Ndumetume Paulo jwamlembele Timoteyo juŵalijisoni jwamkulungwa jwa mumpingo mjakwe kuti, “Ngumlamula mmwejo mwamachili pameso pa Mlungu ni Klistu Yesu soni pameso pa malayika gakusagulidwa kuti mkuyeje maloŵe gelega mwangalosya lusagu.”—1 Tim. 5:21.

Chandanda, kuti tupikanichisye kuti malayika gelega gali gapi chitukambilane ya malayika gele nganigaŵa gaŵele mu gulu ja malayikaga. Malayikaga nganigaŵa ŵa 144,000. Paulo pajwamlembelaga Timoteyo maloŵega, Aklistu ŵasagulwe ŵaliji mkanatande kwawula kwinani. Myoyo, ligongo lyakuti ŵandumetume soni ŵasagulwe ŵane ŵaliji mkanaŵe kuŵa yakupanganyikwa yausimu, nikuti paŵasalaga ya “malayika gakusagulidwa” nganagambaga ya jemanjaji.—1 Akoli. 15:​50-54; 1 Ates. 4:​13-17; 1 Yoh. 3:2.

Nambosoni, “malayika gakusagulidwa” gelega nganigaŵa gaŵele malayika gagamjimuchile Mlungu pandaŵi ja Chigumula. Malayikaga gasagwile kuŵa kumbali ja Satana soni gaŵele yiŵanda, nambosoni achimmagongo ŵa Yesu. (Gen. 6:2; Luk. 8:​30, 31; 2 Pet. 2:4) Kusogoloku, malayikaga chachigaponya mwisimbo kwa yaka 1,000 soni kaneko chachigajonanga yimpepe ni Satana.—Yud. 6; Chiw. 20:​1-3, 10.

Myoyo, komboleka kuti “malayika gakusagulidwa” gaŵagagambaga Paulo mundimeji gali malayika ga kwinani gagali kumbali ja “Mlungu ni Yesu Klistu.”

Kwinani kwana malayika gejinji gakulupichika. (Aheb. 12:​22, 23) Mwamti ngatukusasosekwa ganisya kuti malayika gosopega gakwete masengo gakulandana gagakusakamulasoni pandaŵi jakulandana. (Chiw. 14:​17, 18) Mwachisyasyo, pandaŵi jine Yehofa ŵalitumile lilayika limpepe kuti likawulaje asilikali ŵa Asiliya ŵakwana 185,000. (2 Ayi. 19:35) Kombolekasoni kuti malayika gane gachipedwa utumiki ‘wakutyosya mu Uchimwene wa [Yesu] yindu yosope yakuŵasya soni ŵandu wosope ŵangapikanila malamusi.’ (Mat. 13:​39-41) Mwinesoni malayika gane “gachasonganganya ŵakusagulidwa ŵakwe” kwinani. (Mat. 24:31) Nambosoni pana malayika gane gagakusatulolela m’weji ‘m’matala getu gosope.’—Sal. 91:11; Mat. 18:10; 4:11; Luk. 22:43.

Myoyo, komboleka kuti “malayika gakusagulidwa” gakusagakolanga pa 1 Timoteyo 5:21 gali malayika ganegakwe gele Mlungu ŵagapele utumiki wine wakwe wakuwukamuchisya mpingo. Palilembali, Paulo jwasalagasoni yakusasosekwa kutenda achakulungwa ŵa mumpingo pakukamula masengo gawo, soni kuti abale ni alongo akusasosekwa kwachimbichisya jemanjaji. Paulo jwasasilesoni kuti achakulungwa ŵa mumpingo akusasosekwa kutenda yindu “mwangalosya lusagu” soni kuti akusasosekwa kuganichisya chenene mkanasagule yakutenda. Ligongo lyekulungwa lyakwatendekasya achakulungwaŵa kutenda yeleyi lili lyakuti, akusatenda utumiki wawo “pameso pa Mlungu ni Klistu Yesu soni pameso pa malayika gakusagulidwa.” Myoyo, yili yakupikanika kuti malayika gane gakusakamula masengo gakuwukamuchisya mpingo. Masengo gakwe gali mpela kwachenjela ŵakutumichila ŵa Mlungu soni kumsalila Yehofa yindu yayiweni.—Mat. 18:10; Chiw. 14:6.