1-2. Ana kutuwombola kwaŵatesile Yesu kusagopolela chichi? Ligongo chichi yaŵatesile Yesuyi yili yakusosekwa mnope kwa m’weji?

ADAMU paŵagambile kulemwa, ŵajasile upile wakutama ni umi wangamala. Yeleyi yakwayiyesoni ŵanache ŵakwe ŵaŵaliji ŵakuti chachiŵeleka. Pangali chakalambuchisye Adamu kuti chamtendekasisye kulemwa, jwalakwe ŵalemwisye mwamelepe. Nambi uli pakwambaga ya ŵanache ŵakwe? Ŵanacheŵa nganatenda chakulemwa chilichose kapena kumtendekasya Adamu kuti alemwe. (Alo. 5:12, 14) Pakuŵapo Adamu jwawile ligongo lya ulemwa, ana pana chilichose chakatesile Yehofa pakusaka kwakamuchisya ŵanache ŵa Adamu kuti chatameje ni umi mpaka kalakala? Elo chipali. Yehofa jwasasile yachachitenda pakusaka kwakulupusya ŵanache ŵa Adamu ku ulemwa ni chiwa. (Gen. 3:15) Yehofa jwalinganyisye kuti pandaŵi jakuŵajilwa chamtumisye Mwanache jwakwe kutyochela kwinani kwika ‘kukupeleka umi wakwe kuti ŵawombole ŵandu ŵajinji.’—Maliko 10:45; Yoh. 6:51.

² Ana kutuwombola kwaŵatesile Yesu kukusagopolela chichi? Malemba ga Chigiliki ga Chiklistu gakusalosya kuti kuwombola uli mtengo uŵapeleche Yesu pakusaka kusuma yindu yosope yaŵajonasile Adamu. (1 Akoli. 15:22) Ligongo chichi mbopesi jakutuwombolaji jili jakusosekwa mnope kwa m’weji? Ligongo lyakwe lili lyakuti malamusi gakulungama ga Yehofa gagalembedwe mu Chilamusi cha Mose gasalaga kuti umi kulipila umi. (Eks. 21:23, 24) Adamu jwajasile umi ŵamlama. Yesu jwapeleche mbopesi chilu chakwe cha mlama pakusaka kukwanilisya chilungamo cha Mlungu. (Alo. 5:17) Sambano Yesu jwaŵele Mtati jwangali mbesi jwa ŵandu wosope ŵakukulupilila mbopesi jakweji.—Yes. 9:6; Alo. 3:23, 24.

3. Mwakamulana ni Yohane 14:31 soni 15:13, ligongo chichi Yesu jwaliji jwakusachilila kupeleka umi wakwe mpela mbopesi?

³ Yesu jwaliji jwakusachilila kupeleka umi wakwe ligongo lyakwanonyela mnope Atati ŵakwe ŵa kwinani soni ŵandu. (Aŵalanje Yohane 14:31; 15:13.) Ligongo lya chinonyelo chelechi jwalakwe jwaliji jwakusachilila kuŵape jwakulupichika mpaka kumbesi kwa umi wakwe soni kukwanilisya chakulinga cha Atati ŵakwe. Yakuyichisya yakwe chakulinga cha Yehofa chaŵakwete pandanda pakwamba ŵandu soni chilambochi chichikwanilichikwa. Munganiji  chitukambilane ligongo lyakwe Mlungu jwakundile kuti Yesu asimane ni yakusawusya mkanaŵe kuwa. Chitukambilanesoni ya mundu jwine juŵalembile nawo Baibulo juŵalosisye kuyamichila yaŵatesile Yesu pakutuwombola. Pakumalisya chitulole yampaka tutende kuti tulosyeje kuyamichila mwakutyochela pasi pa mtima yaŵatesile Yehofa soni Yesu pakutuwombola.

4. Ana Yesu ŵawulajidwe chamtuli? Alondesye.

⁴ Agambe ganichisya mwayaŵelele yindu pa umi wa Yesu, palisiku lyakumalisya ali asigele panandi kuwa. Jwalakwe jwakundile kulagasidwa ni asilikali ŵa Chiloma ŵaŵamputaga mwangamtendela chanasa. Jwakundile kusimana ni yeleyi atamose kuti akakomboleche kuŵilanga malayika kuti gamchenjele. (Mat. 26:52-54; Yoh. 18:3; 19:1) Asilikaliŵa ŵamputaga ni chamboko chachayikaga pakugwagula mnowu wakwe. Kaneko ŵampele chitela chakusitopa mnope kuti anyakule. Yesu jwanyakwile chitelachi ni kwawulaga nacho kumalo gakuti akamwulajile, nambo kaneko asilikaliwo ŵamlamwile mundu jwine juŵagambaga kulijendela kuti ampochele chitelacho. (Mat. 27:32) Yesu ali ayiche pa malo gakuti amwulajile asilikaliŵa ŵamkomele makono ni sajo syakwe pa chitela. Usito wa chilu cha Yesu watendekasisyesoni kuti maŵanga gakwe gakule. Achimjakwe ŵa Yesu chakamwile mnope chanasa soni mamagwe ŵalilaga. Nambo pandaŵiji Ayuda ŵane ŵagambaga kumŵechetela Yesu yachipongwe. (Luk. 23:32-38; Yoh. 19:25) Yesu jwalasile kwa maawala gejinji ali pa chitela chakulagachisya. Yaŵatite pakumkomelela Yesu pa chitelachi, yatendekasisye kuti apumuleje mwakulajilila. Jwalakwe ali mkupumasika kwakulosya kuti asigele panandi kuwa, jwapopesile kakumalisya kwa Yehofa. Kaneko jwakotimisye mtwe wakwe pasi ni kupeleka umi wakwe. (Maliko 15:37; Luk. 23:46; Yoh. 10:17, 18; 19:30) Kusala yisyene Yesu jwawile chiwa chakupweteka mnope soni chakutesya chanasa.

5. Ana ni chichi chaŵachiwonaga Yesu kuŵa chakupweteka mnope kupunda chiwa chakwe?

⁵ Yesu nganadandawulaga mnope ni yindu yangasa yaŵamtendelaga ŵandu. Mmalo mwakwe jwadandawulaga mnope ligongo lyakuti ŵandu ŵamlambuchisyaga kuti ali jwakunyosya Mlungu, soni kuti ngakulichimbichisya lina lya Mlungu. (Mat. 26:64-66) Yaŵatesile ŵanduŵa yamtendekasisye Yesu kuganisya kuti ligongo chichi Yehofa akundile kuti ŵanduŵa alinyosyeje lina lyakwe chamti myiyi? (Mat. 26:38, 39, 42) Sambano, ligongo chichi Yehofa ŵakundile kuti mwanache jwakwe jwakusamnonyela mnope alagasidwe soni kuwa? Kwende tulole magongo gatatu gaŵatendele yeleyi.

6. Ligongo chichi Yesu jwasosekwaga kumkomelela pa chitela chakulagachisya?

⁶ Chandanda Yesu jwakundile kuŵichidwa pa chitela chakulagachisya pakusaka kwagopola Ayuda ku malweso gawo. (Agal. 3:10, 13) Ayudaŵa ŵaliji ŵalweseche ligongo ŵasasile kuti chakuyeje chilamusi cha Mlungu nambo nganakuyaga yachasalaga. Yakuyichisya yakwe malweso gelega gagambaga konjechesyasoni pa ulemwa wawo wakala ŵakutyochela kwa Adamu. (Alo. 5:12) Chilamusi cha Mlungu mu ndaŵi ja Aisalaeli chasalaga kuti mundu jwatesile ulemwa wakuŵajilwa kuwulajidwa ŵasosekwaga kuwulajidwa basi. Kaneko ŵasosekwaga kujigala mtembo wa mundujo ni kuwukoleka pachitela. * (Det. 21:22, 23; 27:26) Myoyo Yesu pakukunda kuwulajidwa pachitela yakamuchisye kuti ŵandu ŵaŵamkanagaŵa apindulesoni ni mbopesi jakwe.

7. Ana ni ligongo lyaŵili lyapi lyalyamtendekasisye Mlungu kukunda kuti Mwanache jwakwe asimane ni yakusawusya?

⁷ Kwende tukambilane ligongo lyaŵili lyalyamtendekasisye Mlungu kukunda kuti mwanache jwakwe alagasidwe. Yehofa ŵamkosechelesyaga Yesu udindo wakwe wamsogolo wakuŵa Jwamkulungwa  Jwambopesi. Yesu jwayiweni mwayikusaŵela yakusawusya kumpikanila Mlungu, mundu pasimene ni yakusawusya yekulungwa. Jwalakwe jwalasile ni yipwetesi mnope, mwamti jwapopesile “mwakugumila ni kulila misosi.” Kusala yisyene ligongo lyakuti Yesu ŵasimene ni yakusawusya yosopeyi, jwalakwe akusatupikanichisya patukusimana ni yipwetesi soni ‘akusakombola kutukamuchisya patukulinjikwa.’ Tukusamyamichila Yehofa ligongo lyakumsagula Jwamkulungwa Jwakutaga mbopesi “jwakusatutendela chanasa ligongo lyakulepetala kwetu.”—Aheb. 2:17, 18; 4:14-16; 5:7-10.

8. Ana ligongo lyatatu lyalyamtendekasisye Yehofa kukunda kuti Yesu asimane ni yakulingwa yakupweteka ni lyapi?

⁸ Ligongo lyatatu, Yehofa jwakundile kuti Yesu asimane ni yakusawusya kuti ajanje chiwusyo chakusosekwa mnope. Chiwusyo chakwe chaliji chakuti, Ana ŵandu mpaka akombole kuŵape ŵakulupichika kwa Mlungu pakusimana ni yakulingwa? Satana akusasala kuti yeleyi nganiyiŵa yikomboleche. Jwalakwe akusasala kuti ŵandu akusamtumichila Mlungu pakusaka yine yakwe. Akusakulupililasoni kuti ŵandu nganaŵa aŵele ŵakulupichika kwa Yehofa mpela muyaŵelele ni Adamu. (Yob. 1:9-11; 2:4, 5) Ligongo lyakuti Yehofa ŵamdalilaga Mwanache jwakweju kuti chaŵepe jwakulupichika, ŵakundile kuti jwalakwe alinjidwe mpaka kwika pamalile gakusapelela mundu kupilila. Yesu jwapitilisyepe kuŵa jwakulupichika soni jwalosisye kuti Satana ali jwaunami.

9. Ana ndumetume Yohane jwatupele chisyasyo chamtuli?

⁹ Chikulupi cha Aklistu ŵajinji chilimbile mnope ligongo lya kulijiganya yakwamba mbopesi jakutuwombola. Jemanjaji akusapitilisyape kulalichila atamose kuti ŵandu akusiŵasisya, soni akusasimana ni yakulingwa pa umi wawo. Aganichisye chisyasyo cha ndumetume Yohane. Jwalakwe jwapitilisyepe kulalichila yakwamba Klistu soni mbopesi jakwe jakutuwombola kwa yaka yakupunda 60. Nambo paŵaliji ni yaka ya m’ma 90, ŵamganichisyaga kuti ali jwakwimuchila ulamusi wa Loma mwamti ŵamŵisile mu ukayidi pa chilumba cha Patimosi. Ana jwalakwe jwalemwisye chichi? Ngani jakwe jaliji jakuti ‘ŵalalichilaga maloŵe ga Mlungu nambosoni yakuwona yaŵasasile Yesu.’ (Chiw. 1:9) Kusala yisyene Yohane jwapilile yindu yejinji soni jwakwete chikulupi chakulimba.

10. Ana yiŵalembile Yohane yikusalosya chamtuli kuti jwalakwe jwayamichilaga mbopesi jakutuwombola jaŵapeleche Yesu?

¹⁰ Yohane jwalosisye kuti akusamnonyela mnope Yesu soni kuti jwayamichilaga mbopesi jakutuwombola jaŵapeleche jwalakwe. Yeleyi yawonechele m’mabuku gaŵalembile jwalakwe. Kwa maulendo gakupunda 100, Yohane jwaŵechete yakwamba mbopesi jakutuwombola nambosoni umbone watukusapata ligongo lyambopesiji. Mwachisyasyo, jwalembile kuti, “Naga jwalijose akulemwa tukwete Yesu Klistu jwali namangoswe jwakulungama jwakutuŵechetela kwa Atati.” (1 Yoh. 2:1, 2) Mabuku gaŵalembile Yohane gakusagombelechesyasoni kusosekwa kwakulalichila “yakuwona yisyesyene” yakwamba Yesu. (Chiw. 19:10) Kusala yisyene Yohane jwayamichilaga mwakutyochela pasi pa mtima mbopesi jakutuwombola. Ana m’weji mpaka tutendesoni chamtuli yeleyi?

11. Ana chichi champaka chitukamuchisye kuŵambala yindu yampaka yitulinje?

¹¹ Tuŵambaleje yindu yampaka yitulinje kuti tutende ulemwa. Naga tukuyamichila yisyesyene mbopesi jakutuwombola, nikuti tuchiŵambala kola nganisyo syakuti, ‘Pangali chilichose changusosekwa kutenda kuti ngalemwa, mpaka ndende chakusakala chilichose changusaka kaneko ni kumŵenda Yehofa kuti angululuchile.’ Mmalo mwakwe patukulinjidwa kuti tutende chakulemwa, tuchikana. Tuchitenda yeleyi ligongo pana yindu yambone yatutendele Yehofa soni Yesu. Mmalo mwakwe tukusosekwa kumŵenda Yehofa  kuti atupe machili soni kutukamuchisya kuti tukagwila mu yakulingwa.—Mat. 6:13.

12. Ana mpaka tukamulichisye chamtuli masengo maloŵe gagakusasimanikwa pa 1 Yohane 3:16-18?

¹² Twanonyeleje abale ni alongo ŵetu. Patukwanonyela abale ni alongo tukusaŵasoni tuli mkulosya kuyamichila kwetu mbopesi jakutuwombola ja Yesu. Yesu ŵapeleche umi wakwe ngaŵa ligongo lya kutunonyela m’wejipe, nambo ligongo lya kwanonyelasoni abale ni alongo ŵane. Naga Yesu ŵayikene pakwawila jemanjaji nikuti akusiŵawona kuti ali ŵakusosekwa mnope. (Aŵalanje 1 Yohane 3:16-18.) Mwatukusatendela yindu ni abale ni alongo ŵetu mpaka yilosye kuti tukusitwanonyela. (Aef. 4:29, 31–5:2) Mwachisyasyo, tukusakamuchisya jemanjaji naga akulwala, kapena pakusimana ni yakusawusya yine mpela ngosi syachilengedwe. Nambo ana mpaka tutende uli naga m’bale kapena mlongo aŵechete kapena atesile yindu yine yakutukuŵasya?

13. Ligongo chichi tukusosekwa kwakululuchila abale ni alongo patulemwechesye?

¹³ Ana akusayiwona kuŵa yakusawusya kumkululuchila m’bale kapena mlongo jwaŵaleŵele? (Lef. 19:18) Akusosekwa kukuya malangiso aga gakuti, “Mtendelaneje chanasa nipo mkululuchilaneje jwine ni mjakwe naga jwine amlemwechesye mjakwe. Mpela mwele Ambuje ŵamkululuchile ni jemanjasoni mkululuchilaneje.” (Akolo. 3:13) Ndaŵi jilijose patumkululuchile m’bale kapena mlongo, tukusalosya kwa Atati ŵetu ŵakwinani kuti tukusayamichila yisyesyene mbopesi jakutuwombola. Ana mpaka tutende uli kuti tuyamichileje mnope mbopesi jakutuwombola jiŵatupele Mlungu?

14. Ana litala limo lyampaka tulochesye kuyamichila mbopesi jakutuwombola lili lyapi?

¹⁴ Amyamichileje Yehofa ligongo lya mbopesi jakutuwombola jiŵapeleche Yesu. Mlongo jwine jwa yaka 83, jwakusatama ku India lina lyakwe Joanna jwatite, “Nayiweni kuti yikusaŵa yakamuchisya lisiku lililyose kumyamichila Yehofa, ligongo lya mbopesi jakutuwombola.” Pakupopela pajikape awungunyeje yindu yalemwisye palisikulyo ni kumŵenda Yehofa kuti ŵakululuchile. Nambo naga atesile ulemwa wekulungwa akusosekwa kwasalila achakulungwa ŵa mumpingo kuti ŵakamuchisye. Jemanjaji chachapikanila chenene soni chachapa malangiso gambone gakutyochela m’Maloŵe ga Mlungu. Achakulungwaŵa chachipopela yimpepe ni wawojo kumŵenda Yehofa kuti apitilisye kujiwona mbopesi jaŵapeleche Yesu kuŵa jakusosekwa mnope ni chakulinga chakuti ‘apole’ mwausimu.—Yak. 5:14-16.

15. Ligongo chichi tukusosekwa kupata ndaŵi jaganichisya ya mbopesi jakutuwombola?

 ¹⁵ Tuganichisyeje ya mbopesi jakutuwombola. Mlongo jwine jwayaka 73 lina lyakwe Rajamani jwatite, “Pambalasile ngani jakusala yaŵatite Yesu pakulagasika ngusagambaga kulila.” Kombolekasoni wawojo yikusiyapweteka mnope paganichisye yaŵatite pakulagasika Mwanache jwa Mlungu. Nambo pakuganichisya mnope ya mbopesi jiŵapeleche Yesu ni pakusatanda kumnonyela mnope jwalakwe yimpepe ni Atati ŵakwe. Kuti akomboleje kuganichisya ya mbopesi jakutuwombola jaŵapeleche Yesu akusosekwa kulinganya yakulijiganya ngani jeleji.

16. Ana kwajiganya ŵane yakwamba mbopesi jakutuwombola jaŵapeleche Yesu mpaka kutukamuchisye chamtuli? (Alole chiwulili cha pachikuto.)

¹⁶ Twajiganyeje ŵane yakwamba mbopesi jakutuwombola jiŵapeleche Yesu. Ndaŵi jilijose patukwasalila ŵane ya mbopesi jakutuwombola jiŵapeleche Yesu, ni patukusayamichila mnope mbopesiji. Tukwete mabuku soni mafidiyo gampaka gatukamuchisye kwajiganya ŵane ligongo lyakwe Yesu ŵatuwilile m’weji. Mwachisyasyo, mpaka tukamulichisye masengo lijiganyo 4 lya mkabuku kakuti, Ngani Syambone Kutyochela kwa Mlungu. Lijiganyo lyeleli likwete mtwe wakuti Ana Yesu Klistu Ali Ŵani? Kapena mpaka tukamulichisyesoni masengo mtwe 5 wa buku jakuti, Ana Baibulo Jikusatujiganya Yatuli? Mtwe welewu uli wakuti, “Mlungu Ŵatupele Mtuka Wakusosekwa Mnope Mwakutuwombola.” Chaka chilichose tukusalosya kuyamichila mbopesi jakutuwombolaji mwakusimanikwa nawo pa Chikumbuchilo cha chiwa cha Yesu soni kwaŵilanjila ŵane ku Chikumbuchilochi. Welewu uli upile wekulungwa watupele Yehofa kuti twajiganyeje ŵandu ŵane yakwamba Mwanache jwakwe.

17. Ligongo chichi mbopesi jakutuwombola jili mtuka wambone mnope wapeleche Mlungu kwa ŵandu?

¹⁷ Mwangakayichila tukwete magongo gakupikanika gakututendekasya kupitilisya kuyamichila mbopesi jakutuwombola. Ligongo lya mbopesiji tukusaŵa paunasi wambone ni Yehofa atamose kuti tuli ŵandu ŵangali umlama. Mbopesi jakutuwombolaji jichitendekasya kuti yitendo yosope ya Satana yijonanjikwe. (1 Yoh. 3:8) Kupwatika pelepa chakulinga chaŵakwete Yehofa pandanda chakwamba ŵandu soni chilambo chapasi chichikwanilichikwa ligongo lya mbopesi jeleji. Chilambo chosope chichiŵa paladaiso. Jwalijose juchachisimanikwa pandaŵijo chachiŵa jwakuti akusamnonyela soni kumtumichila Yehofa. Myoyo kwendeje lisiku lililyose tusoseje matala gampaka tulochesye kuyamichila mbopesi jakutuwombolaji jajili mtuka wakusosekwa mnope watupele Yehofa.