Naga yipwetesi ngakusatendekasya Mlungu, nambi ŵani ŵakutendekasya sala jakogoya, usawuci, ngondo, yilwele nambosoni ngosi sya m’cipago? Baibulo jikusasalaga yindu yitatu yekulungwakulungwa yayikusatendekasya kuti ŵandu asimaneje ni yipwetesi:

1. Kulinonyela, Kutunduka, soni Uŵengani. “Mundu ampwetece mjakwe mwakumlamulila.” (Mlaliki 8:9) Ndaŵi ni katema ŵandu akusasimana ni yakusawusya ligongo lya ungali umlama, kulinonyela, kapena ŵandu ŵa ngalwe.

2. Ndaŵi ni Yakutendekwa Yangayijembeceya. Ŵandu ndaŵi syejinji tukusalaga ‘ligongo lyakuti ndaŵi ni yakutendekwa yangayijembeceya yikusatutendecela.’ (Jwakulalicila 9:11) Yeleyi yikusatendekwa naga ŵandu ali pamalo gakulemweceka soni pandaŵi jakulemweceka, nambosoni naga ŵandu ngakusamala, kapena akulemwesya katende ka yindu yine.

3. Jwakulamulila Jwakusakala jwa Cilamboci. Baibulo jikusasala mwakupikanika cenene cindu cekulungwa cacikusatandikasya kuti ŵandu asimaneje ni yipwetesi. Jikusati, “Cilambo cosope cili m’miyala mwa jwakusakalajo.” (1 Yohane 5:19) “Jwakusakalajo” ali Satana jwele pandanda jwaliji lilayika lya Mlungu, nambo “nganatamilicika mu usyesyene.” (Yohane 8:44) Malayika gane gaŵele ku mbali ja Satana pakumjimucila Mlungu ligongo lya kulinonyela kwawo. Yeleyi yatendekasisye kuti gaŵe yiŵanda. (Genesesi 6:1-5) Kutandila pandaŵi jiŵajimucile, Satana ni yiŵanda yakwe atendekasisye kuti pacilambopa paŵe yangalwe yejinji. Yeleyi ni yayikutendekwa mnopemnope mu ndaŵi jetu jino. Apano Satana atumbile mnope soni ‘akusokonasya cilambo cosope kwali ŵandu.’ Nambosoni atendekasisye kuti paŵe “likungu pacilambo capasi.” (Ciwunukuko 12:9, 12) Kusala yisyene, Satana ali jwakulamulila jwangalwe mnope. Jwalakwe akusasangalala ŵandu pakulaga ni yipwetesi. M’yoyo Satana ni jwakusatendekasya yipwetesi ngaŵaga Mlungu.

AGANICISYE AYI: Mundu jwangali canasa, jwakusakala mnope ni jwampaka atendekasye yipwetesi kwa ŵandu ŵangalemwa. Mwakulekangana ni yeleyi Baibulo jikusasala kuti, “Mlungu ali cinonyelo.” (1 Yohane 4:8) Mwakamulana ni cinonyelo cakweci “yili yangakomboleka kwa Mlungu kutenda yakusakala, soni Jwamaciligose ngaŵa mkutenda yakulemweceka.”—Yobu 34:10.

Nambope mwine mpaka aliwusye kuti, ‘Ana Mlungu jwamaciligose amkundile Satana kuti alamulile mpaka cakaci?’ Mwatuyiwonele munganiji, yikulosya kuti Mlungu akusaŵengana ni yakusakala soni yikusampweteka pakutukusimana ni yipwetesi. Konjecesya pelepa, Baibulo jikusati, “Atule pa jwalakwe yayikwalagasya nganisyo, pakuŵa jwalakwe akusiŵaganicisyaga.” (1 Petulo 5:7) Mlungu akusatunonyela soni akwete macili gakumasya yipwetesi yosope nambosoni yindu yangali cilungamo yatukusimana nayo. Citulijiganye yeleyi mungani jakuyicisya. *