Ana aŵalasile mwakusamala magasini ga Sanja ja Mlonda ga chaka achino? Kwende alole naga chakombole kwanga yiwusyo yakuyichisyayi:

Ana Yehofa akusapeleka chisyasyo chamti uli pakulosya mwampaka tutendele yindu ni achakongwe?

Jwalakwe akusatenda yindu mwangali lusagu soni jwangawona achalume kuŵa ŵakusosekwa mnope kwapunda achakongwe. Yehofa akusiŵapikanila achakongwe soni akusatenda chidwi ni mwakupikanila soni yindu yayikwalagasya nganisyo. Jwalosisyesoni kuti akusiŵadalila achakongwe mwakwapa masengo gakulalichila.—w24.01, pp. 15-16.

Ana mpaka tukamulichisye masengo chamti uli maloŵe ga pa Aefeso 5:7 gagakusati “mkatendaga nawo yindu yeleyo”?

Ndumetume Paulo jwatukalamwisye kuti ngatukusosekwa kunguluka ni ŵandu ŵampaka atutendekasye kuyiwona kuŵa yakusawusya kupikanila maloŵe ga Mlungu. Jemanjaji ali ŵandu ŵampaka tukunguluche nawo pameso ni pameso kapena ŵampaka tukunguluche nawo kupitila pamalo gakunguluchila ga pa intaneti.—w24.03, pp. 22-23.

Ana ni ngani syapi syaunami syatukusasosekwa kusiŵambala?

Tukusasosekwa kuŵambala ngani syangali umboni syampaka tupikane kutyochela kwa achimjetu ŵatukusitwamanyilila chenene, mautenga gatupochele kutyochela kwa ŵandu ŵangatukwamanyilila, soni ngani syaunami syakusawandisya ŵampatuko syakwamba yindu yatukusakulupilila.—w24.04, p. 12.

Ana ni yindu yapi yatukumanyilila soni yangatukumanyilila pakwamba yachachitenda Yehofa pakumlamula Mwenye Solomo soni ŵandu ŵaŵawile ku Sodomu ni Gomola nambosoni pa Chigumula?

Ngatukumanyilila naga Yehofa ŵajonasile jemanjaji kwangamala, nambo chatukumanyilila chili chakuti jwalakwejo ni jwakusamanyilila yisyesyene yakwamba jemanjaji soni kuti ali jwachanasa chekulungwa.—w24.05, pp. 3-4.

Ana kumanyilila kuti Mlungu ali “Lwala” kukusatusimichisya ya chichi? (Det. 32:4)

Mpaka tutilile kwa Yehofa, ligongo jwalakwe ali jwakudalilichika, mwamti ndaŵi syosope akusakwanilisya yasasile. Konjechesya pelepa, jwalakwe ali jwangatenganyika mwamti ngasachenga ndamo syakwe soni yakulinga yakwe.—w24.06, pp. 26-28.

Ana chichi champaka chakamuchisye kuti asyoŵelele pasamile kwawula mumpingo wasambano?

Amdalileje mnope Yehofa, jwalakwe chachakamuchisya mpela mujwatendele ni ŵakutumichila ŵakwe ŵane munyumamu. Aŵambaleje kulandanya yindu ni muyaŵelaga mumpingo wawo wakala. Akoleje yakutenda yejinji soni atendeje yakomboleka kuti akole achimjawo ŵajinji ŵasambano.—w24.07, pp. 26-28.

Ana tukusalijiganya chichi pangani sitatu syakuwanichisya syasikusasimanikwa m’buku ja Mateyu chaputala 25?

Ngani jakuwanichisya jakusala ya ngondolo ni mbusi jikusagombelechesya kusosekwa kwakuŵa ŵakulupichika. Ngani ja achiŵali ŵakalamuka soni ŵakuloŵela jikusagombelechesya kusosekwa kwakuŵa ŵakoseka soni kuŵa mesope. Nambosoni ngani ja matalente jikusagombelechesya kusosekwa kwakuŵa ŵakulimbichila patukukamula masengo.—w24.09, pp. 20-24.

Ana lipenu lya nyumba ja Mlungu jaŵataŵile Solomo lyaliji lyelewu chamti uli?

Pa 2 Mbili 3:​4, ma Baibulo gane gakusasala kuti ulewu wa lipenuli waliji “makono 120” kwawula mwinani gagali mamita 53. Nambo ma Baibulo gane gakusasala kuti ulewu wa lipenu lya nyumba ja Mlungu jaŵataŵile Solomo waliji “makono 20” kwawula mwinani kapena kuti mamita 9 soni yeleyi yakamulanaga ni kakandapale ka mapupa ga nyumba ja Mlunguji.—w24.10, p. 31.

Ana akusagopolela chichi pakusala kuti jwakutumichila jwakamuchisya akusosekwa kuŵa ‘jwamlume jwakola jwamkongwe jumo’? (1 Tim. 3:12)

Yeleyi yikugopelela kuti jwalakwejo akusosekwa kulombela jwamkongwe jumo soni ngakusosekwa kutenda chikululu. Konjechesya pelepa, ngakusosekwasoni kujigalika ni achakongwe ŵane.—w24.11, p. 19.

Ligongo chichi mpaka tujile kuti lilemba lya Yohane 6:53 lyangasalaga ya yindu yayikusatendekwa pa mwambo wa Chakulya cha Ligulo cha Ambuje?

Pa Yohane 6:53 pakusasala kusosekwa kwakulya chilu cha Yesu soni kumwa myasi jakwe. Yesu jwaŵechete yeleyi mu 32 C.E., ku Galileya kwa Ayuda ŵaŵasosekwaga kumkulupilila jwalakwejo. Nambope, mwambo wa Chakulya cha Ligulo cha Ambuje ŵawutamilikasisye pali papitile chaka ku Yelusalemu. Pamwambowu, Yesu jwaŵechete yakwamba ŵandu ŵachachilamulila najo kwinani.—w24.12, pp. 10-11.