Yajikusasala Baibulo: “Mtima wenu ukaŵaga pa mbiya, nipo yele yimkweteyo, mjikutileje nayo.”—Ahebeli 13:5.

Masiku agano, pana yindu yejinji yakusalimbikasya ŵandu kuti tukusosekwa kola. Nambo Baibulo jikusatusalila kuti yele ‘yitukweteyo, tujikutileje nayo.’ Mwamtuli?

Tuŵambaleje “kunonyela mbiya.” Ŵandu akusatenda yiliyose, atamose kuti mpaka yijonanje yilu yawo, maŵasa, unasi, ndamo syambone, atamosesoni ucimbicimbi wawo ligongo ‘lyakunonyela mbiya.’ (1 Timoteo 6:10) Yeleyi yili yangakamucisya. Pambesi pakwe, ŵandu ŵakunonyela yipanje “ŵangajikutila.”—Jwakulalicila 5:10.

Twawoneje ŵandu kuŵa ŵakusosekwa ngaŵaga yindu. Kusala yisyene, yindu yakucilu yili yakamucisya. Nambo yindu yeleyi nganiyiŵa yitunonyele kapena kutuyamicila. Nambo ŵandupe ni ŵampaka atende yeleyi. Kola ‘mjakwe jusyesyene’ mpaka kutukamucisye kuŵa ŵakusangalala ni umi.—Misyungu 17:17, NW.

Yajikusasala Baibulo: “Mtima wakusangalala uli mtela wambone.”—Misyungu 17:22.

Mpela mwawukusatendela “mtela wambone,” kusangalala mpaka tukukamucisye kupilila pandaŵi jatukulwala. Nambo, ana mpaka tutende wuli kuti tuŵe ŵakusangalala pandaŵi jatukulwala?

Tuŵeje ŵakuyamicila. Naga tukwambaga ganicisya ya yakusawusya yetupe, nikuti “masiku gosope” mpaka gaŵe gakusakala. (Misyungu 15:15) M’malo mwakwe, Baibulo jikusasala kuti, “Mŵeje ŵakutogolela kapena kuti ŵakuyamicila.” (Akolose 3:15) Tulijiganyeje kuŵa ŵakuyamicila atamose pa yindu yamwana. Kusalala kwa lyuŵa palikukapila, kambepo kakusisimila cenene, kumwemwetela kwa jwakunonyelwa jwetu, mpaka yitukamucisye kuŵa ŵakusangalala paumi wetu.

Twakamucisyeje ŵandu ŵane. Atamose pandaŵi jangatukusimana cenene m’cilu, Baibulo jikusasala kuti, “kupeleka kukusampa upile mundu kulekangana ni kupocela.” (Masengo 20:35) Naga ŵandu ŵane akutuyamicila pa yindu yatwatendele, tukusaŵaga ŵakusangalala soni ngatukusaganicisyaga mnope ya yakusawusya yetu. Patukwakamucisya ŵane kuŵa ŵakusangalala m’wejisoni kutuŵaga ŵakusangalala.

Yajikusasala Baibulo: ‘Akomboleje kusagula ayo yayili yambone mnope.’—Afilipi 1:10.

Maŵasa gagakusamalila ndaŵi jamnono gali mkukunguluka, unasi wawo mpaka utande kunandipa. Ŵalombane akusosekwa kuwuwonaga ulombela wawo kuŵa wakusosekwa mnope paumi wawo.

Tutendeleje yindu pampepe. Mpaka atende yeleyi, mwakupata ndaŵi jakutendela yindu pampepe. Baibulo jikusasala kuti, “Kuli kwambone kutama ŵandu ŵaŵili kulekangana ni kutama jikape.” (Jwakulalicila 4:9) Pali pampepe, mpaka akamusyanganeje kuteleka yakulya, kutenda mang’asi gakulimbikasya cilu, kumwa yakusisimisya kulukosi pandaŵi jakunguluka, kapena kutenda yindu yine yakusangalasya.

Tulosyeje kuti tukusitwanonyela aciŵamkwetu. Baibulo jikusijalimbikasya ŵalombane kunonyelana soni kucimbicisyana jwine ni mjakwe. (Aefeso 5:28, 33) Kwatelecela ka mkomya, kunguluka soni kwasumila mituka mpaka kulimbisye ulombela. Ŵalombane akusosekwa kuŵa ŵakulupicika kwa jwine ni mjakwe.—Ahebeli 13:4.