Mlungu ŵamsalile Adamu kuti, “Palisiku litimcilya [yam’citelaci] timciwa.” (Genesesi 2:17) Yikaliji yangapikanika kumpa Adamu lilamusili yikaŵe kuti Mlungu ŵapanganyisye kuti cacikalambala soni kuwa. Adamu ŵamanyililaga kuti naga ngakulya cisogosi ca m’citelaco ngasawa.

Kuti aŵe ni umi, Adamu ni Hawa nganasosekwaga kulya cisogosi ca m’citelaco. Yeleyi yili myoyo ligongo lyakuti, mumgundamo mwaliji yitela yejinji yiyasogolaga yisogosi. (Genesesi 2:9) Yikaŵe kuti nganalya cisogosi ca m’citelaci, liŵasa lyandandali likalosisye kuti likumpikanila Mlungu juŵapele umi. Yikalosisyesoni kuti jemanjaji ŵamanyililaga kuti Mlungu akwete ufulu wakwalongolela.

Kuti tupikanicisye ligongo lyakwe jemanjaji ŵawile, tukusosekwa kumanyilila yakambilana yayapali yayikusatukwayasoni m’weji masiku agano. Satana jwakamulicisye masengo lijoka pakusala ya unami wakwe wakogoya. Baibulo jikusati, “Lijoka lyaliji lyakalamuka mnope kuyipunda yinyama yosope yiŵayipanganyisye Ambuje Mlungu. Lijokalyo lyam’wusisye jwakongwejo kuti, ‘Ana yakuwona kuti Mlungu ŵatite mkasilya cisogosi ca yitela yiliyose mu mgunda muno?’”—Genesesi 3:1.

Hawa ŵajanjile kuti, “Tukomboleka kulya yisogosi ya yitela yiliyose mu mgunda muno, nambo kuleka citela cacili pasikati pakwe Mlungu ŵatusalile kuti, ‘Tukalya yisogosi ya citela celeci nipo ngatukwenela atamose kuyikwaya, ligongo lyakuti naga tukutenda myoyo tuciwa.’” Kaneko lijokalyo lyatite kuti, “Iyayi, yeleyo ngawa myoyo, kuwa ngasim’wa. Mlungu akumanyilila kuti, pandaŵi jitimcilya yisogosi yeleyi, meso genu tigaciwuguka ni timciŵa mpela mwaŵelele Mlungujo, timcimanyilila yindu yambone ni yakusakala.” M’yoyo, Satana jwaŵecete kuti Mlungu ali jwaunami soni nganasakaga kuti Adamu soni Hawa akole yindu yambone.—Genesesi 3:2-5.

Hawa jwakulupilile yaŵapikeneyo. Hawa ŵatandite kuciwona citelaco kuti caliji cakusalala, soni kuti yisogosi yakwe yaliji yakunong’a kulya. Myoyo ŵakaŵile yisogosi ya m’citelaco ni kulya. Baibulo jikusati, “Ni ŵajigele yine soni kuja kukwapa ŵamkwawo, nipo jwalakwejo ŵalile.”—Genesesi 3:6.

Mlungu yamsakalisye mnope paŵaweni ŵanace ŵakwe ŵakunonyelwa ali asagwile kuti akampikanila. Ana ni jwatesile cici? Mlungu ŵamsalile Adamu kuti, “Timciwujila . . . kwitaka kumwatyocele. Nampanganyisye kutyocela kwitaka kukoko timciwujila.”  (Genesesi 3:17-19) Paligongoli Adamu “ŵawile ali ŵana yaka 930.” (Genesesi 5:5) Adamu nganajawula kwinani kapena kupitilisya kuŵa ni umi kumalo ganegakwe. Yehofa mkanampanganye Adamu, Adamujo kwaliji kuli kwangali. Paŵawile, ŵawujile kwitaka kuŵatyocele ni kuŵa luwundu. Jwalakwe apano kwangali. Yeleyi yili yakutesya canasa.

Ligongo lya ungapikanila wawo, Adamu ni Hawa ŵajasile upile wakuŵa ŵamlama soni wakutama ni umi wangamala. Jemanjaji ŵasimene ni kucenga kwekulungwa, nganaŵa ŵamlama soni ŵaliji ŵakulemwa. Yeleyi, yakwayiyesoni ŵanace ŵakwe wosope ŵaŵapagwaga ali ŵangali umlama. Pa Aloma 5:12 pakusati, “Ulemwa wayice pacilambo capasi ligongo lya mundu jumo, nipo ulemwawo wayice naco ciwa. M’yoyo ciwa cijendelecele kwa ŵandu wosope ligongo jwalijose alemwisye.”

Baibulo jikusasala ya ulemwa ni ciwa mpela nguwo ‘jajiwunicile mitundu josope ja ŵandu.’ (Yesaya 25:7) Nguwo jajiwunicile ŵandu wosopeji, jili mpela lyosi lya poyisoni lyalikutendekasya ŵandu kusoŵa kwakutilila. Baibulo jikusati, “ŵandu wosope akusawaga ligongo lya ulongo wa Adamu.” (1 Akolinto 15:22) Mwakamulana ni yaŵaŵecete ndumetume Paulo, ciwusyo mpaka ciŵe cakuti, “Ana nduni jucacingulupusya une ku ndamo jangu jitijinjigalile kuciwaji?” Ana apali jwalijose?—Aloma 7:24.