Ligongo chichi Yesu ali asigele panandi kuwa jwaŵechete maloŵe ga Daudi gagakusimanikwa pa Salimo 22:1?

Gane mwa maloŵe gaŵechete Yesu gakusasimanikwa pa Mateyu 27:46, maloŵega gakusati, “Mlungu jwangu, Mlungu jwangu ligongo chichi andesile?” Yesu pajwaŵechete maloŵe gelega jwakwanilisye maloŵe ga Daudi gagakusimanikwa pa Salimo 22:1. (Maliko 15:34) Mpaka kuŵe kulemwa kuŵecheta kuti Yesu jwaŵechetaga maloŵe gelega ligongo lyakuti jwatengwiche kapena kuti chikulupi chakwe chanandipe machili pa ndaŵiji. Jwamanyililaga chenene ligongo lyakwe jwasosekwaga kuwa soni jwaliji jwakusachilila kutenda yeleyi. (Mat. 16:21; 20:28) Jwalakwe jwamanyililaga kuti pa ndaŵi ja chiwa chakwe Yehofa chachimtyochesya ‘chakumchinjilichisya jwalakwe’ chilichose. (Yob. 1:10) Yehofa ŵakundile kuti Yesu asimane ni yakusawusya. Jwalakwe jwatesile yeleyi kuti Yesujo alosye kulupichika kwakwe.—Maliko 14:35, 36.

Sano ligongo chichi Yesu jwaŵechete maloŵe ga pa Salimo jeleji. Atamose ngatukumanyilila chisyesyene chachamtendekasisye kuŵecheta maloŵe gelega nambope, kwende tulole gane mwa magongo gampaka gaŵe kuti mwine gamtendekasisye jwalakwe kuŵecheta yeleyi. *

Komboleka Yesu pajwaŵechetaga maloŵe gelega jwagombelechesyaga yakuti Yehofa nganaŵa amchenjele ku chiwa chakwe. Yesu jwasosekwaga kupeleka jika mbopesi jakwawombola ŵandu pali pangali chikamuchisyo cha Yehofa. Jwalakwe jwaliji mundu soni jwasosekwaga kuwa kuti, “awile ŵandu wosope.”—Aheb. 2:9.

 Yesu pajwaŵechetaga maloŵe gane ga m’buku ja Masalimo, komboleka jwasakaga kuti ŵandu akumbuchile maloŵe gosope gagali m’bukuji. Pa ndaŵi jelejo Ayuda ŵajinji ŵajinjisyaga pamtima buku ja Masalimo. Mwamti kuŵecheta maloŵe ga mundime jimpepe ja m’buku ja Masalimo kukatendekasisye Ayudaŵa kukumbuchila mwangasawusasya maloŵe gosope gali m’bukuji. Naga yeleyi ni yaŵaganisyaga Yesu pandaŵiji nikuti yikakamuchisye Ayudaŵa kukumbuchila yakulochesya yosope yayaliji m’buku ja salimoji yakwamba yayichitendekwa pa chiwa chakwe.(Sal. 22:7, 8, 15, 16, 18, 24) Sonitu chakumbesi kwa Salimo 22, jwamasalimoju akumlumba Yehofa kuti ali jwakwenela kuŵa Mwenye jwa pa chilambo chapasi.—Sal. 22:27-31.

Yesu pajwasasile maloŵe ga Daudi kombolekasoni jwasakaga kwakamuchisya ŵandu kumanyilila kuti jwalakwe ali jwangalemwa. Yesu mkanawe ŵasosekwagasoni kupilila pamagambo gaŵamlambuchisyaga kuti ali jwakunyosya. (Mat. 26:65, 66) Luŵala lwamagambo lya Ayuda lwatendaga yindu mwangasa. Mwachisyasyo, pandaŵi jiŵamjimbaga magambo Yesu, jemanjaji nganakuya malamusi ga magambo ga ŵajendelaga pandaŵijo. Soni jemanjaji ŵasongene chilo ni kumjimbaga magambo Yesu. (Mat. 26:59; Maliko 14:56-59) Yesu paŵaŵechete maloŵe gakuti Mlungu jwangu Mlungu jwangu ligongo chichi andesile une, jwalakwe jwasakaga kwakamuchisya Ayudaŵa kumanyilila kuti pangali chilichose chalemwisye jwalakwe chakuŵajilwana kuti ampe chilango.

Kombolekasoni kuti Yesu jwakumbusyaga jemanjaji kuti atamose Daudi juŵalembile Salimo 22, jwasimene ni yakusawusya yejinji nambope nganaleka kumnonyela Yehofa. Chiwusyo chaŵawusisye Daudi pa lilemba lila nganichilosya kuti jwalakwe nganakola chikulupi. Panyuma pakuwusya chiwusyo chelechi, jwalosisye kuti Yehofa mpaka ŵakulupusye ŵandu ŵakwe soni chachipitilisya kumpa upile. (Sal. 22:23, 24, 27) Mwakulandana ni yeleyi, atamose Yesu juŵakolanjidwe kuti “Mwanache jwa Daudi” jwalagasiche pachitela chakulagachisya nambo nganiyigopolelaga kuti Yehofa alesile kumnonyela.—Mat. 21:9.

Ana mpaka tujile kuti Yesu jwalosyaga kudandawula mnope ligongo lyakuti Yehofa nganamchenjela jwalakwe pakusaka kuti alosye kukulupichika kwakwe? Nganichiŵa chakulinga cha Yehofa kuti Mwanache jwakwe asimane ni yakusawusya soni kuwa. Yeleyi yatendekwe ligongo lyakuti Adamu ni Hawa nganampikanila Mlungu. Yesu nganalemwa chilichose nambo jwalasile soni kuwa pakusaka kumasya ngani jiŵajitandisye Satana. Jwatesile yeleyi pakusaka kulipila yindu yosope yiyajonasiche. (Maliko 8:31; 1 Pet. 2:21-24) Yosope yene yakomboleche ligongo lyakuti Yehofa nganamchenjela Yesu pa kandaŵi keleka pa umi wakwe.

Komboleka kuti Yesu jwasakaga kuti ŵakulijiganya ŵakwe aganichisyeje mnope ligongo lisyesyene lyalyamtendekasisye Yehofa kukunda kuti jwalakwe awe chamti yeleyi. * Yesu jwamanyililaga kuti mtundu wa chiwa chakwechi uchakuŵasya ŵandu ŵajinji. (1 Akoli. 1:23) Pelepa yikulosya kuti naga ŵakulijiganya ŵa Yesu ŵaganichisyaga chachatendekasisye kuti Yesu awe nikuti yikakamuchisye kumanyilila kusosekwa kwa chiwa cha Yesu. (Agal. 3:13, 14) Nikuti jemanjaji akaganichisyaga yakuti jwalakwe ali Mkulupusyo mmalo mwakumwona kuti ali jwakulemwa.

Atamose kuti ngatukumanyilila ligongo lisyesyene lilyamtendekasisye Yesu kuti aŵechete maloŵe ga palilembali, jwalakwe jwamanyililaga kuti yosope yaŵasimanaga nayo yamkamuchisye kuti akwanilisye chakulinga cha Yehofa. Yesu ali agambile kusala maloŵe ga pa salimo gala kaneko ŵaŵechete kuti, “Yosope yene yitendekwe.” (Yoh. 19:30; Luk. 22:37) Ligongo lyakuti Yehofa ŵamlesile Yesu ngamkamuchisya kwa kandaŵi kanekakwe, yakamuchisye kuti akwanilisye yosope yaŵamtumile kuti ayitende pachilambopa. Yakamuchisyesoni kuti yosope yayalembedwe pakwamba jwalakwe “m’Malamusi gaŵalembile Mose, Ŵakulochesya ni m’buku ja Salimo” yikwanilichikwe.—Luk. 24:44.