AGAMBE ganicisya kuti akulolela fidiyo ja mundu jwakumanyika mnope pangani jakwimba nyimbo, jwakusamnonyela. Fidiyoji jikutanda kulosya jwakwimbaju kutandila ali mwanace ali mkulijiganya kwimba nyimbo ni kulinjililaga ndaŵi ni katema. Kaneko akum’wona juli mkutenda cenene. Jwalakwe akwawula kukwimba m’yilambo yejinji soni akuŵa jwakumanyika mnope pacilambo cosope. Fidiyojo jikulosya mundu ali akalambele soni jikumala mundujo pawile.

Ngani jajili mu fidiyoji jili jisyesyene jele mundu jwakwe jwawile. Yeleyi mpaka yimtendecele jwalijose, cinga jwakwimba, jwasayansi, jwandakatulo, kapena mundu jwine jwakumanyika mnope. Jwakwimbaju jwatesile yindu yejinji yambone, nambo agambe ganicisya yindu yejinji yakatesile yikaŵe kuti nganijukalambala ni kuwa.

Patukuganicisya kuti tuciwa, tukusadandawulaga. (Jwakulalicila 9:5) Atamose kuti mpaka tulinjelinje kutenda yiliyose yampaka tukombole, nambo ucekulu soni ciwa nganituŵa tuyiŵambele. Konjecesya pelepa, mpaka tulwale kapena kutenda ngosi ni kuwa mwangajembeceya. Baibulo jikusasala kuti tuli mpela lyosi “lyalikusawoneka mwakatema ni kusimilila mwangakaŵa.”—Yakobo 4:14.

Ligongo lyakuti ndaŵi jilijose mpaka tuwe, ŵandu akwete nganisyo syakuti “kwende tugambeje kulya ni kumwa, pakuti malaŵi cituwe.” (1 Akolinto 15:32) Ŵandu akusatendaga yeleyi ligongo akusamanyilila kuti pangali jwampaka aŵambale ciwa. Ndaŵi sine yakusawusya ya paumi, mpaka yitutendekasye kuliwusyaga kuti, ‘Ana umi ni uwuwupe basi?’ Ana kwanga kwakwe mpaka tukupate kwapi?

Ŵandu ŵajinji akusakulupilila kuti kwanga kwa ciwusyoci mpaka akupate kwa ŵandu ŵasayansi. Ŵasayansi soni madokotala apatile yindu yine yakamucisya kuti ŵandu atameje ni umi kwa ndaŵi jelewu. Soni ŵasayansi ŵane akutenda yakomboleka kuti umi uŵeje welewu kupunda pelepa. Mwangasamala kandu ni yatesile, yiwusyo mpaka yiŵe yakuti, Ligongo cici tukusakalambala soni kuwa? Ana pana cembeceyo cakuti ciwa cicimala? Ngani syakuyicisya tukambilane yiwusyo yeleyi soni kwanga kwa ciwusyo cakuti, Ana umi ni uwuwupe basi?