 6:53) Mwakulekangana ni yeleyi, ŵandu ŵakusalya mkate soni kumwa finyo akusalosya kuti ali mu chilangano chasambano soni akwete chembecheyo chakuja kulamulila mu Uchimwene wakwinani. Myoyo, chinga tukwete chembecheyo chakwawula kwinani kapena tuli ŵa ngondolo sine, ngani jajili pa Yohane chaputala 6 jili jakusosekwa mnope kwa wosopewe. Nganiji jikusagombelechesya mnope kusosekwa kwakulosya chikulupi kuti chitupate umi wangamala.