“Ligongo Cici Mlungu Jwakundile Yeleyi?”
“NDAŴI NI KATEMA NGUSALIWUSYA KUTI, LIGONGO CICI MLUNGU JWAKUNDILE YELEYI KUTENDEKWA?”— Papa Benedict 16 jwaŵecete yeleyi paŵayice kumalo gagaliji ndende jakulagacisya ŵandu ku Auschwitz m’cilambo ca poland.
PAYITENDEKWE YAKUSAWUSYA ANA PAKWETE PALIWUSISYE KUTI, ‘LIGONGO CICI MLUNGU JWAKUNDILE YELEYI KUTENDEKWA?’ KAPENA PAUMI WAWO ŴASIMENE NI YIPWETESI YAYATENDEKASISYE KUKAYICILA NAGA MLUNGU AKUSASAMALA YA WAWOJO PAJIKA?
Komboleka akulipikana mpela mu ŵalipikanilaga Sheila jwakusatama ku United States. Ligongo lyakuti jwakulile m’liŵasa lyalyanonyelaga mnope ya dini, jwalakwe jwatite, “Kutandila ndili mwanace natendaga lung’wanu ni ya Mlungu ligongo ali Mkupanganya jwetu. Nambope nganinalipikanaga kuŵa jwakuŵandikana ni Mlungu. Naganisyaga kuti Mlungu ŵambonelaga kwakutalika mnope. Nambosoni nganinalipikanaga kuti Mlungu akuŵengana ni une, kwamba kuti nganingulupililaga kuti akusasamalaga ya uneji”. Ana ligongo cici Sheila ŵakayicilaga yakuti Mlungu akusamnonyela? Jwalakwe jwatite, “Nayiwonaga kuti Mlungu ngakutukamucisya amta panandi ligongo mwiŵasa mwetu twasimanaga ni yakusawusya yejinji.”
Mwakulandana ni Sheila komboleka akusakulupilila kuti kwana Mlungu Jwamaciligose. Nambope mwine mpaka akayicileje naga yisyene kuti Mlungu akusasamala ya wawojo. Nombenajo mundu jwakulungama Yobu, juŵakwete cikulupi ca macili mwa Mkupanganya, jwakayicilaga yakuti Mlungu akusasamala ya jwalakwejo. (Yobu 2:3; 9:4) Yobu ali asimene ni yakusawusya yejinji mwakuwilisyawilisya yamtendekasisye kusoŵa pakwegamila. Jwalakwe jwam’wusisye Mlungu kuti, “Ligongo cici akusisa ngope jawo soni akumbona kuŵa m’magongo jwawo?”—Yobu 13:24.
Ana Baibulo jikusasala yamtuli? Ana tumjimbeje magambo Mlungu patusimene ni yakusawusya? Ana pana umboni wakulosya kuti Mlungu akusasamala ya ŵandu wosope soni ya mundu jwalijose pajika? Ana panasoni umboni wakulosya kuti Mlungu akusatupikanicisya, kutumanyilila, kapena kutukamucisya pa yakusawusya yatukusimana nayo?
Mu ngani syakuyicisyasi, citulijiganye kutyocela ku yakupanganyikwa. (Aloma 1:20) Kaneko citulole yajikusasala Baibulo pakwamba yakusati Mlungu pakutusamalila. Kulijiganya mnope ya jwalakwe kupitila mu yakupanganyikwa soni Baibulo yicakamucisya kuti ammanyilile cenene Mlungu soni kusimicisya kuti “jwalakwe akusiŵaganicisyaga.”—1 Yohane 2:3; 1 Petulo 5:7.
You May Also Like
SANJA JA MLONDA
Ana Mlungu Akusiŵamanyilila Wawojo?
Ana pana umboni wamtuli wakulosya kuti Yehofa akusatenda lung’wanu ni wawojo?
