1-2. Ana ni yindu yapi yampaka yitutendekasye kugwisya misosi?

 NDAŴI sine wosopewe pakwete patugwisisye misosi. Patusimene ni yindu yayikusatusangalasya mnope, mpaka tugwisye misosi ligongo lya chisangalalo. Komboleka kuti wawojo pakwete pagwisisye misosi ligongo lyakuti chatendechele chindu chinechakwe chakusosekwa kapena chakusangalasya mnope. Mwine yatendekwe yeleyi mwanache jwawo ali apagwile, kapena paŵakumbuchile yakusangalasya yineyakwe kapenasoni paŵawonegene ni mjawo jwa pamtima juŵasoŵene najo kwa yaka yejinji.

² Atamose yili myoyo, ndaŵi syejinji tukusalila ligongo lyakuti tusimene ni yipwetesi. Mwachisyasyo, ndaŵi sine mpaka tulile ligongo lyakuti mundu jwine jwatukusamdalila atutendele yindu yangali chilungamo. Ndaŵi sine mpaka tulile patukulwala soni naga kulwalako kukujigala ndaŵi jelewu. Nambosoni mpaka tulile ligongo lya chiwa cha jwakunonyelwa jwetu. Pandaŵi mpela syelesi, mpaka tulipikaneje mpela muŵatendele jwakulochesya Yelemiya pandaŵi jele ŵandu ŵa ku Babulo ŵajonasile msinda wa Yelusalemu. Mwamti Yelemiya jwatite, “M’meso mwangu mugamba kujilima misosi. . . . Misosi jangu tijichijilimaga mwangalechesya mpela lusulo.”—Mal. 3:​48, 49.

3. Ana Yehofa akusapikana wuli pakwawona ŵakutumichila ŵakwe ali mkulaga? (Yesaya 63:9)

³ Yehofa akusakumbuchila ndaŵi syosope syatuŵele tuli mkulila ligongo lya yakusawusya yatuŵele tuli mkusimana nayo. Mwamti Baibulo jikusatusimichisya kuti jwalakwe akusamanyilila yakusawusya yakusasimana nayo ŵakutumichila ŵakwe. Nambosoni akusapikana kulila kwetu patukumŵenda kuti atukamuchisye. (Sal. 34:15) Mwamti Yehofa akusatenda yejinji kupunda kwamba kuyiwona yakusawusya yetu soni kupikana patukumŵenda. Jwalakwe ali Mtati jwetu soni akusatunonyela mnope. Myoyo jwalakwe pakusatuwona tuli mkulila akusatutendela mnope chanasa soni kutukamuchisya mwachitema.—Aŵalanje Yesaya 63:9.

4. Ana chitukambilane yisyasyo yapi ya m’Baibulo, soni chitulijiganye chichi yakwamba Yehofa?

 ⁴ Kupitila m’Baibulo, Yehofa akusatusalila mwaŵapikanilaga mumtima pandaŵi jiŵalilaga ŵakutumichila ŵakwe soni yiŵatesile pakwakamuchisya jemanjajo. Mwachisyasyo, mpaka tumanyilile yeleyi mwakulola yiŵasimene nayo Hana, Daudi, soni Mwenye Hesekiya. Chitulijiganye chachatendekasisye jamanjaji kuti alile. Nambosoni chitulijiganye yiŵatesile Yehofa pakwakamuchisya. Kaneko chitukambilane yakusatenda Yehofa pakutulimbikasya patutengwiche, mundu jwatukusamdalila patukuŵesye, kapena patukulipikana kuti nganitukola chembecheyo chilichose.

PATUKULILA LIGONGO LYA CHIWA CHA MUNDU JWATUKUSAMNONYELA

5. Ana yajwasimanaga nayo Hana yamtendekasisye kuti apikaneje wuli mumtima?

⁵ Hana jwalisile mnope ligongo lyakuti jwasimanaga ni yakusawusya yejinji. Chimo mwa yakusawusya yiŵasimanaga nayo Hana chaliji chakuti jwaliji paulombela wa mitala. Mwamti jwamkongwe mjakwejo lina lyakwe Penina ŵamlagasyaga mnope Hana. Chakusawusya mnope chaliji chakuti Hana nganakola ŵanache pele Penina jwakwete ŵanache. (1 Sam. 1:​1, 2) Penina jwapitilisye kumŵechetela yachipongwe Hana ligongo lyakuti jwaliji jwangaŵeleka. Yikaŵe kuti yachipongweyi akwaŵechetela wawojo, ana akapikene uli mumtima? Hana jwatumbile mnope mwamti jwatamilaga ‘kulila soni nganalyaga yakulya’ yiliyose soni “yampweteche mnope” mumtima mwakwe.—1 Sam. 1:​6, 7, 10.

6. Ana chichi chachamkamuchisye Hana?

⁶ Ana chichi chichamlimbikasisye Hana? Chindu chichamkamuchisye jwalakwe chaliji chakuti jwanonyelaga kwawula ku nyumba ja Mlungu kukulambila. Hana pajwayiche chiŵandika mlango wakwinjilila m’nyumba ja Mlungu ‘jwatandite kupopela. . . [mpaka] ŵalisile mnope.’ Jwalakwe ŵamŵendile Yehofa kuti, ‘Akuwone kulagasika kwa une. . . soni kungumbuchila une.’ (1 Sam. 1:10b, 11) Hana ŵamsalile Yehofa yindu yosope yiyamlagasyaga soni mujwapikanilaga mumtima. Yehofa yamkwayiye mnope piŵam’weni Hana ali mkulila mwamti ŵamkamuchisye.

7. Ana ni chichi chichamkamuchisye Hana kuti akole mtendele wa mumtima?

⁷ Panyuma pakuti Hana amsalile Yehofa mujwapikanilaga mumtima, Eli juŵaliji Jwamkulungwa jwa Ŵakutaga Mbopesi ŵamsimichisye Hanajo kuti Yehofa chajanje lipopelo lyakwe. Yeleyitu yamtamiche mtima pasi Hana. Baibulo jikusati, “Jwamkongwejo ŵanyakwiche ni kwawulaga soni ŵalile, mwamti ngope jakwe nganijiwonekasoni jachanasa.” (1 Sam. 1:​17, 18) Atamose kuti yayamlagasyaga nganisyo Hana nganiyimala, nambope jwalakwe jwapatile mtendele wa mumtima. Yaliji myoyo ligongo lyakuti jwalakwe ŵamsalile Yehofa yosope yayamlagasyaga nganisyo. Mwamti Yehofa jwayiweni yayamlagasyaga nganisyo, jwapikene kulila kwakwe, soni kaneko ŵamkamuchisye Hana kuti akole mwanache.—1 Sam. 1:​19, 20; 2:21.

8-9. Mwakamulana ni Ahebeli 10:​24, 25, ligongo chichi tukusasosekwa kulingalinga kusimanikwa pa misongano? (Alolesoni chiwulili.)

⁸ Yatukulijiganya. Ana wawojo akulimbana ni yakusawusya  yineyakwe yayikwatendekasya kuti agambeje kulila? Komboleka kuti akulila ligongo lya chiwa cha jwachinasi jwawo kapena mjawo. Pandaŵi mpela jeleji, mwine mpaka asacheje kutama kwajika. Kutenda yeleyi kuli kwachipago. Nambo mpela muyaŵelele ni Hana, jwalakwe jwapatile mtendele wa mumtima ligongo lyakuti jwanonyelaga kwawula kunyumba ja Mlungu kukumtindiŵalila Yehofa. M’wejisoni mpaka tupate mtendele wa mumtima naga tukwawula kumisongano atamose yili mkuti nganitusakaga kwawulako. (Aŵalanje Ahebeli 10:​24, 25.) Patuli kumisongano tukusapikana malemba ga m’Baibulo gagakusatukamuchisya kuti tutyosye nganisyo syakulemwecheka ni kutanda kola nganisyo syambone. Yakuyichisya yakwe mpaka tutande kulipikana chenene atamose yili mkuti yakusawusyayo nganiyimala ndaŵi jijojo.

⁹ Pamisongano tukusasangalala kunguluka ni abale ni alongo ŵakusatuganichisya soni kutunonyela. Yeleyi yikusatukamuchisya kuti tukole mtendele wa mumtima. (1 Ates. 5:​11, 14) Aganichisye yiŵasimene nayo m’bale jwine jwalisoni mpayiniya jwapadela. M’baleju ŵamkwakwe ŵajasiche. Jwalakwe jwatite, “Ngusagwisyape misosi. Ndaŵi sine, ngusatama panepakwe mnyumba ni kulilaga. Nambo misongano ni jajikusanimbikasya mnope. Maloŵe gachinonyelo gakusambechetela abale ni alongo gakusandamika mtima pasi. Atamose kuti ngusalagasikaga mnope nganisyo, nambope pandili kumisongano ngusalipikana chenene.” Kusala yisyene, patuli pamisongano, Yehofa mpaka akamulichisye masengo abale ni alongo ŵetu kuti atukamuchisye.

10. Ana mpaka tukuye chamti uli chisyasyo cha Hana patukulagasika mnope nganisyo?

¹⁰ Hana jwapatilesoni mtendele wamumtima pijwamsalile Yehofa mujwapikanilaga mumtima. M’wejisoni mpaka ‘tumtulileje [Yehofa] yakudandawulisya yetu yosope,’ ni chikulupi chakuti jwalakwe chatukamuchisye. (1 Pet. 5:7) Mlongo jwine jwele ŵamkwakwe ŵawulajidwe ni yigaŵenga, jwatite,“Nalagasiche mnope nganisyo mwamti naganisyaga kuti nganimba mbelesoni jwakusangalala. Nambo kupopela kwa Yehofa, ni kukwangamuchisye kuti mtima wangu uŵe mmalo. Ndaŵi sine yasawusyaga kuti namsalile Yehofa mwanapikanilaga mumtima. Nambo palagasiche mnope nganisyo namŵendaga jwalakwe kuti angamuchisye. Yeleyi yangamuchisyaga kuti ngombole kukamula masengo ga palisikulyo.” Patukumsalila Yehofa yakusawusya yetu, jwalakwe yikusamkwayaga soni akusapikanichisya mwatukupikanila mumtima. Atamose kuti yakusawusya yetuyo nganiyiŵa yimasile ndaŵi jijojo, Yehofa akusatukamuchisya kuti mtima wetu uŵe mmalo. (Sal. 94:19; Afil. 4:​6, 7) Jwalakwe akusalola yosope yakusatenda kuti aŵe jwakulupichika kwa jwalakwe, mwamti chachapa upile.—Aheb. 11:6.

MUNDU JWATUKUSAMDALILA PATUTENDELE YINDU MWANGAKULUPICHIKA

11. Ana Daudi jwapikanaga wuli mumtima achimjakwe paŵamtendelaga yachipongwe?

¹¹ Paumi wakwe wosope, Daudi jwasosekwaga kupilila yakusawusya yejinji yayamtendekasyaga jwalakwe kuti agambeje kulila. Jwalakwe jwasimanaga ni yakusawusya kutyochela kwa ŵandu ŵane soni yakusawusya yine yatyochelaga kwa achimjakwe. (1 Sam. 19:​10, 11; 2 Sam. 15:​10-14, 30) Ndaŵi jine Daudi pajwasimene ni yakusawusya jwatite, “Machili gamalile ligongo lya kuwuwula. Chilo chosope ngusanyoŵesya bedi jangu ni misosi. Ngusalila mwamti misosi jangu jikusagumbalana pabedi jangu.” Ligongo chichi Daudi jwalisile chamti myiyi? Jwalakwe jwasasile kuti, “Ligongo lya ŵandu wosope ŵakundagasya.” (Sal. 6:​6, 7) Ŵandu piŵamtendelaga Daudi yindu yachipongwe jwalakwe jwalagasikaga mnope nganisyo mwamti yeleyi yamtendekasyaga kuti agambeje kulila.

12. Ana Daudi jwaliji jwakusimichisya ya chichi, mwakamulana ni yayili pa Salimo 56:8?

¹² Atamose kuti Daudi jwasimanaga ni yakusawusya yejinji, nambope jwalakwe jwakwete chikulupi chakulimba chakuti Yehofa ŵamnonyelaga. Jwalakwe jwalembile kuti, “Yehofa chachipikana kulila kwangu.” (Sal. 6:8) Pandaŵi jine, Daudi jwalembile ndakatulo jakusangalasya. (Aŵalanje  Salimo 56:8.) Maloŵe gagali mu ndakatuloji gakusatukamuchisya kumanyilila kuti Yehofa akusatunonyela mnope soni akusamanyilila mwatukusapikanila mumtima. Daudi jwayikene pakuyiwona mpela kuti Yehofa ajigele libotolo lyakuti misosi jakwe jigwilejemo kapena mpela kuti Yehofajo ajigele buku ni kulembagamo yakusawusya yajwasimanaga nayo. Pelepatu Daudi jwaliji jwakusimichisya kuti Yehofa jwamanyililaga soni kukumbuchila yakusawusya yajwasimanaga nayo. Nganakayichilagasoni kuti Atati ŵakwe ŵachinonyelo akumanyilila mujwalajilaga jwalakwejo ligongo lya yakusawusyayo.

13. Ana tukusosekwa tukumbuchileje chichi naga ŵandu ŵane atutengwisye? (Alolesoni chiwulili.)

¹³ Yatukulijiganya. Ana wawojo akulagasika nganisyo ligongo lya yindu yakutengusya kapena yindu yangakulupichika yijwatendele mjawo juŵamdalilaga? Kapena akulagasika mnope nganisyo ligongo lyakuti chitomelo kapena ulombela wawo yamasile mwangajembecheya? Mwinesoni akulagasika mnope nganisyo ligongo lyakuti mjawo jwa pamtima ŵalesile kumtumichila Yehofa? M’bale jwine jwele ŵamkwakwe ŵatesile chikululu soni kwaleka ulombela jwatite, “Nganingulupililaga ata panandi. Naliwonaga kuŵa jwangali mate, soni natamilaga kulila.” Naga akulagasika nganisyo ligongo lyakuti mjawo juŵamdalilaga ŵatendele yangakulupichika, kapena atengwiche ligongo lya yitendo ya ŵandu ŵane, mpaka apate mtendele wamumtima ligongo lyakumanyilila kuti Yehofa ngasiŵaleka jika wawojo. M’baleju jwasasilesoni kuti, “Sambano nayikopochele kuti pane mundu nganaŵa aŵele jwakulupichika. Nambo Yehofa ni jwali Lwala lwangu. Yiliyose yampaka yindendechele, Yehofa mpaka angamuchisyeje. Jwalakwe ngasiŵajasa ŵandu ŵakwe ŵakulupichika.” (Sal. 37:28) M’wejisoni tukusosekwa tukumbuchileje kuti Yehofa akusatunonyela mnope kupunda mwampaka atunonyelele mundu mjetu. Naga mundu jwatwamdalilaga atutendele yindu mwangakulupichika yikusatupweteka mnope. Atamose yili myoyo, tumanyilileje kuti Yehofa akusatuwonape kuti tuli ŵakusosekwa mnope. (Alo. 8:​38, 39) Tukusosekwa kumbuchila kuti, atamose mundu atutendele yindu yamti uli, Atati ŵetu ŵakwinani akusatunonyela mnope.

14. Ana maloŵe ga pa Salimo 34:18 gakutusimichisya ya chichi?

¹⁴ Maloŵe gaŵaŵechete Daudi pa Salimo 34:18 mpaka gatukamuchisye patukulimbana ni yindu yangali chilungamo. (Aŵalanje) Buku jine jasasile kuti maloŵe gakuti “ŵakasiche mtima” mpaka gagopolelesoni kuti “ŵandu ŵanganakola chembecheyo chilichose.” Ana Yehofa akusiŵakamuchisya chamti uli ŵandu ŵatengwiche mnopeŵa? Mwakulandana ni nangolo jwachinonyelo jwakusamkamula pamkono mwanache jwakwe soni kumlimbikasya, Yehofa akusaŵa chiŵandika ni m’weji soni akusatutendela chanasa. Nambosoni akusaŵa jwakoseka kutukamuchisya patutengwiche ligongo lya yindu yangakulupichika yatutendele mundu jwatwamdalilaga. Jwalakwe akusaŵa jwakoseka kutulimbikasya soni kututamika mtima pasi.  Nambosoni akusatupa yindu yejinji yayikusatukamuchisya kuti tukombole kupilila yakusawusya yatukusimana nayo apano.—Yes. 65:17.

PATUKULWALA ULWELE WAKUTI NGANITUKOLA CHEMBECHEYO CHAKUTI CHITUPOLE

15. Ana Hesekiya jwasimene ni chakusawusya chamti uli chachamtendekasisye kwika pakulila?

¹⁵ Mwenye Hesekiya jwa ku Yuda pajwakwete yaka 39, jwalwasile ulwele wakogoya mnope. Mwamti mwakutumidwa ni Yehofa, jwakulochesya Yesaya jwasasile kuti Hesekiyajo chawe ligongo lya ulwele wakwewo. (2 Ayi. 20:1) Apatu yawoneche kuti Hesekiya nganakola chembecheyo chilichose. Jwalakwe pajwapikene utenga welewu, jwadandawile mnope mwamti jwalisile mnope. Hesekiya jwamŵendile Yehofa kuti amkamuchisye.—2 Ayi. 20:​2, 3.

16. Ana Yehofa jwajanjile chamti uli lipopelo lya Hesekiya lyakuchondelela?

¹⁶ Yehofa ŵapikene lipopelo lyakuchondelela soni kulila kwa Hesekiya. Mwamti ŵamsalile kuti, “Une mbikene lipopelo lyenu, soni najiweni misosi jenu. Sambano chinamposye mmwejo.” Kupitila mwa Yesaya, Yehofa jwasasile kuti chachilewuya umi wa Hesekiya soni kuti chachiwukulupusya msinda wa Yelusalemu mmyala mwa Asiliya.—2 Ayi. 20:​4-6.

17. Ana Yehofa akusatulimbikasya chamti uli patulwasile mnope? (Salimo 41:3) (Alolesoni chiwulili.)

¹⁷ Yatukulijiganya. Ana wawojo akulwala ulwele wekulungwa mwamti nganakolasoni chembecheyo chakuti mpaka aŵe chenene? Naga yili myoyo, apopeleje kwa Yehofa atamosesoni kwika kwene pagwisya misosi. Baibulo jikusatusimichisya kuti, “Mlungu jwakusatutendela chanasa soni jwakusatulimbisya mu yosope” chachitulimbikasya mu yakusawusya yetu yosope. (2 Akoli. 1:​3, 4) Masiku agano, nganituŵa tujembecheye kuti Yehofa chatyosye yakusawusya yetu yosope. Atamose yili myoyo, jwalakwe chachipitilisya kutukamuchisya. (Aŵalanje Salimo 41:3.) Kupitila mwa msimu wakwe weswela, Yehofa akusatupa machili, lunda, soni mtendele wamumtima kuti tukombole kupilila. (Mis. 18:14; Afil. 4:13) Jwalakwe akusatulimbikasyasoni kupitila mu chembecheyo chatukusapata m’Baibulo, chakuti yilwele yosope yichimala kusogoloku.—Yes. 33:24.

18. Ana ni lilemba lyapi lyakusaliwona wawojo kuŵa lyakamuchisya mnope pasimene ni yakusawusya yekulungwa? (Alole libokosi lyakuti “ Maloŵe Gampaka Gatamiche Mitima Jetu Pasi.”)

¹⁸ Maloŵe ga Yehofa gamlimbikasisye mnope Hesekiya. Mwamti m’wejisoni mpaka gatulimbikasye mnope. Patukulagasika nganisyo, Maloŵe ga Mlungu mpaka gatulimbikasye soni kutukamuchisya kupata mtendele wa mumtima. (Alo. 15:4) Mlongo jwine jwa ku West Africa paŵamsimene ni ulwele wa kansa, jwatamilaga kulila. Jwalakwe jwatite, “Lilemba lyalyalimbikasisye mnope lyaliji lya Yesaya 26:3. Atamose kuti ndaŵi syejinji nganituŵa tukombwele kumasya yakusawusya yetu, lilembali likusatusalila kuti Yehofa chachitenda yakomboleka mwakutukamuchisya kuti tupateje mtendele wa mumtima.” Ana wawojo akwete lilemba lyakusaliwona kuŵa lyakamuchisya mnope  pasimene ni yakusawusya yekulungwa yakuyiwona kuti pangali champaka atende kuti amalane nayo?

19. Ana kusogoloku kwana yindu yambone yamti uli yatukuyijembecheya?

¹⁹ Tukutama kumbesi kusyesyene kwa masiku gakumalisya. Mwamti tukwembecheya kuti yindu yayikusatutendekasya kupikana kupweteka chiyipitilile. Nambo mpela mwatuyiwonele mu chisyasyo cha Hana, Daudi, soni Mwenye Hesekiya, Yehofa akusayiwona yakupweteka yatukusasimana nayo mwamti yikusamkwaya mnope. Jwalakwe akusasangalala mnope patukupitilisya kuŵa ŵakulupichika atamose kuti tukusimana ni yakusawusya. Myoyo, patusimene ni yakusawusya, tukusasosekwa kwamba kumsalila jwalakwejo mu lipopelo. Nambosoni tukalekaga kutenda yindu pampepe ni abale ni alongo ŵa mumpingo mwetu. Tuchipatasoni mfundo syakulimbikasya patukuŵalanga Baibulo. Ndaŵi syosope, tuŵeje ŵakusimichisya kuti patukupilila mwakulupichika, Yehofa chachitupa upile. Mwamti upile welewu, ukupwatikapo kutama pandaŵi jele jwalakwejo chachiŵa ali amasisye yakusawusya yosope yayikusatutendekasya kupikana kupweteka. (Chiw. 21:4) Mwamti misosi jatuchikoposya pandaŵi jelejo jichiŵa misosi jakwika ligongo lyakusangalala.