1-2. Ana lilemba lya Jwakulalichila 11:6, likukamulana chamtuli ni masengo getu gakulalichila?

MU YILAMBO yine ŵandu akusapikanila chenene ngani syambone. Jemanjaji akusaŵa ŵakoseka kupikanila ngani syambonesi ndaŵi jilijose. Nambotu m’yilambo yine, ŵandu ngakusasangalala mnope kwasalila ya Mlungu kapena ya Baibulo. Ana kumangwawoko ŵandu akusatenda wuli? Chinga ŵandu akupikanila kapena iyayi, Yehofa akusasaka kuti tupitilisyepe kukamula masengo gakulalichilaga mpaka pachachitusalila kuti basi tuleche.

² Yehofa jwaŵisile kala ndaŵi jele masengo gakulalichila gachimala. Pagachigamba kumala masengoga, “mbesi tijichiyika.” (Mat. 24:14, 36) Nambope mbesiji mkanijiŵe kwika, ana mpaka tupikanile chamtuli maloŵe gakuti “mkamuleje masengo mpaka ligulo? *—Aŵalanje Jwakulalichila 11:6.

3. Ana chitukambilane chichi munganiji?

³ Mungani jajipite jila twakambilene yindu mcheche yampaka yitukamuchisye kuti tukamuleje chenene masengo gakulalichila. (Mat. 4:19) Sambano mungani ajino chitulole yampaka tutende kuti tuŵe ŵakusimichisya kukamula nawo masengo gakulalichila atamose tuli mkusimana ni yakusawusya. Chitulolesoni yatukusosekwa kutenda kuti (1) tukakunda chilichose kutusokonasya, (2) tuŵeje ŵakuwusimana mtima, soni (3) kuti tukole chikulupi chakulimba.

4. Ligongo chichi ngatukusosekwa kukunda chilichose kutusokonasya patukukamula masengo gatupele Yehofa?

⁴ Yesu jwasasile ya yindu yayichakamuchisya ŵakulijiganya ŵakwe kumanyilila kuti akutama m’masiku gambesi. Ŵasasilesoni  kuti naga ngasamala, yindu yeleyi yichalepelekasya kumalisya kukamula masengo gakulalichila. Soni ŵasalile jemanjaji kuti “aŵeje mesope.” (Mat. 24:42) Yatukusasimana nayo masiku agano yikulandana ni yaŵasimene nayo Nowa. Ŵandu ŵa mundaŵi jakwe nganapikanila ata panandi utenga wakwelusya waŵalalichilaga jwalakwe. (Mat. 24:37-39; 2 Pet. 2:5) Myoyo, tukakunda kuti chilichose chitusokonasye patukukamula masengo gatupele Yehofaga.

5. Ana lilemba lya Masengo 1:6-8 likusalosya kuti masengo gakulalichila gakusosekwa kulalichidwa mpaka kwapi?

⁵ Masiku agano tukusosekwa kulipeleka mnope pamasengo gakulalichila kupundana ni kalakose. Yesu jwasasile kuti jwalakwe pachachiwa, masengo gakulalichila gachikamulidwa mnope kupunda mwaŵatendele jwalakwejo pakugakamula. (Yoh. 14:12) Yesu paŵawile, ŵakulijiganya ŵakwe ŵane ŵawujile kumasengo gawo gakuwulaga somba. Jwalakwe paŵagambile kwimuka jwakamuchisye ŵakulijiganya ŵakwe kuwulaga somba syejinji mwakusimonjesya. Jwatesile yeleyi pakusaka kwakamuchisya ŵakulijiganya ŵakwewo kumanyilila kuti masengo gakulalichila gali gakusosekwa mnope kupunda chilichose. (Yoh. 21:15-17) Yesu ali asigele panandi kwawula kwinani jwasalile ŵakulijiganya ŵakwe kuti ngani syambone sichilalichidwa pachilambo chosope chapasi. (Aŵalanje Masengo 1:6-8.) Pali papite yaka, Yesu ŵamlosisye ndumetume Yohane yindu yayichitendekwa pa “lisiku lya Ambuje.” * Chindu chine chakusimonjesya chaliji chakuti, Yohane ŵaliweni lilayika “lilyakwete ngani syambone syakuti silalichidwe kwa ŵandu ŵapachilambo chapasi, kwa ŵandu ŵamtundu wuliwose, ŵalukosyo lulilose ni chiŵecheto chilichose.” (Chiw. 1:10; 14:6) Pelepatu yikulosya kuti Yehofa akusaka kuti tupitilisye kukamula masengo gakulalichilaga mpaka pandaŵi jachachisala kuti basi tuleche.

6. Ligongo chichi ngatukusosekwa kukunda chilichose kutusokonasya patukukamula masengo gakulalichila?

 ⁶ Nganituŵa tukundile kuti yindu yine yitusokonasye naga tukuganichisya yakuti Yehofa pakutukamuchisya m’weji. Yehofa akutupa chakulya chejinji chausimu. Mwachisyasyo, akutupa mabuku ni magasini, soni yindu yakwamba kupikanila, mafidiyo nambosoni yindu yejinji ya pa Intaneti. Agambe ganisya, pa webusayiti jetu pakusimanikwa yindu yejinji m’yiŵecheto yakupunda 1000. (Mat. 24:45-47) Ŵandu m’chilambochi ali ŵangakamulana ligongo lyakulekangana pangani syandale, dini soni kapate ka mbiya. Nambo ŵakutumichila ŵa Yehofa ŵakupunda 8 miliyoni ali ŵakamulana yisyesyene pachilambo chosope chapasi. Mwachisyasyo, Lyamsano pa Epulo 19, 2019, ŵa Mboni sya Yehofa wosope ŵaliji ŵakusangalala kulolela fidiyo jakulosya kukambilana lilemba lyesiku. Ligulo lyakwe palisikuli, ŵandu ŵakwana 20,919,041, ŵasongene pampepe kuti atende mwambo wakukumbuchila chiwa cha Yesu. Chelechitu chili chakusimonjesya chekulungwa chachikutendekwa masiku agano. Ni ligongo lyakwe ngatukusosekwa kukunda chilichose kuti chisokonasye upile watukwete wakulalichila ngani syambone.

7. Ana chisyasyo cha Yesu mpaka chitukamuchisye chamtuli kuti yindu yine yikatusokonasyaga?

⁷ Mpaka tulosyesoni kuti ngatukukunda chilichose kutusokonasya pamasengo gakulalichila naga tukukuya chisyasyo cha Yesu. Jwalakwe nganakunda chilichose kumsokonasya paŵakamulaga masengo gakulalichila. (Yoh. 18:37) Yesu nganajigalika pandaŵi jele Satana ŵamsalile kuti champe “uchimwene wosope wapasi pano ni ukulungwa wakwe.” Atamose pandaŵi jele ŵandu ŵasakaga kuti am’weche uchimwene, jwalakwe nganajigalika. (Mat. 4:8, 9; Yoh. 6:15) Yesu nganakola nganisyo syakumbila chipanje soni nganajogopa kuti ŵandu chamnyosyeje. (Luk. 9:58; Yoh. 8:59) Patusimene ni yindu yakulinga chikulupi chetu mpaka tuŵe ŵakulimba naga tuli mkuganichisya maloŵe gaŵasasile Paulo. Jwalakwe jwalimbikasisye Aklistu kuti akuyeje chisyasyo cha Yesu ni chakulinga chakuti ‘akatenguka ni kwasa mtima.’—Aheb. 12:3.

8. Ana kuwusimana mtima kukusagopolela chichi? Ligongo chichi kuli kwakusosekwa mnopemnope apano?

⁸ Mundu akusalosya kuti ali jwakuwusimana mtima naga akukombola kwembecheya kuti yindu yineyakwe yitendekwe. Chinga mundu akwembecheya kuti yindu yineyakwe yakusakala yimale, kapena akwembecheya kwanilichikwa kwa yindu yineyakwe yambone, akusasosekwape kuŵa jwakuwusimana mtima. Mwachisyasyo, jwakulochesya Habakuku jwajembecheyaga kuyiwona yindu yakusakala yayatendekwaga ku Yuda yili yimasile. (Hab. 1:2) Nombenawo ŵakulijiganya ŵa Yesu ŵajembecheyaga kuti Mlungu chatamilikasye Uchimwene mwangakaŵa soni kwakulupusya ku ulamusi wa Loma wawaliji wangasa. (Luk. 19:11) M’wejisoni tuli ŵakusachilila mnope kujiwona ndaŵi jele Uchimwene wa Mlungu uchityosya yakusakala yosope ni kwika nacho chilambo chasambano chachilungamo. (2 Pet. 3:13) Nambope tukusosekwa kuŵa ŵakuwusimana mtima ni kwembecheyaga ndaŵi jele Yehofa chachitenda yeleyi. Aganichisye yindu yine yakusatenda Yehofa pakusaka kutukamuchisya kuŵa ŵakusimana mtima.

9. Ana yisyasyo yapi yayikusalosya kuti Yehofa ali jwakuwusimana mtima?

⁹ Yehofa ali chisyasyo chambone pangani jakuwusimana mtima. Jwalakwe ŵamjembecheye Nowa kwandaŵi jelewu kuti amalisye masengo gakwe gakutaŵa chombo soni ‘kulalichila ya chilungamo.’ (2 Pet. 2:5; 1 Pet. 3:20) Yehofa ŵalosisyesoni kuwusimana mtima pandaŵi jele Abulahamu ŵamwusyaga yiwusyo mwakuwilisyawilisya. Pandaŵiji Abulahamu ŵasakaga kumanyilila yachatende Mlungu pakonanga ŵandu ŵakusakala ŵa mumsinda wa Sodomu ni Gomola. (Gen. 18:20-33) Kwa yaka yejinji Yehofa jwaŵele  jwakuwusimana mtima mnope paŵatendaga yindu ni Aisalaeli ŵaŵaliji ŵangakulupichika. (Neh. 9:30, 31) Masiku aganosoni Yehofa akupitilisya kuŵa jwakuwusimana mtima mnope. Akutenda yeleyi pakusaka kuti ŵandu aleche ndamo syawo syakusakala ni chakulinga chakuti aŵe najo paunasi wambone. (2 Pet. 3:9; Yoh. 6:44; 1 Tim. 2:3, 4) Yaŵele ali mkutenda Yehofayi, yikutukamuchisyasoni m’weji kuti tuŵeje ŵakuwusimana mtima patukamula masengo gakulalichila soni kwajiganya ŵandu. Yehofa akusatujiganya kusosekwa kwa kuwusimana mtima kupitila mu yisyasyo yayikusasimanikwa m’Maloŵe gakwe.

10. Ana lilemba lya Yakobo 5:7, 8, likutujiganya ya ndamo jakusosekwa mnope japi jakusakola mlimi?

¹⁰ Aŵalanje Yakobo 5:7, 8. Yakusatenda mlimi pakupanda mbeju yikusatujiganya ndamo ja kuwusimana mtima. Yili yisyene kuti mbeju sine sikusakula mwakwanguya. Nambo pana mbeju sine syasikusajigala ndaŵi jelewu kuti sikomale, mnopemnope syasikusasogola yisogosi. Mwachisyasyo, mbeju syaŵapandaga alimi ŵa mundaŵi ja Aisalaeli, syajigala miyesi 6 kuti sikomale. Mlimi jwapandaga mbeju syakwe chakundanda kwa Okotoba, soni jwajembecheyaga kugowola mbejusyo m’mwesi wa Epulo kapena Meyi. (Maliko 4:28) Myoyo, mpaka yiŵe chenene naga tukuŵa ŵakuwusimana mtima mpela mwakusatendela mlimi. Nambo kutenda yeleyi, nganijiŵa ngani jamasanje.

11. Ana kuwusimana mtima mpaka kutukamuchisye chamtuli pamasengo gakulalichila?

¹¹ Ŵandu ŵakulemwawe, tukusasaka kuyiwona ndaŵi jijojo yakuyichisya ya masengo gatukamwile. Nambopetu, tukusasosekwa kwembecheya kuti tugowole yindu yatupandile. Mwachisyasyo, tukusasosekwa kulima, kupanda, kulimila soni kwitila. Nombenago masengo gakwajiganya ŵandu gakusasosekwa kulipeleka. Mwachisyasyo, pakusajigala ndaŵi jelewu kuti tumkamuchisye jwakulijiganya jwetu kutyosya nganisyo sya lusagu mumtima mwakwe. Yeleyitu yikusaŵa mpela tukuchuŵila mbeju. Kuwusimana mtima kukusatukamuchisyasoni kuti tukatenguka patusimene ni yakusawusya. Tukusasosekwape kuŵa ŵakuwusimana mtima, atamose  pandaŵi jele ŵandu akuwoneka kuti akupikanila chenene utenga wetu. Tukuŵecheta yeleyi ligongo nganituŵa tumkanganichisye jwakulijiganya Baibulo kuti akole chikulupi chakulimba. Atamose ŵakulijiganya ŵa Yesu ndaŵi sine yasawusyaga kupikanichisya yaŵajiganyaga Yesu. (Yoh. 14:9) Myoyo, tukumbuchileje kuti m’weji mpaka tupande soni kwitila, nambo Mlungu ni jwakusakulisya.—1 Akoli. 3:6.

12. Ana kuwusimana mtima mpaka kutukamuchisye chamtuli patukwalalichila ŵachibale?

¹² Ndaŵi jine jele kuwusimana mtima kukusaŵa kwakusawusya, jili patukwalalichila ŵachibale. Ndaŵi mpela jeleji lilemba lya Jwakulalichila 3:7, mpaka litukamuchisye. Paja likusati, “Pana ndaŵi jakutama jii ni ndaŵi jakuŵecheta.” Ndamo syetu mpaka syakamuchisye ŵachibale kutanda kupikanila utenga watukusalalichila. Nambope ndaŵi sine tukusasosekwa kwasalila jemanjaji yakwamba Yehofa. (1 Pet. 3:1, 2) Yili yisyene kuti tukusasosekwa kulimbichila patukulalichila usyesyene. Nambope, tukusasosekwa kuŵa ŵakuwusimana mtima kwa ŵandu wosope.

13-14. Ana yisyasyo yayisasile mundimesi yikutujiganya chichi m’weji?

¹³ Mpaka tulijiganye kuŵa ŵakuwusimana mtima kutyochela pa yisyasyo ya ŵandu ŵane ŵakala nambosoni ŵamasiku agano. Mwachisyasyo, Habakuku jwajembecheyaga ali akuweni kumala kwa yindu yakusakala yayatendekwaga pandaŵijo. Nambope jwalakwe jwalosisye kuwusimana mtima pajwaŵechete kuti, ‘Tinjikwela pa sanja jangu jakulondela ni kwembecheyaga.’ (Hab. 2:1) Nombenajo ndumetume Paulo jwalosisye kuti jwaliji jwakusachilila ‘kumalisya’ utumiki wakwe. Nambopetu jwalakwe jwapitilisyepe kulalichila “ngani syambone” mwakuwusimana mtima.—Mase. 20:24.

¹⁴ Kwende tulole chisyasyo cha liŵasa line lilyatesile nawo Sukulu ja Gileadi. Liŵasali palyamalisisye majiganyo gawo, ŵalitumisye ku chilambo chine kwele dini jekulungwa ja m’chilambocho nganijiŵa ja Chiklistu. Ŵandu ŵajinji kweleko nganasangalalaga kulijiganya Baibulo. Nambo achimjawo ŵaŵajinjile nawo yimpepe Sukulu ja Gileadi ŵele ŵatumichilaga m’yilambo yine, ŵatumichisyaga mautenga gakusala kuti akutendesya majiganyo gejinji ga Baibulo. Atamose kuti liŵasali lyatumichilaga m’chilambo chele ŵandu ŵakwe nganasangalalaga ni kulijiganya Baibulo, ŵapitilisyepe kulalichila mwakuwusimana mtima. Ali alalichile kwa yaka 8 m’chilambochi, jemanjaji ŵaliji ŵakusangalala mnope kum’wona mundu jumo mwa ŵandu ŵaŵajiganyaga Baibulo ali mkubatisidwa. Ana yisyasyo ya ŵandu ŵakala soni ŵamasiku aganoŵa yikutujiganya chichi m’weji? Ŵandu ŵakulupichika ŵatwasasileŵa nganaleka kukamula masengo gawo, mwamti Yehofa ŵapele upile ligongo lya kuwusimana mtima kwawo. Kwende wosopewe tuŵeje ŵakupilila soni ŵakuwusimana mtima mpela ŵandu ŵeleŵa ‘kuti tupochele yele Mlungu ŵatite tachipeleka.’—Aheb. 6:10-12.

15. Ana chikulupi chikusatukamuchisya chamtuli pamasengo getu gakulalichila?

¹⁵ Chikulupi chikusatukamuchisya kuti tugakulupilileje mnope Maloŵe ga Mlungu, yayikusatutendekasya kuti twalalichileje ŵandu ŵajinji. Tukusakulupililagasoni kuti yaŵasasile Mlungu m’Maloŵe gakwe, yichikwanilichikwa. (Sal. 119:42; Yes. 40:8) Masiku agano, tuyiweni yindu yine yaŵasasile Mlungu yili mkukwanilichikwa. Twawenisoni ŵandu ali mkuchenga umi wawo patandite kukamulichisya masengo yindu yalijiganyisye m’Baibulo. Kuganichisya yeleyi, kukusatutendekasya kuŵa ŵakusachilila kulalichila ngani syambonesi kwa mundu jwalijose.

16. Ana lilemba lya Salimo 46:1-3, likusalosya chamtuli kuti kukulupilila mnope Yehofa soni Yesu kukusatukamuchisya kukamula masengo gakulalichila?

¹⁶ Chikulupi chikusatukamuchisyasoni kuti tumkulupilileje mnope Yehofa jwali msyene utenga watukusalalichila soni Yesu jwaŵamsagwile kuti  aŵe Mwenye mu Uchimwene wakwe. (Yoh.14:1) Atamose tuli tusimene ni yakusawusya yamtuli pamasengo getu, Yehofa chachitukamuchisya soni kutupa machili. (Aŵalanje Salimo 46:1-3.) Konjechesya pelepa tuli ŵakusimichisya kuti Yesu ni jwakulongolela masengo gakulalichila. Akutenda yeleyi, pakamulichisya masengo machili soni udindo waŵapochele kutyochela kwa Yehofa.—Mat. 28:18-20.

17. Apeleche chisyasyo chachikulosya ligongo lyakwe tukusosekwa kupitilisya kukamula masengo gakulalichila.

¹⁷ Chikulupi mpaka chitukamuchisye kumanyilila kuti Yehofa chachitupa upile m’litala lyakuti m’weji nganitujembecheyaga. (Jwak. 11:6) Mwachisyasyo, lisiku lililyose ŵandu ŵajinji akusapita pamalo patukusaŵika mashelefu getu gakulalichilila. Ana litala lyakulalichilila lyeleli liŵele lyakamuchisya? Kwabasi. Kabuku ka Undumetume wa Uchimwene ka Nofemba 2014, kasasile ngani jwakwamba jwakulijiganya jwine jwa ku yunivesite jwaŵasakaga kulemba ngani jakwayana ni Mboni sya Yehofa. Jwalakwe jwalepele kujisimana Nyumba jetu ja Uchimwene. Nambo ŵajiweni shelefu jatukusaŵika mabuku ku yunivesite peko, mwamti jwapatile yindu yaŵasakaga kuyikamulichisya masengo. Pali papite ndaŵi jwalakwe ŵabatisidwe, mwamti apano ali mpayiniya jwakutamilichika. Yisyasyo mpela yeleyi, yikusatulimbikasya kuti tukaleka kulalichila. Soni yikusatukamuchisya kumanyilila kuti pana ŵandu ŵane ŵajinji ŵakusaka kupikanila utenga wa Uchimwene.

18. Ana mpaka tuŵe ŵakusimichisya chamtuli kuti masengo gakulalichila gachimala pandaŵi jachachisaka Yehofa?

¹⁸ Tuli ŵakusimichisya kuti masengo gakulalichila gachimala pandaŵi jakwe. Aganichisye yayatendekwe m’masiku ga Nowa. Pandaŵiji, Yehofa jwalosisye kuti ali jwakusunga ndaŵi. Yehofa jwaŵisile ndaŵi jakuti Chigumula chitande, kuli kusigele yaka 120. Kaneko Yehofa ŵamsalile Nowa kuti atande kutaŵa chombo. Nowa jwakamwile masengo gakutaŵa chombochi kwa yaka 40 kapena 50. Atamose kuti ŵandu nganampikanilaga, nambope jwalakwe jwapitilisyepe kulalichila utenga wakwakalamusya mpaka pandaŵi jele Yehofa ŵamsalile kuti ajinjisye yinyama m’chombo. Kaneko, pandaŵi jakuŵajilwa Yehofa “ŵawugele mlango wa chombocho.”—Gen. 6:3; 7:1, 2, 16.

19. Ana mpaka tujembecheyeje chichi naga tukupitilisyape kulipeleka pamasengo gakulalichila?

¹⁹ Pachangakaŵapa Yehofa chatusalile kuti tuleche kulalichila ngani syambone sya Uchimwene. Jwalakwe chachijonanga chilambo cha Satanachi ni kuyikasya chilambo chele chichigumbala ni ŵandu ŵakusampikanila. Patukwembecheya ndaŵi jelejo, kwende wosope tutendeje yampaka tukombole kuti tumsyasyeje Nowa, Habakuku soni ŵandu ŵane ŵaŵalipeleche pakukamula masengo gakulalichila. Konjechesya pelepa, ngatukusosekwa kukunda chilichose kutusokonasya. Tuŵeje ŵakuwusimana mtima soni tupitilisye kumkulupilila Yehofa.