KUTANDILA kalakala, Aisalaeli ŵapelekaga mbiya pakusaka kukamuchisya kulambila kweswela. Nambo kaneko ngani jakupeleka misongo jatandite kusawusya mnope ligongo lyakuti mundaŵi ja Yesu, Ayuda ŵapelekaga misongo jejinji mnope.

Jwamlume jwa Chiyuda jwali jwachikulile jwasosekwaga kupeleka chaka chilichose hafu ja mbiya ja sekeli (madilakima gaŵili), kuti akamuchisye kunyumba ja Mlungu. Mundaŵi ja Yesu, mbiya jiŵapelekagaji jakamulaga masengo mpela yakupeleka soni kuti asamalilileje nyumba ja kupopelela jiŵataŵile Helodi. Ayuda ŵane ŵamwusisye Petulo kuti asale naga Yesu akusapeleka msongo mpela welewu. Nambo Yesu jwasasile kuti nganikuŵa kulemwa kupeleka msongowu. Mwamti ŵamsalile Petulo kwampaka ajawule kuti akajigale mbiya jakupelechela msongowu.—Mat. 17:24-27.

Ŵandu ŵa Mlungu ŵakala nombenawo ŵapelekaga chalikumi, yayagopolelaga kuti chatyosyeje chindu chalikumi pa yindu yagungwile kapena pa mbiya syapatile. (Lef. 27:30-32; Num. 18:26-28) Achimlongola ŵadini ŵachisyaga ŵandu kuti apelecheje chalikumichi pa yiliyose yalimile atamose pa tuyindu twamwanamwana mpela “tumbeju twakununjila ni tumbeju twakunonyelesya.” Yesu nganaŵenganaga ni kupeleka chakulimi. Mmalo mwakwe ŵajamwiche alembi ni Afalisi ligongo lyakuti ŵakamulichisyaga masengo lilamusi lya chalikumi mwachinyengo.—Mat. 23:23.

Ayuda ŵasosekwagasoni kupeleka misongo jine kwa Aloma ligongo lyakuti niŵaŵalamulilaga pandaŵijo. Mundu naga akwete mgunda jwasosekwaga kupeleka msongo wa mbiya kapena yindu yachagunguleyo. Yikusalosya kuti mundu jwasosekwaga kupeleka chindu chimo pa yindu chemche kapena msano yiliyose yagungwile. Myuda julijose jwasosekwaga kulipelechela msongo. Msongo welewu ni wele Afalisi ŵamwusyaga Yesu kuti naga kuli kwakuŵajilwa ŵandu kuti apelecheje. Nambo Yesu jwajanjile mwakwakamuchisya ŵandu kumanyilila mwampaka ajiwoneleje ngani ja kupeleka msongo. Jwalakwe ŵatite, “Pelekani kwa Mwenye yayili yakwe ya Mwenye, nipo soni mpeleche kwa Mlungu yayili yakwe ya Mlungu.”—Mat. 22:15-22.

Ŵandu ŵapelekagasoni msongo wakulipila katundu jwakwinjila m’chilambo mwawo. Ŵandu ŵapelekaga msongo kumalo mpela ku yiko, mwajaliji milato, pamalekano nambosoni m’milango jakwawula kumsika kapena ku tawuni.

Msongo uŵapelekaga ŵandu ŵaŵalamulidwaga ni ulamusi wa Loma, waliji ŵakupweteka mnope. Mwakamulana ni yaŵalembile jwakulemba mbili jwine jwa Chiloma lina lyakwe Tacitus, yikulosya mundaŵi jiŵalamulilaga Tibeliyo soni Yesu ali pachilambopa, “Mwenye ku Siliya soni ku Yudeya jwaŵendile kuti ŵatuluchisye mtengo wa msongo uŵasosekwa kupeleka ligongo lyakuti jemanjaji ngamkanakombola kupeleka.”

Kapeleche kamisongoji kaŵaga kakupweteka ligongo lya litala liŵakamulichisyaga masengo lyakwe. Mundu jwapeleche mbiya syejinji kuboma kuti aŵe jwakulokotela misongo, ni juŵamlembaga masengo gakulokotela misongoji. Kaneko nombenajo ŵalembaga ganyu achimjakwe kuti alokoteleje misongo. Jemanjaji ŵalamulaga ŵandu kuti apelecheje msongo wakwela mnope pakusaka kuti apateje kanekakwe. Mwamti litala lyeleli ni liŵakamulichisyaga masengo Sakeyo pakulokotela misongo. (Luk. 19:1, 2) Myoyo, yili yakupikanika kuti Ayuda soni ŵandu ŵane ŵaŵenganaga ni ŵaŵalokotelaga misongo kwa jemanjaji.