Mituka jine tukusajiwona kuŵa japenani ligongo lyakuti atupele mundu jwakwete ukumu, kapena jwakucimbicikwa. Mituka jinesoni, komboleka kuŵa jangakatala, nambope mpaka tujiwone kuŵa jakusosekwa ligongo lyakuti atupele mjetu jwapamtima kapena jwamwiŵasa mwetu. Ni mwayaŵelelesoni ni Jordan jwatumkolasile mu ngani jipite jila pakwamba ya mwaŵawuwonelaga mtuka waŵapocele kutyocela kwa Russell. Ana yeleyi yikamulana catuli ni mbopesi jaciwombolo?

Candanda, Baibulo jikusati, ‘Mlungu ŵamtumisye Mwanagwe jwakupagwa jika pacilambo capasi kuti kupitila mwa jwalakwe tupate umi.’ (1 Yohane 4:9) Maloŵega gakutukamucisya kumanyilila kuti mtukawu wuli wapenani. Pangali jwakwete ukumu wekulungwa kumpunda Mlungu. Pakusala ya jwalakwe, jwamasalimo jwalembile kuti, “Wawo, ŵele lina lyawo lili Yehofa, ŵalakwe jika ali Ŵakwinani Mnope ŵakulamulila cilambo cosope capasi.” (Salimo 83:18) Pangali mundu jwakakombwele kutupa mtuka welewu atamose ali akwete ukumu wekulungwa.

Caŵili, Mlungu ali “Atati ŵetu.” (Yesaya 63:16) Mwatuli? Jwalakwe jwatupele umi. Soni akusatusamalila mwacinonyelo mpela mtati jwakusalipeleka pakwasamalila ŵanace ŵakwe. Yehofa pakuŵeceta ni ŵandu ŵakwe ŵakala jwatite, “Isalayeli, ana m’mweji nganaŵa mwanace jwangu jwapamtima, jwangusamnonyela? . . . Cinjimtendela canasa nditu.” (Yeremiya 31:20) Masiku agano Mlungu akusapikanasoni m’yoyo pakwamba ya ŵakutumicila ŵakwe. Mlungu nganagamba kuŵa Mkupanganya jwamaciligose, nambo alisoni Atati ŵetu ŵakulupicika soni Mjetu. Ana yeleyi  ngayikwatendekasya wawojo kuwuwona mtuka waŵatupelewu kuŵa wakusosekwa mnope?

Mituka jine jikusaŵa japenani ligongo lyakuti jwakupelekajo akusatunonyela mnope, ngaŵa ligongo lyakuti uli ukumu wakwe kutupa. Kusala yisyene, mundu jwakoloŵa magasa jwangajembeceya kum’wucisya yatutendele.

Ligongo lyakutunonyela, Mlungu jwapelece Mwanace jwakwe kuti atuwombole. Baibulo jikusati, “Mlungu ŵalosisye cinonyelo cakwe kwetuwe pakuŵa ŵamtumisye Mwanace jwakwe jwakupagwa jika.” Ligongo cici Mlungu jwatesile yeleyi? “Kuti kupitila mwa jwalakwe tupate umi.” (1 Yohane 4:9) Ana Mlungu jwasosekwaga kutenda yeleyi? Iyayi. Nambo “umbone mtima” wakwe ni wawamtendekasisye kuti amtumisye Yesu Klistu kukupeleka “mbopesi jaciwombolo.”—Aloma 3:24.

Ligongo cici mtuka wa Mlunguwu ukulosya “umbone mtima” wakwe? Baibulo jikusati, “Mlungu akulosya cinonyelo cakwe kwetuwe, mwati patwaliji ŵakulemwa Klistu ŵatuwilile.” (Aloma 5:8) Cinonyelo ni cacamtendekasisye Mlungu kupeleka mtukawu kwa ŵandu ŵakulemwa, ŵaŵasoŵaga cikamucisyo. Mlungu nganasosekwaga kutulosya cinonyelo celeci, soni ngamkanitukombola kum’wucisya. Pakutenda yeleyi, Mlungu jwalosisye kuti akusatunonyela mnope.

Mituka jine jikusaŵa japenani ligongo lyakuti jili japenanisoni kwa mkupelekajo. Naga mundu atupele cimo mwa yindu yakwe yapenani, tukusayamicila mnope.

Mlungu “ŵapelece Mwanagwe jwakupagwa jika.” (Yohane 3:16) Nganagamba kutupa mwanace jwakwe jwalijose, nambo ŵatupele mwanace jwakusamnonyela mnope. Mlungu paŵapanganyaga cilambo cosope, Yesu ŵamkamucisyaga. Ligongo lya yeleyi, Mlungu ‘jwasangalalaga najo.’ (Miyambo 8:30) Yesu ali “Mwanace jwakunonyelwa” jwa Mlungu, soni ali “ciwanicisyo ca Mlungu jwangawoneka.” (Akolose 1:13-15) Mkamulano wawo waliji wekulungwa mnope kupunda wine wuliwose.

Nambo Mlungu “nganatukanya kose Mwanace jwakwe.” (Aloma 8:32) Yehofa jwatupele mundu jwakusosekwa kwa jwalakwejo. Pangalisoni mtuka wapenani kupunda welewu.

Mituka jine jikusaŵa japenani ligongo lyakuti jitukamucisye pa yindu yatwasosecelaga. Mwambone, ana mpaka apikane wuli naga mundu jwine alipelece kwalipilila cikamucisyo cakatala cacipatala? Ana nganaŵa awuweni mtuka welewu kuŵa wapenani?

“Mpela mwayaŵelele kuti kupitila mwa Adamu wosope akusawa, m’yoyosoni kupitila mwa Klistu wosope cacipata umi.” (1 Akolinto 15:22) Pakuŵa tuli ŵanace ŵa Adamu, wosopewe ‘tukusawa.’ Nganituŵa tuŵambele yipwetesi yayikusayika ligongo lya ulwele soni ciwa. Ngamkanitukombolasoni kuŵa paunasi ni Mlungu, nambosoni kuŵa ŵagopoka ku ulemwa. Pakuŵa tuli ŵandu ŵakulemwa, yikatulemile kulikulupusya acimsyewe kapena ŵandu ŵane. Ni ligongo lyakwe Baibulo jikusati, “Jemanjajo ngaŵa mkum’wombola mlongo mjawo, kapena kumpelecela ciwombolo kwa Mlungu . . . Ngasicipatikana kwa ndaŵi syosope.” (Salimo 49:7, 8) Wosopewe twasosekwe cikamucisyo ligongo ngamkanitukombola kulipila mtengo wa mtukawu. M’weji pajika pangali catukatesile.

Ligongo lya cinonyelo cakwe, Yehofa jwapelece mwakusacilila “cikamucisyo” catwasosecelaga, mwati kupitila mwa Yesu “wosope tucipata umi.” Ana mbopesi jaciwombolo jikusakamula masengo mwatuli kuti yeleyi yikombolece? “Miyasi ja Yesu, mwanace jwa Mlungu, jikusatuswejesya ku ulemwa wosope.” Naga  tukusajikulupilila mbopesi jaciwombolo, Mlungu akusatukululucila yakulemwa yetu, soni tucipata umi wangamala. (1 Yohane 1:7; 5:13) Nambi wuli pakwamba ya ŵakunonyela ŵetu ŵaŵawile? Baibulo jikusati, “Pakuŵa ciwa cayice kupitila mwa mundu jumo, m’yoyo, kwimuka ku ŵawe kwayicesoni kupitila mwa mundu jumo, [Yesu].”—1 Akolinto 15:21. *

Yehofa jwalosisye cinonyelo cekulungwa pakupeleka mbopesi jaciwombolo ja Yesu. Mundu nganaŵa atunonyele cati m’yiyi. Yehofa Mlungu atupele mtuka wekulungwa mnope. Pangalisoni mtuka wakamucisya payakusosecela yetu mpela mbopesi jaciwombolo, ligongo lyakuti watugopwele ku ulemwa soni ciwa. Kusala yisyene, mtukawu wuli wapenani kupunda wuliwose.