NGANI JAKULIJIGANYA 39
NYIMBO NA. 125 “Ŵakusangalala Ali Ŵandu Ŵachanasa!”
Kupeleka Kuchakamuchisya Kuŵa Ŵakusangalala
“Kupeleka kukusamtendekasya mundu kuŵa jwakusangalala mnope kulekangana ni kupochela.”—MASE. 20:35.
CHAKULINGA CHA NGANIJI
Chitukambilane ya chisangalalo chatukusapata patukuŵa ŵakoloŵa magasa mwakwakamuchisya ŵane m’matala gejinji.
1-2. Ana yaŵatite Yehofa pakutupanganya kuti tusangalaleje mnope patupeleche kulekangana ni patupochele yikusatukamuchisya chamti uli?
YEHOFA jwapanganyisye ŵandu m’litala lyakuti asangalaleje mnope pakupeleka kulekangana ni pakupochela. (Mase. 20:35) Ana yeleyi yikugopolela kuti ngatukusasangalalaga patukupochela yindu kutyochela kwa ŵane? Iyayi. Tukumanyilila kuti ndaŵi syosope tukusasangalalaga patupochele chindu kutyochela kwa mundu jwine. Nambope, tukusasangalala mnope patukupeleka yindu kwa ŵandu ŵane. Mwamti tukusayamichila mnope kuti Yehofa ŵatupanganyisye m’litala lyeleli. Ligongo chichi tukuŵecheta yeleyi?
2 Pakuŵapo Yehofa ŵatupanganyisye m’litala lyeleli yikusatukamuchisya kuti tujonjechesye chisangalalo chatukwete kala. Mwamti mpaka tuŵe ŵakusangalala mnope patukuganichisya matala gane gakupelechela yindu kwa ŵandu. Ana nganiyiŵa yakusangalasya mnope kuti Yehofa ŵatupanganyisye m’litalali?—Sal. 139:14.
3. Ligongo chichi Baibulo jikusasala kuti Yehofa ali “Mlungu jwakusangalala”?
3 Malemba gakusatusimichisya kuti kupeleka kukusatutendekasya kuŵa ŵakusangalala. Myoyo, ngatukusasimonga kuti Baibulo jikusasala kuti Yehofa ali “Mlungu jwakusangalala.” (1 Tim. 1:11) Jwalakwe ni juŵatandite kupeleka soni pangali mundu julijose juŵapeleche yejinji kumpunda Yehofa. Mwamti ligongo lya Yehofa, “tukwete umi, tukusajenda soni tupali.” (Mase. 17:28) Kusala yisyene, “mtuka uliwose wambone soni wamlama ukusatyochela” kwa Yehofa.—Yak. 1:17.
4. Ana chichi champaka chitukamuchisye kuti tusangalaleje mnope?
4 Wosopewe mpaka tusache kupata chisangalalo chekulungwa mnope chachikusayika ligongo lyakupeleka. Nambotu mpaka tuchipate chisangalalochi naga tukusyasya koloŵa magasa kwa Yehofa. (Aef. 5:1) Myoyo, munganiji chitukambilane yisyasyo yakwe yambone pangani jakupeleka soni chitulole yampaka tutende naga ŵandu ŵane ngakulosya kuyamichila yindu yatwapele. Mwamti yeleyi chiyitukamuchisye kuti tusangalaleje mnope patukupeleka.
AMSYASYEJE YEHOFA PANGANI JAKOLOŴA MAGASA
5. Ana ni yindu yapi yatukusasosechela yakusatupaga Yehofa?
5 Ana Yehofa akusalosya kuti ali jwakoloŵa magasa m’matala gapi? Kwende tukambilane gane mwa matalaga. Yehofa akusatupaga yindu yakusosechela ya paumi wetu. Yehofa nganaŵa atutendekasisye wosopewe kola umi wambone mnope. Nambope, jwalakwe akusalolechesya kuti ŵajinji mwa m’weji tukole yindu yakusosechela paumi wetu. Mwachisyasyo, jwalakwe akusalolechesya kuti tupatile yakulya, yakuwala soni malo gakutama. (Sal. 4:8; Mat. 6:31-33; 1 Tim. 6:6-8) Nambotu Yehofa jwangagamba kutupa yindu yeleyi ligongo lyakuti uli udindo wakwe. Sano ligongo chichi jwalakwe akusatendaga yeleyi?
6. Ana tukulijiganya chichi pa Mateyu 6:25, 26?
6 Yehofa akusatupaga yindu yatukusasosechela paumi wetu ligongo lyakuti akusatunonyela. Aganichisye maloŵe gagakusasimanikwa pa Mateyu 6:25, 26. (Aŵalanje.) Yesu jwakamulichisye masengo yindu yachilengedwe pakusaka kutujiganya. Pakwamba ya yijuni Yesu jwasasile kuti “yangapanda mbeju kapena kugowola kapena kututila mu ngokwe.” Nambo kaneko jwalakwe jwasasile kuti, “Atati ŵenu ŵakwinani akusayilisya.” Kaneko Yesu jwawusisye kuti, “Ana jemanja nganiŵa ŵakusosekwa mnope kupunda yijuni?” Pelepatu mfundo ja Yesu jaliji jakuti Yehofa akusiŵawona ŵakutumichila ŵakwe kuŵa ŵakusosekwa mnope kupunda yinyama? Naga Yehofa akusayisamalila yinyama mpaka tuŵesoni ŵakusimichisya kuti chachitusamalila. Mpela mwakusatendela mtati jwambone pakulisamalila liŵasa lyakwe, nombe Yehofa akusalisamalila liŵasa lyakwe ligongo lya chinonyelo.—Sal. 145:16; Mat. 6:32.
7. Ana mpaka tusyasye koloŵa magasa kwa Yehofa m’litala limo lyapi? (Alolesoni chiwulili.)
7 Mpela mwakusatendela Yehofa, m’wejisoni mpaka twape yindu ŵandu ligongo lyakwanonyela. Mwachisyasyo, ana wawojo akummanyilila m’bale kapena mlongo jwakusosechela yakulya kapena yakuwala? Yehofa mpaka ŵakamulichisye masengo wawojo pakusaka kumkamuchisya mundujo pa yindu yakusosechelayo. Ŵakutumichila ŵa Yehofa akusiŵakamuchisyasoni achimjawo pasimene ni yindu yakusawusya. Mwachisyasyo pandaŵi ja mlili wa COVID-19 abale ni alongo ŵapelekaga yakulya, yakuwala nambosoni yindu yine kwa ŵandu ŵaŵasosechelaga. Abale ni alongo ŵajinji akusapelekasoni mbiya mwakoloŵa magasa syakamuchisya pa masengo ga pachilambo chosope. Mbiya syakusapelekasi sikusakamuchisya pa masengo gakwakamuchisya ŵandu ŵasimene ni yakusawusya pachilambo chosope. Abale ni alongo ŵakoloŵa magasaŵa akusapikanila maloŵe gagakusasimanikwa pa Ahebeli 13:16 papakusati, “Mkaliŵalila kutenda yambone soni kugaŵana ni ŵane yindu yamkwete, pakuŵa Mlungu akusasangalala ni mbopesi syelesi.”
Wosopewe mpaka tukombole kusyasya koloŵa magasa kwa Yehofa (Alole ndime 7)
8. Ana machili ga Yehofa gakusatukamuchisya m’matala gapi? (Afilipi 2:13)
8 Yehofa akusatupa machili. Jwalakwe akusasangalala pakupeleka machili kwa ŵakutumichila ŵakwe ŵakulupichika. (Aŵalanje Afilipi 2:13.) Ana wawojo pakwete papopesile kwa Yehofa kuti ŵakamuchisye kupilila chakulingwa? Kombolekasoni pakwete papopesile kwa Yehofa kuti ŵape machili gakuti akombole kutenda yindu yalisiku lililyose. Yehofa paŵajanjile lipopelo lyawo mwakwapa machili komboleka ŵakamulene ni maloŵe ga ndumetume Paulo, juŵalembile kuti, “Mu yindu yosope ngusapata machili kutyochela kwa jwele jwakusambaga machilijo.”—Afil. 4:13.
9. Ana mpaka tumsyasye chamti uli Yehofa pakamulichisya masengo machili getu pakwakamuchisya ŵane? (Alolesoni chiwulili.)
9 Atamose kuti tuli ŵandu ŵangali umlama mpaka tukombole kumsyasya Yehofa mwakuŵa ŵakoloŵa magasa pakamulichisya masengo machili getu. Yili yisyene kuti m’weji nganituŵa tukombwele kwapa machili ŵane. Nambope mpaka tukombole kukamulichisya masengo machili getu pakwakamuchisya jemanjajo. Mwachisyasyo, abale ni alongo ŵachikulile kapena ŵakulwala mpaka twakamuchisye masengo ga pamlango kapena kuja kwasumila yindu. Nambosoni naga mpaka tukombole mpaka tukamuchisye nawo pakuswejesya soni kulinganya Nyumba sya Uchimwene. Mwamti patukukamulichisya masengo machili getu mmatala gelega yichakamuchisya ŵandu ŵakusamtumichila Yehofa.
Mpaka tukamulichisye masengo machili getu pakwakamuchisya ŵane (Alole ndime 9)
10. Ana mpaka twakamuchisye chamti uli ŵane kupitila mu yakuŵecheta yetu?
10 Tukaliŵalilagasoni kuti maloŵe getu mpaka galimbikasye ŵane. Ana pana mundu jwalijose jwakummanyilila jwampaka amlimbikasye mwakumyamichila? Ana akummanyilila mundu jwalijose jwakusosekwa kumlimbikasya? Naga yili myoyo ana mpaka atende yakuti amanyilile kuti wawojo akusamnonyela? Mpaka atende yeleyi mwakumjendela mundujo kumjimbila foni kapena kumlembela utenga. Ngakusosekwa kudandawula mnope pakwamba yampaka aŵechete pakumlimbikasya mundujo. Mwamti maloŵe gamnono gakutyochela pasi pamtima gampaka amsalile Mklistu mjawo, mpaka gamkamuchisye jwalakwejo kupitilisya kuŵa jakulupichika soni kukola chembecheyo.—Mis. 12:25; Aef. 4:29.
11. Ana Yehofa akusatenda uli ni lunda lwakwe?
11 Yehofa akusapeleka lunda. Yakobo jwalembile kuti, “Naga jwine lunda lukumpelembela, amŵendeje Mlungu, mwamti chachimpa, pakuŵa Mlungujo akusapeleka mwakoloŵa makono kwa wosope, soni akusapeleka kwa mundu mwangampatila magongo.” (Yak. 1:5; maloŵe gamwiŵanda.) Mpela mwaliŵechetele lilembali, Yehofa jwangatujimaga lunda lwakwe. Yakobo jwasasilesoni kuti Yehofa pakupeleka lunda kwa mundu akusatenda yeleyo “mwangamnyosya” mundujo kapena “kumpatila magongo.” Jwalakwe jwangasakasoni kuti tudandawuleje patumŵendile lunda. Mwamti akusasaka kuti tumŵendeje lunda.—Mis. 2:1-6.
12. Ana ni yindu yapi yatukusamanyilila yampaka twajiganye ŵane?
12 Nambi uli pakwamba ya m’weji? Ana mpaka tukombole kumsyasya Yehofa mwagaŵana lunda lwetu ni ŵane? (Sal. 32:8) Ŵakutumichila ŵa Yehofa akusakola upile wagaŵana ni ŵane yindu yakusamanyilila. Mwachisyasyo, tukusitwajiganya ŵandu ŵatandite kumtumichila Yehofa patujesile nawo mu utumiki. Nombe achakulungwa wa mumpingo akusiŵajiganyaga ŵakutumichila ŵakamuchisya soni abale ŵabatisidwe kusamalila ma utumiki ga mumpingo. Nambosoni abale ni alongo ŵakusamanyilila chenene masengo ga yakutaŵataŵa akusiŵajiganya ŵane kuti nombe nawo agamanyilile masengogo.
13. Ana mpaka tumsyasye chamti uli Yehofa patukwajiganya ŵane?
13 Ŵandu ŵakwete udindo wakwajiganya achimjawo mpaka atende chenene kumsyasya Yehofa. Tukumbuchileje kuti Yehofa akusapeleka lunda lwakwe mwakoloŵa magasa. Myoyo, m’wejisoni tukusasosekwa kutenda yindu mwakoloŵa magasa patukwajiganya ŵane. Mwamti ngatukusasosekwa kusisa yindu yine pakogopa kuti mundu jwatukumjiganyajo mpaka ajigale udindo wetu. Konjechesya pelepa, tukusasosekwa kuŵambala nganisyo syakuti ‘Pangali mundu juŵanjiganyisye, jweleju chalijiganye jika.’ Ŵakutumichila ŵa Yehofa akusasosekwa kuŵambala kaganisye keleka. Mmalomwakwe tukusasangalala mnope patukwajiganya ŵane yindu yosope yatukusamanyilila. (1 Ates. 2:8) Patukutenda yeleyi tukusamanyilila kuti pambesi pakwe nombe jemanjajo “chachiŵa ŵakuŵajilwa chenene kwajiganya ŵane.” (2 Tim. 2:1, 2) Mwamti naga wosopewe tukuŵa ŵakoloŵa magasa pakwajiganya ŵane, m’weji pampepe ni ŵandu ŵatwajiganyisyewo tuchiŵa ŵalunda soni ŵakusangalala mnope.
PATUKUYIWONA KUTI ŴANDU ŴANE NGAKUYAMICHILA YATWATENDELE
14. Ana ŵandu ŵajinji akusatenda yamti uli patwatendele yine yakwe?
14 Ndaŵi syejinji abale ni alongo ŵetu akusayamichilaga patwapele kapena kwatendela yine yakwe. Mwamti mpaka atutumichisye utenga wakuyamichila kapena kutulembela mmatala gane. (Akolo. 3:15) Kupikana maloŵe gakuyamichilago kukusatutendekasya kuti tusangalaleje mnope.
15. Ana tukusasosekwa kukumbuchila chichi naga mundu jwine ngakulosya kuyamichila?
15 Nambope ndaŵi sine, ŵandu ŵane nganaŵa ayamichile yindu yatwatendele. Pane mpaka tumalile machili getu soni ndaŵi jetu pakwakamuchisya ŵane nambo nikusimanikwa kuti ngatukupata umboni uliwose wakulosya kuti jemanjajo akuyamichila yatwatendeleyo. Ana mpaka tutende uli kuti tupitilisye kusangalala kapena kuŵambala kutumbila payitendekwe yeleyi? Tukumbuchileje maloŵe gagali pa lilemba lyakulongolela nganiji, Masengo 20:35. Kuti tusangalaleje patumpele mundu yineyakwe yangadalila naga mundujo ayamichile. Mpaka tusagule kuti tupelecheje mwakusangalala atamose yili mkuti ŵane ngakulosya kuyamichila. Ana yeleyi mpaka yikomboleche chamti uli? Kwende tulole matala gakuyichisyaga.
16. Ana chichi champaka chitukamuchisye kuti tasangalaleje patukupeleka?
16 Chakulinga chetu chiŵeje kumsyasya Yehofa. Jwalakwe akusapeleka yindu yambone mnope kwa ŵandu chinga ŵanduwo akulosya kuyamichila kapena iyayi. (Mat. 5:43-48) Yehofa jwasasile kuti naga tukupeleka “mwangajembecheya kupochela kanekakwe,” ‘mboto jetu jichiŵa jekulungwa.’ (Luk. 6:35) Palilembali “kanekakwe” mpaka kaŵesoni maloŵe gakuyamichila. Myoyo, chinga ŵandu akutuyamichila kapena iyayi, Yehofa chachituwuchisya yindu yambone yatwatendele ŵane ligongo ‘lyakupeleka mwakusangalala.’—Mis. 19:17; 2 Akoli. 9:7.
17. Ana pana ligongo lyekulungwa lyapi lyalikusatutendekasya kuti tupelecheje kwa ŵane? (Luka 14:12-14)
17 Chindu chine champaka tutende kuti tumsyasyeje Yehofa patukupeleka kwa ŵane chili kukamulichisya masengo maloŵe gaŵasasile Yesu pa Luka 14:12-14. (Aŵalanje.) Yisyene kuti nganikuŵa kulemwa kwatendela yineyakwe ŵandu ŵatukumanyilila kuti mpaka atuwuchisye. Nambi uli naga tuli tuyikopochele kuti tukwete chisyoŵe chakupeleka yindu kwa ŵane ni chakulinga chakuti nombe jemanjajo chatuwuchisye? Naga yili myoyo, mpaka yiŵe yakamuchisya kutenda yindu yajwasasile Yesu. Mwamti mpaka yiŵe chenene kumtendela yindu yambone mundu jwatukumanyilila kuti nganaŵa akombwele kutuwuchisya. Patutesile yeleyi, tuchiŵa ŵakusangalala ligongo lyakumsyasya Yehofa. Mwamti naga ngatukukola chakulinga chakuti ŵandu ŵatwakamuchisye atuwuchisyeje ndaŵi syosope, tuchisangalalaga patwakamuchisye ŵane, atamose yili mkuti nganalosya kuyamichila.
18. Ana tukusosekwa kulingalinga kuŵambala kutenda chichi soni ligongo chichi?
18 Aŵambaleje kuganisya kuti ŵandu ŵane ali ŵangayamika. (1 Akoli. 13:7) Naga ŵane ngakulosya kuyamichila, tukusosekwa kuliwusya kuti, ‘Ana yisyene kuti jemanjaji ali ŵangayamika, kapena agambile kuliŵalila kulosya kuyamichila?’ Komboleka mpaka paŵe magongo gagatendekasisye jemanjajo kuti akalosya kuyamichila mulitala lyatwajembecheyaga. Ŵane mpaka alepele kulosya kuyamichila ligongo lyakuti akusangalala mnope ni yindu yatwatendele. Mwinesoni ŵane mwajemanjaji mpaka atendeje sooni ŵane paŵakamuchisye ligongo lyakuti munyumamo nombe ŵakamuchisyaga ŵane. Nambope, naga tukusitwanonyela abale ni alongo ŵetu, tuchiŵambala kuganisya kuti jemanjajo ali ŵangayamika mwamti tuchipitilisya kupeleka mwakusangalala.—Aef. 4:2.
19-20. Ligongo chichi kuwusimana mtima kuli kwakusosekwa mnope patumtendele jwine yambone? (Alolesoni chiwulili.)
19 Aŵeje ŵakuwusimana mtima. Pangani jakuŵa ŵakoloŵa magasa, mwenye jwalunda Solomoni jwalembile kuti, “Mtendeje yindu mwalunda nipo lisiku line timchipegwa mbote.” (Jwak. 11:1) Maloŵegatu gakulosya kuti ŵandu ŵane mpaka alosye kuyamichila yindu yambone yatwatendele “lisiku line” kapena kuti pali papitile ndaŵi. Yeleyi ni yayamtendechele mlongo jwine.
20 Yaka yejinji yipiteyo, ŵamkwakwe jwakulolela dela jwine ŵamlembele mlongo juŵagambile kubatisidwa kwene chikalata chakumlimbikasya kuti apitilisye kuŵa jwakulupichika. Kaneko, pali papitile yaka 8 mlongojo jwalembile chikalata chakuyamichila. Mu chikalatacho, jwalakwe jwalembile kuti, “Sachile kuti namanyisye yagatite pakungamuchisya maloŵe gaŵanembele muchikalata chila. Kusala yisyene, maloŵe gala gangamuchisye mnope mu yaka yipiteyi.” Mlongoju jwasasilesoni kuti, “Maloŵe gala galiji gachinonyelo nambo lilemba lila lyangamwile mnope mtima mwamti ngangusaliliŵalila.” a Panyuma pakulondesya yakusawusya yajwasimene nayo, mlongojo jwasasile kuti, “Ndaŵi sine ligongo lya yakusawusya yanasimanaga nayo, nasakaga kwamba kuleka kumtumichila Yehofa. Nambo pangumbuchile lilemba lila, napataga machili gakungamuchisya kupitilisya kuŵape jwakulupichika.” Jwalakwe jwapitilisye kulondesya kuti, “Mwamti kwa yaka 8 yosope yipiteyi, pangali chindu chachingamuchisye mnope kupunda lilemba lyaŵanembele lila.” Kusala yisyene, ŵamkwakwe jwakulolela dela ŵala ŵasangalele paŵapochele chikalata cha mlongo jula “lisiku line” pali papitile ndaŵi jelewu. M’wejisoni mundu jwine mpaka atuyamichile pa yindu yambone yatwamtendele pali papitile ndaŵi jelewu.
Ŵane mpaka atuyamichile pali papitile ndaŵi jelewu kutyochela patwatendele yambone (Alole ndime 20) b
21. Ligongo chichi wawojo akusosekwa kulingalinga kumsyasya Yehofa mwakuŵa ŵakoloŵa magasa?
21 Mpela mwatuyiwonele munganiji, Yehofa ŵatupanganyisye m’litala lyakuti tusangalaleje patukwakamuchisya ŵane. Atamose kuti tukusasangalala ŵane patupele yindu, nambo tukusaŵa ŵakusangalala mnope patwapele ŵane. Tukusapikana chenene patwakamuchisye Aklistu achimjetu. Nambosoni tukusasangalala mnope pakulosya kuyamichila. Nambope, chinga mundu jwatumpelejo alosisye kuyamichila kapena iyayi, m’weji tukusaŵa ŵakusangalala mnope ligongo lyakumanyilila kuti tutesile yakuwajilwa. Ndaŵi syosope akumbuchileje kuti chinga apeleche yindu yamti uli, Yehofa “komboleka kwapa wawojo yindu yejinji kupunda yeleyo.” (2 Mbi. 25:9) Kusala yisyene, m’weji nganituŵa tukombwele kwapa ŵane yindu yejinji kupunda yampaka atupe Yehofa. Mwamti pangali chindu chakusangalasya mnope kupunda kuti Yehofa atuwuchisye yindu yatwapele ŵane. Myoyo, kwende ndaŵi syosope tulinjelinjeje kwasyasya Atati ŵetu ŵakwinani mwakuŵa ŵakoloŵa magasa.
NYIMBO NA. 17 “Ngusaka”
a Lilemba lyaŵamlembele mlongoju lili lya 2 Yohane 8 lyalikusati, “Msamale ni yamkutenda kuti mkalepela kupochela yindu yele twayipatile panyuma pakukamula masengo. Naga mkutenda yeleyi, chimchipochela yindu yosope yambone yele Mlungu amlinganyichisye.”
b KULONDESYA CHWULILI: Yiwuliliyi yikulosya yaŵatesile ŵamkwakwe jwakulolela dela ŵatwakolasile mundime 20. Akulemba chikalata chakumlimbikasya mlongo juŵagambile kubatisidwa kwene, kaneko panyuma pa yaka yejinji, ŵamkwakwe jwakulolela delawo akupochela chikalata chakuyamichila kutyochela kwa mlongo jula.
