1. Ana Yehofa atesile chichi kwa jwalijose jwetuwe?

YEHOFA ni juŵatesile yakomboleka kuti jwalijose jwetuwe aŵe najo paunasi. (Yoh. 6:44) Ana yeleyi yikugopolela chichi? Yehofa paŵalolite ŵandu wosope ŵali pachilambo chapasi ŵakaweni kandu kanekakwe kakusosekwa mnope mwawawojo. Yehofa ŵayiweni kuti akwete mtima wakumtumichila soni mpaka amnonyele. (1 Mbi. 28:9) Jwalakwe akusiŵamanyilila chenene wawojo, akusiŵapikanichisya soni kwanonyela. Yeleyi yili yakulimbikasya kwabasi.

2. Ana Yesu jwalosisye chamtuli mwakusiŵawonela Yehofa ŵandu ŵakwe?

² Yehofa akusiŵanonyela abale ni alongo wosope kupwatikapo wawojo pajika. Kuti tupikanichisye mfundo jeleji, Yesu ŵam’wanichisye Yehofa ni jwakuchinga. Naga jwakuchinga akwete ngondolo 100, jimo ni jisokonechele ana mpaka atende uli? Jwalakwe “mpaka asileche ngondolo [99] mwitumbi ni kuja kujisosasosa jimo jajisokonechele jila.” Nambo mkuchingaju pajipatile ngondoloji nganaŵa ajitumbilile. Jwalakwe akusasangalala. Apatu mfundo jili jakuti Yehofa akusamwona mundu jwalijose kuŵa jwakusosekwa. Yesu jwatite, “Atati ŵangu ŵali kwinani ngakusaka kose kuti atamose jumo jwa ŵanacheŵa ajonasiche.”—Mat. 18:12-14.

3. Ana chitukambilane chichi munganiji?

³ Ngatukusasaka kutenda yindu yiliyose yampaka yakuŵasye abale ni alongo. Ana mpaka tuŵambale chamtuli kwakuŵasya ŵane? Ana mpaka tutende uli naga mundu jwine atukuŵesye? Chitujanje yiwusyo yeleyi mu nganiji. Nambo chandanda kwende tukambilane kaje ya ŵanache ŵakukolanjidwa pa Mateyu chaputala 18.

4. Ana “ŵanacheŵa” ali ŵani?

⁴ “Ŵanacheŵa” ali ŵakulijiganya ŵa Yesu wosope. Ŵakulijiganya wosope ali mpela ŵanache ligongo ali ŵakusachilila kwiganyidwa ni Yesu. (Mat. 18:3) Atamose kuti akusalekangana yilambo  yakutyochela, ndamo, mwakusayiwonela yindu soni umundu wawo, wosopeŵa akusamkulupililaga Yesu Klistu. Nombenajo jwalakwe akusiŵanonyela mnope jemanjaji.—Mat. 18:6; Yoh. 1:12.

5. Ana Yehofa akusapikana uli naga mundu jwine akwakuŵasya ŵakutumichila ŵakwe?

⁵ Ŵanache wosopeŵa ali ŵakusosekwa mnope kwa Yehofa. Kuti tupikanichisye yeleyi kwende tuganichisye mwatukusawonela ŵanache. Jemanjaji ali ŵakusosekwa mnope kwa m’weji. Jemanjaji tukusasaka kwachenjela ligongo ali ŵangali machili, ŵangamanyilila yejinji soni ŵangaganisya mpela mwakusatendela achakulungwa. Atamose ngatukusasaka kuti mundu jwine amkuŵasyeje mjakwe, nambope yikusatukwaya mnope soni tukusayika pakutumbila naga mundu jwine amkuŵesye mwanache. Mwakulandana ni yeleyi, nombe Yehofa akusasaka kutuchenjela. Yikusamkwaya mnope naga mundu jwine akwakuŵasya ŵakutumichila ŵakwe.—Yes. 63:9; Maliko 9:42.

6. Mwakamulana ni lilemba lya 1 Akolinto 1:26-29, ana ŵandu kuchilamboku akusiŵawona mwamtuli ŵakulijiganya ŵa Yesu?

⁶ Ana ŵakulijiganya ŵa Yesu ali “ŵanache” m’litala line lyapi? Chandanda mpaka tuganichisye kuti ana ku chilamboku ni ŵandu ŵapi ŵakusawoneka kuti ali ŵakusosekwa mnope? Ŵandu ŵakwe ali ŵakusichila, ŵakumanyika soni ŵakwete udindo. Mwakulekangana ni yeleyi ŵakulijiganya ŵa Yesu akusawoneka kuti ali ŵangasosekwa, ali ‘tuŵanache’ soni ŵangali mate. (Aŵalanje 1 Akolinto 1:26-29.) Nambo Yehofa akusiŵawona jemanjaji kuti ali ŵakusosekwa mnope.

7. Ana Yehofa akusasaka kuti twawoneje chamtuli abale ni alongo?

⁷ Yehofa akusiŵanonyela ŵakutumichila ŵakwe wosope, mwangasamala kandu kuti atumichile kwa ndaŵi jelewu kapena ali ŵachasambano. Abale ni alongo wosope ali ŵakusosekwa mnope kwa Yehofa. Myoyo nombe m’we twawoneje kuti ali ŵakusosekwa. Tukusosekwa kwanonyela ‘ŵakulupilila achimjetu’ wosope, ngaŵa yakusagula. (1 Pet. 2:17) Myoyo tukusosekwa kutenda yampaka tukombole kuti twachenjeleje soni kwakamuchisya jemanjaji. Naga tumanyilile kuti tumkuŵesye mjetu tukagambaga kuyileka ni kuganisyaga kuti mjetujo ali jwakutumbila chitema soni akusosekwa kwamba kuyiliŵalila. Ana ligongo chichi ŵandu ŵane ŵangakaŵa kutumbila? Komboleka ligongo lya yaŵatite pakaleledwe. Abale ni alongo ŵane akusalipikana kuti ali ŵakusigalila. Ŵanesoni alijiganyisye pachangakaŵapa usyesyene, mwamti nganaŵe kulijiganya kuti akusosekwa kwakululuchila ŵane paŵalemwechesye. Mulimose mwampaka yiŵele, tukusosekwa kutenda yindu yakwikasya mtendele. Konjechesya pelepa, mundu jwakusajanguya kutumbila ŵane pamkuŵesye akusosekwa kumanyilila kuti ndamo jeleji ngaŵa jambone mwamti akusosekwa kuchenga. Akusosekwa kutenda yeleyi ligongo mpaka yimkamuchisye msyenejo soni ŵandu ŵane kuŵa ŵakusangalala.

8. Ana ni ndamo japi jiŵatendaga Ayuda jele jasokonasisyesoni ŵakulijiganya ŵa Yesu?

⁸ Ana chichi chamtendekasisye Yesu kuŵecheta yakwamba ‘ŵanache’? Ŵakulijiganya ŵakwe ŵam’wusisye kuti, “Ana mu Uchimwene wa kwinani jwamkulungwa mnope ali nduni?” (Mat. 18:1) Mundaŵi ja Yesu Ayuda ŵajinji ŵayiwonaga kuti udindo kapena kuŵa mundu jwamkulungwa kuli kwakusosekwa mnope. Jwamlijiganye ya Baibulo jwine jwatite, “Mundaŵi jakalakala ŵandu ŵakundaga kuwa ligongo lyakusaka kuchimbichika soni kumanyikwa.”

9. Ana ŵakulijiganya ŵa Yesu ŵasosekwaga kutenda chichi?

⁹ Yesu jwamanyililaga kuti ŵakulijiganya ŵakwe ŵasosekwaga kulimbichila kuti amasye ndamo ja mpikisano jajatamilichiche pasikati pa Ayuda. Yesu jwasalile ŵakulijiganya ŵakwe kuti, “Jwali jwamkulungwa sikati ja jemanja aŵeje mpela  jwamnondi mwa wosope, soni jwele jwakulamula aŵeje mpela jwakutumichila.” (Luk. 22:26) Tukusaŵa mpela ‘ŵanache’ pa ndaŵi jele tukwawona ŵane kuti ali ‘ŵakutupunda.’ (Afil. 2:3) Patukulingalinga kola ndamo ja kulinandiya ni patukusaŵambala kwakuŵasya ŵane.

10. Ana ni malangiso gapi gaŵasasile Paulo gatukusosekwa kukuya?

¹⁰ Pana mbali sine syele abale ni alongo akusatenda chenene kutupunda m’weji. Mpaka tuyipikanichisye yeleyi naga tukulola ndamo syambone syakwete abale ni alongo. Tukusosekwa kukamulichisya masengo malangiso gaŵalembile ndumetume Paulo gakwawula kwa Aklistu ŵa ku Kolinto. Malangisoga galiji gakuti, “Ana ŵani ŵiŵamlekangenye ni ŵandu ŵane? Ana mkwete chichi chele nginimtenda kupochela? Nambi naga chatesile kupedwa kwa mmwejo ligongo chichi mkulikwesya mpela nginimtenda kupochela?” (1 Akoli. 4:7) Tukusosekwa kuŵambala chilichose champaka chitutendekasyeje kuti tuganisyeje kuti tuli ŵapenani mnope kwapunda ŵane. Naga m’bale akusaŵecheta chenene ngani ku misongano kapena mlongo akwete luso lyakutendesya chenene majiganyo ga Baibulo, ajanguyeje kumbuchila kuti Yehofa ni jwakusasosekwa kupochela uchimbichimbi.

11. Ana Yesu jwatujiganyaga chichi pa ngani ja mwenye ni jwamasengo jwakwe?

¹¹ Yesu ali ŵasalile ŵakulijiganya ŵakwe kuti ngakusosekwa kwakuŵasya ŵane, ŵasalile ngani jakwamba mwenye ni jwamasengo jwakwe. Mwenye ŵamkululuchile jwamasengoju pa ngongole jekulungwa jiŵakwete jakalepele kuwusya. Kaneko jwamasengoju jwalepele kumkululuchila mjakwe, juŵakwete najo ngongole ja mbiya syamnono. Pambesi pakwe mwenyeju ali apikene nganiji, ŵamŵisile mundende jwamasengo jwandanda juŵalepele kumkululuchila mjakwe ngongole ja mbiya syamnono jula. Ana tukulijiganya chichi pelepa? Yesu jwasasile kuti, “Atati ŵangu ŵakwinani tachimtendela myoyosoni jwalijose jwa jemanja naga ngamkwakululuchila achimjenu ni mtima wenu wosope.”—Mat. 18:21-35.

12. Ana tukusakuŵasya chamtuli ŵane patukulepela kwakuluchila ŵakutumichila achimjetu?

¹² Yajwatesile jwamasengoju yakwayiyesoni ŵandu ŵane. Chandanda, jwalakwe ŵamkuŵesye jwamasengo mjakwe ‘mwakumponya mnyumba ja ukayidi mpaka alipile basi ngongolejo.’ Chaŵili, jwakuŵesyesoni ŵamasengo achimjakwe ŵaŵalolaga yindu yangasa yayatendekwagayo. “Ŵamasengo achimjakwe ŵala paŵayiweni yeleyi wakamwile woga ni chanasa kwabasi.” Mwakulandana ni yeleyi yakutenda yetu yikusiyakwayasoni ŵandu ŵane. Ana mpaka chitendekwe chichi naga mundu jwine atukuŵesye nambo tukukana kumkululuchila? Chandanda, tukusamkuŵasya mundu jwatuleŵelejo ligongo lyakuti tukanile kumkululuchila, nganitumpikanila yakuŵecheta soni nganitumtendela chanasa. Chaŵili, ŵandu ŵane mu mpingo ngakusaŵa ŵakusangalala, pamanyilile kuti ngatukumwelana mesi ni mundu jwine.

13. Ana tukulijiganya chichi kutyochela kwa mpayiniya jwine?

¹³ Patukwakululuchila abale ni alongo yikusakamuchisyaga kuti m’weji soni ŵandu ŵane aŵeje ŵakusangalala. Yeleyi ni yayamtendechelesoni mpayiniya jwine. Jwalakwe jwakuŵele ni yajwatesile mlongo jwa mumpingo mwakwe. Jwalakwe jwatite, “Maloŵe gaŵaŵechetaga mlongoju pane yawonekaga mpela kuti akungata ni chipula. Mwamti nganisakaga kwenda ni jwalakwe patukwawula kukulalichila. Kaneko natandite ngasangalala ni utumiki wangu.” Mlongoju jwayiwonaga kuti akwete magongo gakupikanika gakumtendekasya kutumbila. Nambo kaneko jwalakwe nganapitilisya kuŵa jwakutumbila kapena kuliganichisya jika. Jwakamulichisye masengo malangiso ga m’Baibulo gaŵagapatile mungani ja mtwe wakuti “Khululukani Kuchokera Mumtima”, mu Sanja ja Mlonda ja Okotoba 15, 1999.  Jwalakwe ŵamkululuchile mjakwe jula. Ni jwasasile kuti, “Nayiweni kuti wosopewe tukulingalinga kuchenga ndamo sine syakala. Nambosoni Yehofa akusatukululuchila ni mtima wosope lisiku lililyose. Apano ngulipikana kuti ndusile katundu jwakusitopa mnope soni ndandite kusangalala mpela muyaŵelele pandanda.”

14. Ana lilemba lya Mateyu 18:21, 22, likulosya kuti ndumetume Petulo jwalagaga ni chichi? Ana tukulijiganya chichi pa yaŵajanjile Yesu?

¹⁴ Tukumanyilila kuti tukusosekwa kwakululuchilaga ŵane. Nambotu ndaŵi sine mpaka yitusawusyeje kutenda yeleyi. Ndaŵi sine ndumetume Petulo jwalipikanagasoni myoyo. (Aŵalanje Mateyu 18:21, 22.) Ana ni chichi champaka chitukamuchisye? Chandanda, tukusosekwa kuganichisyaga yakusati Yehofa pakutukululuchila. (Mat. 18:32, 33) Pangali chatukusatenda kuti jwalakwe atukululuchile, mmalo mwakwe jwalakwe akusatenda yeleyi mwakusaka kwakwe. (Sal. 103:8-10) Tukusosekwasoni kupikanila lilamusi lyakuti “tunonyelaneje.” Myoyo ngani jakwakululuchila ŵane nganijiŵa jakuti mundu jwalijose akusosekwa kusagula kumkululuchila mjakwe kapena iyayi. Wosopewe mpaka tujile kuti tukwete ngongole jakuti twakululuchileje abale ni alongo ŵetu. (1 Yoh. 4:11) Chaŵili, aganichisyeje yayikusatendekwa naga twakululuchile ŵane. Yikusaŵa kuti tumkamuchisye juŵatukuŵesyejo, tukusalimbikasya mkamulano mumpingo, tukusachenjela unasi wetu ni Yehofa soni yikusaŵa mpela kuti tutusile katundu jwakusitopa. (2 Akoli. 2:7; Akolo. 3:14) Pakumalisya, apopeleje kwa Yehofa juŵapeleche lilamusi lyakuti twakululuchileje ŵane. Tukakunda kuti Satana asokonasye unasi wetu wawupali ni abale ni alongo. (Aef. 4:26, 27) Kuti tukagwila m’chitega cha Satanachi tukusasosekwa chikamuchisyo cha Yehofa.

15. Mwakamulana ni lilemba lya Akolose 3:13, ana mpaka tutende uli naga m’bale kapena mlongo atesile yindu yakutukuŵasya?

¹⁵ Ana mpaka atende uli naga jwakulupilila mjawo atesile yindu yakwakuŵasya wawojo? Atendeje  yiliyose yampaka akombole kuti atamilikasye mtendele. Apopeleje kwa Yehofa mwakutyochela pasi pamtima. Amŵendeje Yehofa kuti ampe upile mundu juŵakuŵesyejo. Tumŵendejesoni kuti tuloleje ndamo syambone syakwete mundujo, syasikumsamtendekasya Yehofa kuti amnonyeleje jwalakwe. (Luk. 6:28) Naga akuyiwona kuti nganaŵa akombwele kuliŵalila yindu yiŵaleŵele ŵane, akusosekwa kutenda yakuti akawonegane najo mundujo. Ndaŵi syejinji yikusaŵaga chenene kuganisya kuti m’bale jwatukuŵesyejo nganatenda mwamelepe. (Mat. 5:23, 24; 1 Akoli. 13:7) Patukuŵechetana najo tuyiwoneje kuti jwakwete nganisyo syambone nambo gamba kuti yamlemile kaŵechete kakwe. Nambi uli naga tupite kukukambilana nambo jwalakwe akulosya kuti ngakusaka? Tukusosekwa ‘tumtendelejepe chanasa.’ Tukapela kutenda yindu mwakuwusimana mtima ni mlongo mjetujo. (Aŵalanje Akolose 3:13.) Chakusosekwa mnope chili chakuti ngatukusosekwa kupitilisya kumtumbilila mundujo ligongo mpaka yijonanje unasi wetu ni Yehofa. Myoyo tukakunda chilichose kutukuŵasya. Kutenda yeleyi kuchilosya kuti tukusamnonyela mnope Yehofa kupunda chilichose.—Sal. 119:165.

16. Ana wosopewe tukwete udindo wamtuli?

¹⁶ Tukusasangalala ni upile wakumtumichila Yehofa mwakamulana mpela “likuga limo” lya ngondolo lyalikwete “mkuchinga jumo.” (Yoh. 10:16) Buku ja Gulu Jakutenda Yakusasaka Yehofa, papeji 165 pakusati, “Ligongo lyakuti mkamulanowu uli wakamuchisya akusosekwa kamuchisya kuti upitilisye.” Tukusosekwa ‘kulingalinga kuti twawoneje abale ni alongo ŵetu mpela mwakusiŵawonela Yehofa.’ Yehofa akusatuwona wosopewe kuti tuli “ŵanache” ŵakusosekwa mnope. Ana mwelemu ni mwatukusawonela abale ni alongo? Yehofa akusalola soni kuyamichila yiliyose yatukusatenda pakwakamuchisya abale ni alongoŵa.—Mat. 10:42.

17. Ana tuli ŵakusimichisya kutenda chichi?

¹⁷ Tukusanonyela mnope abale ni alongo ŵetu. Myoyo tuŵeje ŵakusimichisya kuti tukatenda chilichose chakumkuŵasya mlongo mjetu kapena kumlemwechesya. (Alo. 14:13) Patukwawona abale ni alongo kuti ali ŵakutupunda tuchiŵa ŵakusachilila kwakululuchila ni mtima wosope. Tukakunda kuti yakulemwa ya ŵane yitukuŵasyeje. Mmalo mwakwe “tusoseje yindu yampaka yikamuchisye kuti paŵe pana mtendele, nambosoni kulimbisyana jwine ni mjakwe.”—Alo. 14:19.