1, 2. (a) Ana Maloŵe ga pa Yesaya 60:22 gakwanilicikwa catuli m’moŵa gambesi gano? (b) Ana cici cacikusosekwa mnope masiku agano mu likuga lya Yehofa lya pacilambo capasi?

“JWAMWANA caciŵa ŵandu 1,000, soni jwamnandi caciŵa mtundu wamacili.” (Yes. 60:22) Maloŵe gelega gakwanilicikwa m’moŵa gambesi gano. Ligongo cici tukusala m’yoyo? Mu caka ca undumetume ca 2015, ŵandu ŵakwana 8,220,105, ŵaŵele ali mkulalicila ya Ucimwene pa cilambo cosope. Mbali jakumalisya ja lilembali, jikwakwaya Aklistu wosope pajikapajika ligongo Atati ŵetu ŵakwinani ŵaŵecete kuti, “Une, Yehofa, cinjijanguyisya yeleyi pandaŵi jakwe.” Mpela ŵandu ŵakwesile galimoto ni akujiwona kuti jikuwutuka mnope, m’wejisoni tukugawona mwagakuwutucila mnope masengo gakupanganya ŵakulijiganya. Ana tukutenda yatuli patukugawona masengoga pagakuwutuka mnope? Ana tukutenda yiliyose yampaka tukombole kuti tulalicileje soni kwiganya ya Ucimwene mwamtawu? Abale ni alongo ŵajinji akutenda yeleyi mwakuŵa apayiniya ŵakamucisya kapena ŵakutamilicika. Ana ngatukusasangalala patukwawona ŵane ali mkusamila kumalo kwakukusosecela ŵakulalicila ŵajinji kapena kutenda maundumetume gane?

² Pa ndaŵi jakulandanajo, caka cilicose mipingo jasambano jakwana 2,000 jikusapagwa. M’yoyo pakusosecela ŵamasengo ŵane ŵajinji. Naga mpingo wasambano wuliwose mpaka usosekwele acakulungwa  5 kuti atumicileje, nikuti mpaka pasosekwe ŵakutumicila ŵakamucisya 10,000 kuti aŵajilwe kuŵa ŵakulolela. Yeleyi yikulosya kuti pakusosekwa abale ŵajinji ŵakuti aŵajilwe kuti atumicileje mpela ŵakutumicila ŵakamucisya. Konjecesya pelepa, cinga tuli m’bale kapena mlongo wosopewe tukwete “yakutenda yejinji m’masengo ga Ambuje.”—1 Akoli. 15:58.

3, 4. Ana wawojo pajika, akusakuwona kwawula pasogolo mwausimu kuŵa kwakusosekwa?

³ Aŵalanje 1 Timoteo 3:1. Maloŵe Gacigiliki gaŵagagopolele kuti ‘kulingalinga’ gakusagopolela kunyanyamilila kuti wuyicile cinecakwe cacili pakutalicila. Ndumetume Paulo ŵakamulicisye masengo maloŵega pakusaka kulosya kuti mundu akusasosekwa mtawu kuti ajawule pasogolo mwausimu. Tuwanicisye kuti m’bale akusacilila kuti aŵajilwe kuŵa jwakutumicila jwakamucisya mumpingo. Jwalakwe akuyiwona kuti akusosekwa mtawu kuti akole ndamo syaciklistu. Paŵajilwe kuŵa jwakutumicila jwakamucisya, mkupita kwa ndaŵi akusacilila ali aŵajilwe kuŵa jwakulolela. Pa ukumu wuliwose jwalakwe akutenda mtawu kuti akwanilisye yakumkamucisya kuŵajilwa pa ukumuwo.

⁴ Mwakulandanamo, abale ni alongo ŵakusacilila kuŵa apayiniya, kutumicila pa Beteli, kapena kamucisya pa masengo gakutaŵa Nyumba sya Ucimwene akusosekwa kuŵa ŵamtawu kuti akwanilisye yakulinga yeleyi. Kwende tulole mwele Maloŵe ga Mlungu gakusatulimbikasya kuti tujawuleje pasogolo mwausimu.

5. Ana ŵacinyamata mpaka akamulicisye masengo wuli macili gawo pa yindu ya Ucimwene?

⁵ Ŵacinyamata mpaka atende yejinji mu undumetume wa Yehofa ligongo akwete macili. (Aŵalanje Miyambo 20:29.) Ŵacinyamata ŵajinji ŵakusatumicila pa Beteli akusakamula masengo gakupulinta Mabaibulo soni mabuku. Abale ni alongo ŵane ŵacinyamata akusakamula masengo gakutaŵa Nyumba sya Ucimwene soni kusilinganya pasijonasice. Ŵacinyamata ŵajinji akusakamucisya nawo pa masengo gakwakamucisya ŵandu naga patendekwe ngosi syacipago. Soni ŵane mwa ŵacinyamata ŵali apayiniya akusalijiganya ciŵeceto cine kapena kusamila ku malo kwakukusosecela ŵakulalicila ŵajinji.

6-8. (a) Ana Aaron ŵacenjile catuli muŵakuwonelaga kumtumicila Yehofa, nambi yakuyicisya yakwe yaliji yatuli? (b) Ana mpaka ‘tumpasye Yehofa ni kulola kuti ali jwambone’ catuli?

⁶ Mwangakayicila, wawojo asakuwona kusosekwa kwa kumtumicila Yehofa ni mtima wosope. Mwinemwakwe akusalipikana mpela mwele m’bale jwine lina lyakwe Aaron ŵalipikanilaga. Atamose kuti ŵaleledwe m’liŵasa lyaciklistu, jwalakwe ŵasasile kuti, “Nganisangalalaga ni kwawula ku misongano soni kukulalicila.” Ŵasakaga kumtumicila Mlungu mwakusangalala nambo ŵasimongaga kuti ŵaliji jwangasangalala. Ana jwalakwe ŵatesile cici?

⁷ Aaron ŵatandite kutenda yindu yausimu mwakutamilicika yayapwaticepo kuŵalanga Baibulo, kosecela misongano, nambosoni kwanga pamisongano. Jwalakwe ŵatanditesoni kupopela mwakutamilicika. Pele cinonyelo cakwe pa Yehofa cakusile, ŵatandite kwawula pasogolo mwausimu. Kutandila ndaŵi jelejo, Aaron ŵatendaga upayiniya, ŵaliji mlikuga lya abale ŵakwakamucisya ŵandu naga patendekwe ngosi syacipago, soni ŵapite kukutumicila ku cilambo cine. Apanopano Aaron akutumicila pa Beteli nambosoni ali jwamkulungwa jwa mumpingo. Ana apano jwalakweju akupikana wuli mumtima? Jwalakwe ŵatite, “‘Nampasisye Yehofa ni nam’weni kuti ali jwambone.’ Ligongo lya majali gelega ngusinalipikana mpela kuti ngwete najo ngongole, soni yeleyi yikusalimbikasya kuti ndendeje yejinji m’masengo ga Ambuje, gele gagakumba majali gejinji.”

⁸ Jwamalumbo ŵajimbile kuti: “Wosope ŵakusamsosasosa Yehofa ŵangasoŵa kandu kambone.” (Aŵalanje Salimo 34:8-10.) Yisyene, Yehofa ngakomboleka kuleka kwanonyela ŵakutumicila ŵakwe ŵakulipeleka kwa jwalakwe. Mundu jwalijose  pajika ‘akusampasya Yehofa ni kulola kuti ali jwambone’ pakutenda yosope yampaka akombole pakumtumicila. Patukumlambila Mlungu ni mtima wosope, tukusaŵa ŵakusangalala mnope.

9, 10. Ligongo cici kola “mtima wakwembeceya” kuli kwakusosekwa mnope?

⁹ Patukusacilila kuti tukwanilisye yakulinga yetu, tukusosekwa kola “mtima wakwembeceya.” (Mika 7:7) Ndaŵi syosope Yehofa akusiŵakamucisya ŵakutumicila ŵakwe ŵakulupicika, atamose kuti jwalakwe mpaka akunde kuti papite kaje ndaŵi yakulinga yawo mkaniyikwanilicikwe kapena kuti yindu yine yicenje pa umi wawo. Mpaka tulijiganye yeleyi kutyocela kwa Abulahamu. Yehofa ŵamlagucisye Abulahamu kuti cacimpa mwanace. Nambo Abulahamu ŵasosekwaga kola cikulupi soni kuwusimana mtima. (Ahe. 6:12-15) Atamose kuti Abulahamu ŵajembeceye kwa yaka yejinji kuti Isaki apagwe, nambo jwalakwe nganajasa mtima, soni Yehofa nganamkamulisya liganga.—Gen. 15:3, 4; 21:5.

¹⁰ Kusala yisyene, kwembeceya kuli kwakusawusya. (Miy. 13:12) Ganicisya mnope mwayiŵelele yindu pa umi wetu, mpaka kututengusye mnope. M’malo mwakwe, tukusosekwa kamulicisya masengo ndaŵi jetu pa kongolela ndamo syetu syampaka situkamucisye kwawula pasogolo mwausimu. Kwende tutagulilane matala gatatu gampaka tutendele yeleyi.

11. Ana ndamo syapi syausimu syampaka tukusye, soni ligongo cici ndamo syelesi sili syakusosekwa mnope?

¹¹ Kusya ndamo syausimu. Mwakuŵalanga Maloŵe ga Mlungu soni ganicisya mwakusokoka yatuŵalasileyo, mpaka tukusye lunda, umanyilisi, kusagula yindu mwakuŵajilwa soni ganisya cenene. Ndamo syelesi sili syakusosekwa mnope kwa wosope ŵakwete ukumu mumpingo. (Miy. 1:1-4; Tito 1:7-9) Patukuŵalanga mabuku gakusala ya m’Baibulo, mpaka tumanyilile mwakusaganicisya Mlungu pa ngani jilijose. Yeleyi mpaka yitukamucisye patusimene ni yakuti tusagule mpela yakusangalasya, kakamulicisye masengo ka mbiya, kawale ni kalisalalisye soni mwampaka tutendele yindu ni ŵane.  Kamulicisya masengo yatukusalijiganya m’Baibulo, mpaka yitukamucisye kusagula yindu yampaka yimcimbicisye Yehofa.

12. Ana jwalijose mumpingo mpaka alosye wuli kuti ali jwakulupicika?

¹² Kuŵa ŵakulupicika. Cinga tuli m’bale kapena mlongo, tukusosekwa kutenda yiliyose yampaka tukombole kuti tusamalile mbali jilijose jatupele. Mpela jwakulolela, Nehemiya ŵasagwile acalume pasikati pa ŵandu ŵa Mlungu ŵaŵasosekwaga kusamalila maukumu gane. Ana jwalakwe ŵasagwile ŵandu ŵatuli? Nehemiya ŵasagwile acalume ŵakogopa Mlungu, ŵakulupicika soni ŵakuti ŵane mpaka ŵajegamile. (Neh. 7:2; 13:12, 13) Masiku aganosoni, “cakusosekwa kwa jwakulolela cili kuŵa jwakulupicika.” (1 Akoli. 4:2) M’yoyo, masengo galigose gambone gatukusatenda gakusawonecela kwa ŵandu.—Aŵalanje 1 Timoteo 5:25.

13. Naga ŵane akwatendela yindu yangali cilungamo, ana mpaka ajigalile wuli cisyasyo sya Yosefe?

¹³ Kwegamila kwa Yehofa. Ana mpaka atende wuli naga ŵane akwatendela yindu mwangali cilungamo? Mwine mpaka amsalile mundujo mwacitema mwakupikanila mumtima mwawo. Nambo naga ndaŵi sine akulinga kuliŵicila kunyuma mpaka agambe kutendekasya kuti yakusawusyayo yikule. Mpaka tulijiganye yejinji kutyocela ku cisyasyo ca Yosefe. Acakulugwe ŵamtendele yangali cilungamo, nambo jwalakwe nganasunga cakulukosi. Kaneko, ŵandu ŵane ŵamlambucisye Yosefe yindu yakuti nganatenda ni ŵam’ŵisile mu ukayidi. Nambo jwalakwe ŵajegamile Yehofa soni ŵamanyililaga ya majali gaŵasasile Yehofa. Yeleyi yamtendekasisye kuti ajendelecele kuŵa jwakulupicika. (Sal. 105:19) Payagambile kumala yakulingwa yaŵasimanaga nayo, Yehofa ŵam’weni kuti jwalakwe ŵaliji jwakuŵajilwa kupocela ukumu wapajika. (Gen. 41:37-44; 45:4-8) Naga ŵane akwatendela yangali cilungamo, apopeleje kwa Yehofa kuti ŵape lunda. Jwalakwe cacakamucisya mwakwapa mtima wakulitimalika yampaka yakamucisye kuti atende yindu soni kuŵecetana nawo mwacinonyelo.—Aŵalanje 1 Petulo 5:10.

14, 15. (a) Ligongo cici tukusosekwa ‘kusamala’ ni mwatukusalalicilila? (b) Ana mpaka atende wuli kuti alalicileje mwakamulana ni mwayiŵelele yindu pamalopo? (Alole ciwulili cacili kundanda kwa nganiji soni libokosi lyakuti “Ana ali Ŵakusacilila Kulinga Litala Line Lyakulalicilila?”)

¹⁴ Paulo ŵamsalile Timoteyo kuti, ‘Mjendelecele kuŵa jwakulipeleka pakuŵalanga pameso pa ŵandu, pakulimbikasya, soni pakwiganya. Msamale ni yamkusatendaga soni yamkusajiganya.’ (1 Tim. 4:13, 16) Timoteyo ŵaliji kala jwakumanyilila kulalicila. Nambo kuti undumetume wakwe uŵe wakamula mtima, ŵasosekwaga ‘kusamala’ ni yaŵajiganyaga. Jwalakwe ŵamanyililaga kuti yindu pa umi wa ŵandu yikusacenga, m’yoyo nganasosekwaga kwawona ŵandu kuti capoceleje utenga wakwe mwa ndaŵi syosope. Kuti ajendelecele kwalalicila mwakamula mtima ŵasosekwaga kucenga kalalicile kakwe kuti kakamulane ni ndamo ja ŵanduwo. M’wejisoni mpela ŵakulalicila ya Ucimwene, tukusosekwa kutenda yakulandanayo.

¹⁵ M’mikuli jine, patukulalicila ku nyumba ni nyumba ŵajinji ngakusasimanikwa pamlango. M’mikuli jinesoni yikusaŵa yakusawusya kwalalicila ŵandu ŵakusatama m’nyumba sine syanganituŵa tukombwele kwinjilako ligongo lyakuti sili ku lutenje. Naga yili m’yoyo ni mu mkuli mwawo, ana mpaka apate litala line lyakuti ŵayicileje ŵanduwo?

16. Ana kulalicila kwa pelanga kulosisye wuli kuti kuli kwambone mnope?

¹⁶ Abale ni alongo ŵajinji ayiweni kuti kulalicila pelanguka, lili litala lyambone mnope lyakuwandicisya ngani syambone soni apatile yakuyicisya yambone. Jemanjaji akusaŵecetana ni ŵandu m’malo gakwelela sitima ni mabasi, m’misika soni m’malo gakusanonyela ŵandu kupumulila ni malo gane gakusimanikwa ŵandu ŵajinji. Mpaka atande kutagulilana ni mundu pakamulicisya masengo ngani jajigambile kopoka kwene mu nyusipepala, kapena mwakusala cinecakwe cambone cakusatenda ŵanace ŵakwe soni mpaka am’wusye  mwagakwendela masengo gakwe. Naga mundujo akuwoneka kuti akusangalala ni kutagulilanako, mpaka amsalile songa ja m’Baibulo ni kwembeceya kuti ajanje. Kwanga kwa mundujo mpaka kwatendekasye kuti ajendelecele kutagulilana yejinji ya m’Baibulo.

17, 18. (a) Ana cici campaka cakamucisye kuti alalicileje pelanga mwakulimba mtima? (b) Ligongo cici yili yakusosekwa kulosya msimu wakumlumba Yehofa patukulalicila mpela muŵatendele Daudi?

¹⁷ Naga akusayiwona kuŵa yakusawusya kutanda kuŵecetana ni ŵandu pelanguka, akajasa mtima. Yeleyi ni yayamtendecelesoni mpayiniya jwine jwa mu msinda wa New York, lina lyakwe Eddie. Jwalakwe ŵatendaga woga kutanda kuŵecetana ni ŵandu pelanguka. Mkupita kwa ndaŵi, jwalakwe ŵatandite kulimba mtima. Ana cici cacamkamucisye? Jwalakwe ŵasasile kuti, “Patwatendaga kulambila kwa peŵasa, ŵamkwangu ni une twawungunyaga kuti tupate kwanga kwa yiwusyo soni nganisyo syakusakola ŵandu ŵajinji. Twawusyagasoni abale ni alongo acimjetu kuti atusalile yine yampaka tutende.” Apano Eddie akusasangalala kulalicila pelanguka.

¹⁸ Pakongolela kalalicile kawo soni kuŵa ŵakulimba mtima pakulalicila ngani syambone kwa ŵandu, kwawula kwawo pasogolo kuciwonecela kwa wosope. (Aŵalanje 1 Timoteo 4:15.) Konjecesya pelapa, cacalumba Atati ŵetu ŵakwinani mpela mwaŵatendele Daudi, jwaŵajimbile kuti, ‘Cinjimlumba Yehofa ndaŵi syosope, cinjimlumba ni pakamwa pangu mwangalecesya. Cinjipoka mwa Yehofa, ŵakulinandiya cacipikana ni cacisangalala.’ (Sal. 34:1, 2) Yakuyicisya ya kulalicila kwetu yiciŵa yakuti, ŵakulinandiya cacitanda kulambila nawe mu usyesyene.

19. Ligongo cici jwakutumicila jwakulupicika jwa Yehofa mpaka aŵe jwakusangalala, atamose pali mu ndamo jakusawusya?

¹⁹ Daudi ŵajimbilesoni kuti, ‘Masengo gawo gosope gacalumba, Wawo Yehofa, ŵakulupicika ŵawo cacalumbasoni. Cacisala ya ukulungwa wa ucimwene wawo soni caciŵeceta ya macili gawo. Cacamanyisya ŵandu ya masengo gawo ga macili soni kukula kwa ucimbicimbi wa ucimwene wawo.’ (Sal. 145:10-12) Maloŵe gelega gakulosya kuti ŵakulupicika wosope ŵa Yehofa akusasacilila kwamanyisya ŵane ya jwalakwe. Nambi wuli naga akulepela kutenda yejinji mu undumetume ligongo lya kulwala kapena ucekulu? Akusosekwa kumbucila kuti akusamlumba Yehofa ndaŵi syosope pakulalicila kwa ŵakusasamalila ŵakulwala soni kwa ŵane. Naga ali mu ukayidi ligongo lya cikulupi cawo, mpaka akombolece kwasalila ŵane ya usyesyene papatile lipesa. Yeleyi yikusatendekasya mtima wa Yehofa kusangalala. (Miy. 27:11) Yehofa mpaka asangalalesoni naga akumtumicila jwalakwe atamose kuti ŵane ŵa mwiŵasa mwawo ngakusamtumicila. (1 Pet. 3:1-4) Atamose pasimene ni yakusawusya mpaka akombole kumlumba Yehofa ni kwendelecela kwawula pasogolo mwausimu.

20, 21. Naga akwete yakutenda yejinji mu likuga lya Yehofa, ana ŵane mpaka yakamucisye catuli

²⁰ Naga akwendelecela kwawula pasogolo mwausimu, Yehofa cacapa majali. Mpaka akombole kwakamucisya ŵandu ŵajinji kumanyilila yalagucisye Mlungu msogolo muno naga akucenga ndandanda jawo soni ndamo syawo. Kwawula kwawo pasogolo soni kulipeleka kwawo mpaka kwakamucisye ŵakulupilila acimjawo. Ligongo lyakamula masengo mwamtawu mumpingo, ŵakulambila acimjawo mpaka ŵanonyeleje, kwayamicila soni kwakamucisya.

²¹ Mwangajigalila yaka yatuŵele tuli mkutumicila Yehofa, wosopewe mpaka tujendelecele kwawula pasogolo mwausimu. Nambo, ana Aklistu ŵakomangale mwausimu, mpaka ŵakamucisye catuli ŵacasambano kwawula pasogolo? Ngani jakuyicisya tucitagulilana mwampaka twakamucisye ŵacasambanoŵa kuti ajawule pasogolo mwausimu.